Sabudana health risks: సగ్గుబియ్యం తింటున్నారా? ఈ ఆరోగ్య సమస్యల గురించి మీకు తెలుసా?

Sabudana health risks: మన దేశంలో.. ముఖ్యంగా ఉపవాస సమయాల్లో సగ్గుబియ్యం తీసుకుంటారు. కిచిడీ, వడలు లేదా పాయసం రూపంలో.. దీనిని ఎంతో ఇష్టంగా తింటారు. అయితే.. సగ్గు బియ్యం కేవలం పిండి పదార్థాల నిలయం మాత్రమేనని, ఇందులో పోషకాలు చాలా తక్కువని చాలా మందికి తెలియదు. ఇది రుచిగా ఉన్నప్పటికీ.. దీనిని అతిగా తీసుకోవడం వల్ల రక్తంలో చక్కెర స్థాయిలు పెరగడం, బరువు పెరగడం వంటి అనేక ఆరోగ్య సమస్యలు తలెత్తుతాయి. సగ్గు బియ్యం వల్ల కలిగే సైడ్ ఎఫెక్ట్స్ గురించి వివరంగా తెలుసుకుందాం.

సగ్గుబియ్యం.. అతిగా తింటే కలిగే ఆరోగ్య సమస్యలు :
సగ్గుబియ్యం ‘సగో పామ్’ అనే మొక్క కాండం నుంచి తీసిన పిండితో తయారవుతుంది. ఇది గ్లూటెన్ రహితం కావడంతో చాలా మంది దీనిని ఆరోగ్యకరమైంగా భావిస్తారు. కానీ.. ఇందులో ఉండే అధిక పిండి పదార్థం వల్ల కొన్ని సైడ్ ఎఫెక్ట్స్ కూడా ఉన్నాయి.

1. రక్తంలో చక్కెర స్థాయిలు పెరగడం:
సగ్గుబియ్యంలో గ్లైసీమిక్ ఇండెక్స్ చాలా ఎక్కువగా ఉంటుంది. దీనిని తిన్న వెంటనే.. శరీరంలో గ్లూకోజ్ స్థాయిలు వేగంగా పెరుగుతాయి. డయాబెటిస్ ఉన్నవారు సగ్గుబియ్యం తీసుకోవడం వల్ల వారి షుగర్ లెవల్స్ నియంత్రణ తప్పుతాయి. కాబట్టి.. షుగర్ వ్యాధిగ్రస్తులు దీనికి దూరంగా ఉండటం లేదా చాలా తక్కువ మొత్తంలో తీసుకోవడం మంచిది.

2. బరువు పెరగడం, ఊబకాయం:
బరువు తగ్గాలని ప్రయత్నించే వారికి సగ్గు బియ్యం సరైన ఎంపిక కాదు. ఇందులో కేలరీలు, కార్బోహైడ్రేట్లు అధికంగా ఉంటాయి. ప్రతి రోజూ దీనిని ఆహారంగా తీసుకోవడం వల్ల శరీరంలో కొవ్వు పేరుకుపోయి, బరువు వేగంగా పెరుగుతారు. ప్రత్యేకించి వేయించిన సగ్గుబియ్యం వడలు వంటివి తింటే.. గుండె ఆరోగ్యానికి కూడా ముప్పు కలగే ప్రమాదం ఉంటుంది.

3. జీర్ణ సమస్యలు:
సగ్గుబియ్యం సరిగ్గా ఉడకకపోయినా లేదా అతిగా తిన్నా జీర్ణ సంబంధిత ఇబ్బందులు తలెత్తుతాయి. కొంత మందిలో ఇది కడుపు ఉబ్బరం, గ్యాస్, మలబద్ధకానికి దారితీస్తుంది. ముఖ్యంగా తక్కువ నీరు తాగే అలవాటు ఉన్నవారికి ఇది జీర్ణం కావడం కష్టమవుతుంది.

4. పోషకాహార లోపం:
సగ్గుబియ్యంలో.. ప్రొటీన్లు, విటమిన్లు, ఖనిజ లవణాలు, ఫైబర్ (పీచు పదార్థం) దాదాపు శూన్యం. కేవలం పిండి పదార్థాల కోసమే.. దీనిని తింటే శరీరానికి అందాల్సిన ఇతర ముఖ్యమైన పోషకాలు అందవు. దీని వల్ల దీర్ఘకాలంలో శరీర బలహీనతకు దారి తీసే అవకాశం ఉంది.

5. థైరాయిడ్ సమస్యలు ఉన్నవారికి ముప్పు:
సగ్గుబియ్యం తయారీలో వాడే కొన్ని రకాల కర్రపెండలం గడ్డల్లో.. సైనోజెనిక్ గ్లైకోసైడ్లు ఉంటాయి. వీటిని సరిగ్గా శుద్ధి చేయకపోతే.. అవి శరీరంలో అయోడిన్ శోషణను అడ్డుకుంటాయి. దీని వల్ల థైరాయిడ్ గ్రంథి పని తీరు దెబ్బతినే ప్రమాదం ఉంది. థైరాయిడ్ సమస్యలు ఉన్నవారు దీనిని తీసుకునే ముందు జాగ్రత్త వహించాలి.

6. ప్రాసెసింగ్ వల్ల కలిగే ప్రమాదాలు:
మార్కెట్లో దొరికే సగ్గుబియ్యం తయారీలో కొన్నిసార్లు రసాయనాలను లేదా బ్లీచింగ్ ఏజెంట్లను వాడుతుంటారు. ఇవి కడుపులో.. మంట లేదా అలర్జీలకు కారణం కావచ్చు.

Also Read: వేసవి తాపాన్ని తగ్గించే అద్భుతమైన పండ్లు.. ఇక మీ ఆరోగ్యం మీ చేతుల్లో!

ఆరోగ్యకరంగా ఎలా తీసుకోవాలి?
1.సగ్గుబియ్యాన్ని పూర్తిగా మానేయాల్సిన అవసరం లేదు. కానీ తీసుకునే పద్ధతి మార్చుకోవాలి.

2. సగ్గుబియ్యంతో పాటు ఎక్కువ కూరగాయలు, వేరుశనగలు లేదా పప్పు ధాన్యాలను చేర్చడం ద్వారా పోషక విలువలను పెంచవచ్చు.

3. నూనెలో వేయించిన వంటకాల కంటే.. ఉడికించిన కిచిడీ లేదా పాయసం రూపంలో తీసుకోవడం ఉత్తమం.

4. వారానికి ఒకసారి లేదా పండగ సమయాల్లో.. మాత్రమే దీనిని పరిమితం చేయాలి.