నేను ఆత్మహత్య చేసుకుంటా.. నాటి ప్రధాని మన్మోహన్ సింగ్ ఎందుకు అలా అన్నారు?

Manmohan Singh: భారతదేశ ప్రజాస్వామ్యంలో వ్యవస్థల పట్ల ఒక దేశ ప్రధాని ఎంతటి ఉన్నతమైన గౌరవాన్ని ప్రదర్శించవచ్చో చాటిచెప్పే అద్భుతమైన సంఘటన ఇది. మాజీ ప్రధాన ఎన్నికల కమిషనర్ (CEC) ఎస్.వై. ఖురేషీ తన సరికొత్త పుస్తకం ‘ఇండియా అండ్ ఐ: ఎ హండ్రెడ్ మెమొరీస్, నాట్ ఎ మెమోయిర్’ ద్వారా నాటి ఆసక్తికర విశేషాలను పంచుకున్నారు.

వివాదానికి కారణమైన మంత్రుల వ్యాఖ్యలు

2012 ఉత్తరప్రదేశ్ అసెంబ్లీ ఎన్నికల సమయంలో కాంగ్రెస్ నాయకుడు సల్మాన్ ఖుర్షీద్ ఒక పెద్ద ప్రకటన చేశారు. తమ పార్టీ అధికారంలోకి వస్తే ముస్లింలకు ఉద్యోగాల కోటాను 4.5% నుండి 9% కి పెంచుతామని హామీ ఇచ్చారు. ఎన్నికల కోడ్ అమల్లో ఉన్నప్పుడు ఇలాంటి హామీలు ఇవ్వడం నిబంధనల ఉల్లంఘనేనంటూ బీజేపీ ఎన్నికల సంఘానికి ఫిర్యాదు చేసింది. దీనిపై విచారణ జరిపిన ఎన్నికల సంఘం, ఖుర్షీద్‌ను తీవ్రంగా హెచ్చరించింది. అయితే, ఈ చర్యను జీర్ణించుకోలేని కొందరు కాంగ్రెస్ నేతలు ఎన్నికల సంఘంపై విమర్శలు మొదలుపెట్టారు. ఈ ‘చిల్లర మాటలు’ ఖురేషీని తీవ్రంగా కలచివేసాయి.

‘నేను ఆత్మహత్య చేసుకుంటాను’- కలవరపడ్డ ప్రధాని

ఈ పరిణామాలపై ఖురేషీ తన ఆవేదనను ప్రధాని ప్రెస్ సెక్రటరీ హరీష్ ఖారే వద్ద పంచుకున్నారు. మరుసటి రోజే ఈ విషయం అప్పటి ప్రధాని డాక్టర్ మన్మోహన్ సింగ్ వద్దకు చేరింది. వెంటనే స్పందించిన ప్రధాని, ఖురేషీని అత్యవసరంగా తన నివాసానికి పిలిపించుకున్నారు. ఆ సాయంత్రం భేటీలో మన్మోహన్ సింగ్ ఎంతో ఉద్వేగానికి లోనయ్యారు. ఖురేషీతో అంటూ.. ‘నా ప్రభుత్వం గురించి మీరు అలా అనుకుంటే, నేను ఆత్మహత్య చేసుకుంటాను’ అని తీవ్ర భావోద్వేగానికి గురయ్యారు.

షాక్‌కి గురైన ఖురేషీ..

ఆ మాటలకు ఖురేషీ ఒక్కసారిగా షాక్ అయ్యారు. తాను కేవలం కొందరు మంత్రుల ప్రవర్తన గురించే మాట్లాడానని, ప్రధానిని తప్పుబట్టలేదని వివరించి ఆయనను శాంతింపజేయడానికి ఖురేషీకి కొన్ని నిమిషాల సమయం పట్టింది. చివరకు మన్మోహన్ సింగ్ శాంతించి, ‘నాకు ఈ విషయం అస్సలు తెలియదు. ఇకపై ఎలాంటి సమస్య వచ్చినా నేరుగా నాకు ఫోన్ చేయండి’ అని హామీ ఇచ్చారు.

ప్రజాస్వామ్యానికి ఎన్నికల సంఘమే ఆత్మ..

ఆ సందర్భంలో మన్మోహన్ సింగ్ అన్న మాటలను ఖురేషీ ప్రత్యేకంగా గుర్తుచేసుకున్నారు. ‘ఎన్నికల సంఘం కేవలం భారతదేశ గర్వకారణం మాత్రమే కాదు.. అది మన ప్రజాస్వామ్యానికే ఆత్మ.. దానిని కోల్పోతే మనం అంతా కోల్పోయినట్టే’ అని ప్రధాని అన్నారు.

ఈ భేటీ జరిగిన తర్వాత ఎన్నికల సంఘంపై కాంగ్రెస్ నేతల విమర్శలు పూర్తిగా ఆగిపోయాయి. అధికార మదంతో కాకుండా, వ్యవస్థల పట్ల అత్యంత బాధ్యతగా, సున్నితంగా వ్యవహరించిన మన్మోహన్ సింగ్ లాంటి అరుదైన నాయకుడిని తాను చూడలేదని ఖురేషీ తన పుస్తకంలో కొనియాడారు.

Share

• 
• 
• 
• 
• 
•