ఇంత గందరగోళమైన ప్రకటన ఎప్పుడూ చూడలేదయో కేటీఆర్! ఎందుకంత తడబాటు. అసలు ఆ హౌజింగ్ స్కీమే మీకు అచ్చి రాలేదు. పెద్దాయన ఏదో అధికారంలోకి వచ్చేందుకు డబుల్ బెడ్ రూం ఇండ్లని తెలంగాణ జనాన్ని మోసం చేశాడు గానీ..! మళ్లీ మళ్లీ దాని గురించి ఎంత తక్కువ మాట్లాడితే అంత మంచిది మీకే! ఎందుకంటే ఎంత మాట్లాడాలో.. ఎన్ని చెప్పాలో.. ఎంతగా నమ్మించాలో.. ! అన్నీ చేసేశారు. ఇక ఇప్పుడు వచ్చే ఎన్నికల్లో ఏం చెప్పినా ఈ విషయంలో జనం నమ్మేలా లేరు..! మీరు వేరే అంశాలు, ప్రభుత్వ లోపాలు వెతుక్కుంటే బెటర్.. అవే మిమ్మల్ని కాపాడవచ్చు! ఇక అసలు విషయానికొద్దాం..! నిన్న ఇండ్ల మంత్రి పొంగులేటి శ్రీనివాస్రెడ్డి ఓ సవాల్ విసిరిండు కేటీఆర్కు.
ఏమని? హైదరాబాద్లో ఒక్క ఇళ్లు కూడా కట్టలేదన్నావు కదా.. ఈ రెండున్నరేండ్లలో మీరెన్ని డబుల్బెడ్ రూం ఇండ్లు కట్టారో.. అంతకు మించి కట్టిన తరువాతే నేను ఎమ్మెల్యేకు పోటీ చేస్తా .. లేదంటే చేయను అన్నాడు. నువ్వు దీనికి ఒప్పుకుంటే.. నువ్వు కూడా ఎమ్మెల్యేగా పోటీ చేయను అని సవాల్ స్వీకరించు అన్నాడు. ఇవాళ కేటీఆర్ దీనిపై స్పందించాడు. ముక్కు ఎక్కడుంది అంటే.. తల చుట్టూ చేతి తిప్పి చూపినట్టుగా.. హౌజింగ్ స్కీమ్పై మాట్లాడవయా బాబూ.. అంటే.. పర్సనల్ ఆరోపణలన్నీ వెళ్లగక్కాడు. వీటిపై పొంగులేటి అరాచకాలు అని ఓ సెపరేట్ ప్రెస్మీటే పెట్టుకోవచ్చు కదా! ఇందులో అవన్నీ ఎందుకు? ఆ ప్రకటనంతా కంగాళీ కంగాళీ.. కేటీఆర్లో కంగారు కంగారు అన్నట్టే ఉంది.
ఇంతకూ ఇండ్ల స్కీంపై ఏమంటావు? అంటే.. ఒక్క డబుల్ బెడ్ రూం ఇల్లు.. ఏడు ఇందిరమ్మ ఇండ్లతో సమానమట. ఎట్టెట్టా..? జనం వింటే తిట్టిన తిట్టు తిట్టకుండా తిడతారు కేటీఆర్! ఎన్ని ఇండ్లు కట్టించావు గ్రామీణ ప్రాంతాల్లో..? ఎంత మంది వాటిల్లో ఉంటున్నారు? వేళ్ల మీద లెక్కబెట్టవచ్చు. అట్టర్ ఫ్లాప్ స్కీం అది.. మీ ఓటమిలో అదీ ఓ కీలక భూమిక పోషించింది. అది నీకూ తెలుసు. ఇందుకీ సాకులు. లక్ష కట్టానన్నావు హైదరాబాద్లో. దానికంటే ఎక్కువ కట్టి చూపించు అన్నావు బాగుంది. కట్టకపోతే అప్పుడు అడుగుదాం.. నిలదీద్దాం.. మేము కూడా నీకు తోడుంటాం..! అంతిమంగా జనానికేగా మేలు జరిగేది. అలా చేయడం మీకు చేతకాదు.. కావాలంటే నేనూ స్వీకరిస్తున్నా నీ సవాల్.. లక్షకంటే ఎక్కువ ఇండ్లు కట్టిస్తే.. నేను ఎమ్మెల్యేగా పోటీ చేయను..! అని ఒక్క మాటంటే .. అబ్బ ఎంత నీటుగా ఘాటుగా.. వేటుగా ఉండేది. భయపడ్డావా?
పుసుక్కున కట్టినా కట్టేస్తారు.. అని! పిచ్చుక గూళ్లని నీవే అన్నావుగా. ఆ పిచ్చుక గూళ్లు కట్టుకునేందుకు ఈ సర్కార్ ఇచ్చే ఐదు లక్షలు ఏ మూలకూ సరిపోవడం లేదు కేటీఆర్! దానికి మరో ఐదారు లక్షలు అప్పులు చేస్తున్నారు. నీకు ప్రాక్టికాలిటీ లేదు. జనంలో తిరగవు. వారి బాధలు తెలుసుకోవు. ఇండ్లు కట్టించే విషయంలో మోసం మీద మోసం చేసి జనం చేత ఛీ కొట్టించుకున్నారు. డబుల్ బెడ్ రూం ఇండ్ల స్కీం ఫెయిల్ అయ్యింది. ఆ తరువాత సొంతంగా జాగా ఉంటే ఐదు లక్షలన్నారు. గెలవగానే లేదు లేదు మూడే లక్షలన్నాం అని అబద్దమాడారు. మళ్లా ఐదు లక్షలని ఎన్నికలకుల పోయారు. చిత్తుగా ఓడిపోయారు. ఇదీ మీ ఇండ్ల స్కీం కథా కమామీషు.
అంటే హైదరాబాద్లో నీ లెక్క ప్రకారం లక్ష డుబల్ బెడ్ రూం ఇండ్లకు ఏడు లక్షల ఇందిరమ్మ ఇళ్లు కట్టించాలంటావు! అదైనా చక్కగా చెప్పొచ్చుగా.. అట్లైతేనే సవాల్ స్వీకరిస్తానని. మాటకు ముందు రాజకీయ సన్యాసం అనే పదం వాడటానికి వెనుకాడకపోయేది.. ఈ విషయంలో ఇంత భయపడుతున్నావెందుకు? కేటీఆర్!
Share
జాతీయ రాజకీయాల్లోకి వెళ్లను.. రాజ్యసభ వద్దని చెప్పా.. సిద్దరామయ్య కీలక వ్యాఖ్యలు
త్రికాల మూవీ రివ్యూ.. విజువల్ వండర్.. కానీ ఆ ఒక్కటి మిస్సైంది!
