Gram Panchayat Elections: సజావుగా ముగిసిన గ్రామపంచాయతీ ఎన్నికలు.. అధికారులకు మంత్రి సీతక్క అభినందనలు

Gram Panchayat Elections: రాష్ట్రవ్యాప్తంగా నిర్వహించిన గ్రామ పంచాయతీ ఎన్నికలు ప్రశాంతంగా, సజావుగా, విజయవంతంగా ముగియడం రాష్ట్రానికి గర్వకారణమని పంచాయతీరాజ్, గ్రామీణాభివృద్ధి, మహిళా శిశు సంక్షేమ శాఖ మంత్రి సీతక్క పేర్కొన్నారు. ప్రజాస్వామ్య వ్యవస్థకు మూలస్తంభాలైన గ్రామస్థాయి ఎన్నికలు ఎలాంటి అవాంఛనీయ ఘటనలు లేకుండా పూర్తవడం ప్రజల విజ్ఞతకు, అధికార యంత్రాంగం నిబద్ధతకు నిదర్శనమని ఆమె అన్నారు.

గ్రామ పంచాయతీ ఎన్నికల నిర్వహణలో కీలక పాత్ర పోషించిన పంచాయతీరాజ్ శాఖ సిబ్బంది, జిల్లా అధికారులు, ఎన్నికల సిబ్బందికి మంత్రి సీతక్క హృదయపూర్వక అభినందనలు తెలిపారు. కఠిన పరిస్థితుల్లోనూ సమన్వయంతో పనిచేసి ఎన్నికలను సజావుగా నిర్వహించినందుకు వారిని ప్రత్యేకంగా ప్రశంసించారు. ప్రజాస్వామ్య విలువలను కాపాడుతూ, ఎన్నికల ప్రక్రియను పారదర్శకంగా నిర్వహించడం అందరి సమిష్టి కృషితోనే సాధ్యమైందని ఆమె పేర్కొన్నారు.

ఎన్నికల ప్రక్రియను సమర్థవంతంగా పర్యవేక్షించిన రాష్ట్ర ఎన్నికల కమిషనర్ రాణి కుముదినికి మంత్రి ప్రత్యేక అభినందనలు తెలిపారు. ఎన్నికల నిర్వహణలో స్పష్టమైన మార్గదర్శకాలు, కఠిన పర్యవేక్షణ, పారదర్శక విధానాలతో ఎన్నికలను విజయవంతం చేసినందుకు ఆమె కృషి ప్రశంసనీయమని అన్నారు. అలాగే ఎన్నికల అథారిటీగా కీలక బాధ్యతలు నిర్వర్తించిన పంచాయతీరాజ్, గ్రామీణాభివృద్ధి శాఖ కమిషనర్ జీ. సృజనకు కూడా మంత్రి అభినందనలు తెలిపారు.

ఎన్నికలు ప్రశాంతంగా ముగియడానికి పోలీస్ శాఖ, ఇతర శాఖల అధికారుల సహకారం ఎంతో కీలకమని మంత్రి సీతక్క పేర్కొన్నారు. భద్రతా ఏర్పాట్లు పక్కాగా అమలు చేసి, ఎక్కడా హింసాత్మక ఘటనలు జరగకుండా చూసిన పోలీస్ సిబ్బందికి, ఎన్నికల విధుల్లో పాల్గొన్న ప్రతి ఉద్యోగికి ఆమె కృతజ్ఞతలు తెలిపారు. రీపోలింగ్ అవసరం లేకుండా ఎన్నికలు పూర్తవడం పరిపాలనా యంత్రాంగం పనితీరుకు అద్దం పడుతుందని వ్యాఖ్యానించారు.

గ్రామ పంచాయతీ ఎన్నికల్లో నూతనంగా ఎన్నికైన సర్పంచులు, వార్డు సభ్యులకు మంత్రి సీతక్క శుభాకాంక్షలు తెలిపారు. ప్రజలు తమపై ఉంచిన నమ్మకాన్ని నిలబెట్టుకోవాలని, ప్రజాసేవే లక్ష్యంగా పనిచేయాలని ఆమె సూచించారు. ఎన్నికల సమయంలో ఉన్న రాజకీయ భేదాభిప్రాయాలను పక్కన పెట్టి, గ్రామాల సమగ్ర అభివృద్ధి కోసం పార్టీలకతీతంగా అందరూ కలిసికట్టుగా ముందుకు సాగాలని పిలుపునిచ్చారు.

పల్లెలే తెలంగాణ ప్రగతికి పునాదులని మంత్రి స్పష్టం చేశారు. గ్రామాల అభివృద్ధి ద్వారానే రాష్ట్ర అభివృద్ధి సాధ్యమవుతుందని ఆమె అన్నారు. తాగునీటి సరఫరా, పారిశుధ్యం, అంతర్గత రహదారులు, విద్య, ఆరోగ్యం, మహిళా సాధికారత, ఉపాధి అవకాశాలు, మౌలిక వసతుల అభివృద్ధి వంటి అంశాలపై గ్రామ పంచాయతీలు ప్రత్యేక దృష్టి సారించాలని సూచించారు.

ప్రజల భాగస్వామ్యంతోనే గ్రామాల్లో నిజమైన మార్పు సాధ్యమని మంత్రి సీతక్క అభిప్రాయపడ్డారు. గ్రామసభలను మరింత బలోపేతం చేసి, ప్రజల అభిప్రాయాలను పాలనలో ప్రతిబింబింపజేయాలని సూచించారు. ప్రభుత్వ పథకాలు చివరి వ్యక్తికి చేరేలా బాధ్యతాయుతంగా పనిచేయాలని, అవినీతికి తావు లేకుండా పారదర్శక పాలన అందించాలని సర్పంచులు, వార్డు సభ్యులకు హితవు పలికారు.

Also Read: శంషాబాద్ బచావో..చార్మినార్ హటావో.. జేఏసీ, విద్యార్థుల భారీ ర్యాలీ

గ్రామ పంచాయతీలే ప్రజాస్వామ్యానికి మూలాధారమని, వాటిని బలోపేతం చేయడం ప్రభుత్వ లక్ష్యమని మంత్రి సీతక్క స్పష్టం చేశారు. గ్రామాల ప్రగతే ధ్యేయంగా, ప్రజల సహకారంతో బలమైన గ్రామపంచాయతీలను నిర్మిద్దామని ఆమె పిలుపునిచ్చారు. ప్రశాంతంగా ముగిసిన ఈ ఎన్నికలు, రాష్ట్రంలో ప్రజాస్వామ్య సంస్కృతి మరింత పటిష్టంగా ఉందని చాటుతున్నాయని మంత్రి పేర్కొన్నారు.

Share

• 
• 
• 
• 
• 
•