Ranveer Controversy: ‘కాంతార’ వివాదంపై చాముండి కొండల్లో క్షమాపణలు చెప్పనున్న రణవీర్ సింగ్..

Ranveer Controversy: బాలీవుడ్ స్టార్ నటుడు రణవీర్ సింగ్ ప్రస్తుతం ఒక విలక్షణమైన కారణంతో వార్తల్లో నిలిచారు. తన తాజా చిత్రం ‘ధురంధర్’ విజయంతో మంచి జోష్‌లో ఉన్న రణవీర్, గతంలో ‘కాంతార’ సినిమాలోని దైవాన్ని ఉద్దేశించి చేసిన కొన్ని వ్యాఖ్యలు అనుకరణ కారణంగా చట్టపరమైన చిక్కుల్లో పడ్డారు. ఈ వివాదానికి ముగింపు పలికేందుకు ఆయన కర్ణాటకలోని అత్యంత పవిత్రమైన చాముండి కొండలను సందర్శించి, అక్కడ వెలసిన చాముండేశ్వరి దేవికి క్షమాపణలు చెప్పాలని నిర్ణయించుకున్నారు.

అసలు వివాదం ఏమిటి?

గత ఏడాది గోవాలో జరిగిన 55వ అంతర్జాతీయ చలన చిత్రోత్సవం (IFFI) లో రణవీర్ సింగ్ పాల్గొన్నారు. ఆ వేదికపై నటుడు రిషబ్ శెట్టిని, ఆయన సృష్టించిన ‘కాంతార’ సినిమాను ప్రశంసించే క్రమంలో రణవీర్ ఒక పొరపాటు చేశారు. సినిమాలో రిషబ్ శెట్టి ప్రదర్శించిన దైవ నర్తనను (Daiva Narthana) అనుకరిస్తూ, ఆ పవిత్ర దైవాన్ని ‘Ghost’ (దెయ్యం) అని సంబోధించారు. భారతీయ సంస్కృతిలో, ముఖ్యంగా కర్ణాటక తీర ప్రాంత ప్రజలకు ‘దైవం’ అనేది అత్యంత పవిత్రమైన నమ్మకం. అటువంటి దైవాన్ని ‘దెయ్యం’ అని పిలవడం దాని హావభావాలను వేదికపై హాస్యాస్పదంగా అనుకరించడం పట్ల సోషల్ మీడియాలో తీవ్రస్థాయిలో ఆగ్రహం వ్యక్తమైంది. ఇది భక్తుల మనోభావాలను దెబ్బతీసిందంటూ రణవీర్‌పై విమర్శలు వెల్లువెత్తాయి.

కోర్టులో క్షమాపణలు

ఈ వివాదం కర్ణాటక హైకోర్టు వరకు చేరింది. మంగళవారం జరిగిన విచారణలో రణవీర్ సింగ్ తరపున సీనియర్ అడ్వకేట్ సాజన్ పూవయ్య వాదనలు వినిపించారు. రణవీర్ సింగ్ తన వ్యాఖ్యల పట్ల బేషరతుగా క్షమాపణలు చెబుతూ అఫిడవిట్ దాఖలు చేస్తారని కోర్టుకు తెలిపారు. కేవలం కాగితాల మీద క్షమాపణలు చెప్పడమే కాకుండా, స్వయంగా మైసూరులోని చాముండి కొండలకు వెళ్లి, అమ్మవారిని దర్శించుకుని తన తప్పును ఒప్పుకుంటారని న్యాయవాది పేర్కొన్నారు.

చాముండి కొండల ప్రత్యేకత ఏమిటి?

చాముండి కొండలు కర్ణాటకలోని అత్యంత ఆధ్యాత్మిక చారిత్రక ప్రాధాన్యత కలిగిన ప్రదేశం. సముద్ర మట్టానికి 1,000 మీటర్ల ఎత్తులో ఉన్న ఈ కొండలపై ‘చాముండేశ్వరి’ దేవి కొలువై ఉన్నారు. ఆమెను మైసూరు రక్షక దేవతగా భక్తులు కొలుస్తారు. మైసూరు ఒడయార్ రాజవంశీయులు ఈమెను తమ కులదైవంగా పూజిస్తారు. ప్రసిద్ధ మైసూరు దసరా ఉత్సవాలు ఈ దేవత చుట్టూనే సాగుతాయి. కొండపై ఉన్న 1,000 మెట్లు ఎక్కడం భక్తులు ఒక మొక్కుబడిగా భావిస్తారు. అలాగే ఇక్కడ ఉన్న అతిపెద్ద ఏకశిలా నంది విగ్రహం పర్యాటకులను విశేషంగా ఆకర్షిస్తుంది. కళాకారులు ఉత్సాహంలో చేసే కొన్ని పనులు కొన్నిసార్లు ఇతరుల విశ్వాసాలను నొప్పించవచ్చు. రణవీర్ సింగ్ తన పొరపాటును గుర్తించి, కోర్టు ద్వారా భక్తిపూర్వకంగా క్షమాపణలు చెప్పాలని నిర్ణయించుకోవడం ఈ వివాదానికి ఒక హుందాతనమైన ముగింపుని ఇస్తుందని భావిస్తున్నారు.