నేలపాలైన పంటలు.. కన్నీరుమున్నీరవుతున్న రైతన్నలు, ప్రభుత్వం ఆదుకోవాలని కవిత డిమాండ్

తెలంగాణ రాష్ట్రంలో గత వారం రోజుల నుంచి వాతావరణం అస్తవ్యస్తంగా మారింది. పలు జిల్లాల్లో కురుస్తున్న అకాల వర్షాలు రైతుల ఆశలపై నీళ్లు చల్లాయి. రెండు, మూడు రోజుల నుంచి కురిసిన భారీ వర్షం ధాటికి పంటలు తీవ్రంగా దెబ్బతిన్నాయి. ముఖ్యంగా ఉత్తర తెలంగాణ జిల్లాల్లో వడగళ్ల వాన బీభత్సం సృష్టించింది. చేతికొచ్చిన పంటలు కళ్లముందే నాశనమవడంతో అన్నదాతలు ఆవేదన వ్యక్తం చేస్తున్నారు. పంట నష్టపోయిన ప్రతి రైతును ప్రభుత్వం తక్షణమే ఆదుకోవాలని బీఆర్ఎస్ నాయకురాలు కల్వకుంట్ల కవిత డిమాండ్ చేశారు.

ఈ జిల్లాల్లో పరిస్థితి దారుణం..

జగిత్యాల, కరీంనగర్, సిద్దిపేట, నిర్మల్ జిల్లాల్లో పరిస్థితి అత్యంత దారుణంగా మారింది. ఈ ప్రాంతాల్లో వందలాది ఎకరాల్లో కోతకు సిద్ధంగా ఉన్న మొక్కజొన్న చేలు ఈదురు గాలుల ధాటికి నేలవాలాయి. ఆరుగాలం కష్టపడి పండించిన పంట నేలపాలవడంతో రైతుల కష్టం బూడిదలో పోసిన పన్నీరుగా మారింది. కేవలం మొక్కజొన్నే కాకుండా వరి, పసుపు, నువ్వుల పంటలకు కూడా తీరని నష్టం వాటిల్లింది. అకాల వర్షం వల్ల కలిగిన ఈ ఆకస్మిక నష్టాన్ని జీర్ణించుకోలేక రైతాంగం తల్లడిల్లిపోతోంది.

దెబ్బతిన్న మామిడి తోటలు.. 

ఉద్యానవన పంటల పరిస్థితి మరీ ఘోరంగా ఉంది. కరీంనగర్, జగిత్యాల జిల్లాల్లో మామిడి తోటలు భారీగా దెబ్బతిన్నాయి. పిందెలు కాయలుగా మారుతున్న సమయంలో వడగళ్లు కురవడంతో మామిడి కాయలు భారీగా నేలరాలాయి. దీనివల్ల రైతులకు అపారమైన ఆర్థిక నష్టం వాటిల్లింది. మంగళవారం తెల్లవారుజామున కురిసిన వర్షానికి ధాన్యపు రాశులు తడిసి ముద్దయ్యాయి. ఆరబోసిన ధాన్యం కొట్టుకుపోవడంతో రైతులు లబోదిబోమంటున్నారు.

రేవంత్ సర్కార్ భరోసా కల్పించాలి.. 

పంట నష్టంపై స్పందించిన కల్వకుంట్ల కవిత రైతుల పక్షాన నిలిచారు. క్షేత్రస్థాయిలో పంట నష్టాన్ని పరిశీలించి రైతులకు భరోసా కల్పించాలని ప్రభుత్వాన్ని కోరారు. ప్రకృతి ప్రకోపానికి బలైపోయిన అన్నదాతను ఆదుకోవాల్సిన బాధ్యత పాలకులపై ఉందని ఆమె గుర్తుచేశారు. జగిత్యాల నుంచి నిర్మల్ వరకు రైతులు పడుతున్న ఇబ్బందులు వర్ణనాతీతమని ఆవేదన వ్యక్తం చేశారు. ప్రభుత్వ యంత్రాంగం యుద్ధ ప్రాతిపదికన నష్టం అంచనా వేయాలని సూచించారు.

పరిహారం చెల్లించాలి.. 

నష్టపోయిన ప్రతి రైతుకు ఎకరానికి తగిన పరిహారం చెల్లించాలని ఆమె కోరారు. తడిసిన ధాన్యాన్ని నిబంధనలు పక్కనపెట్టి ప్రభుత్వమే కొనుగోలు చేయాలని డిమాండ్ చేశారు. పంటల బీమా పథకం అమలులో పారదర్శకత ఉండాలని హితవు పలికారు. అన్నదాతలు అధైర్యపడొద్దని వారికి అండగా ఉంటామని భరోసా ఇచ్చారు. ప్రభుత్వం తక్షణమే స్పందించి సహాయక చర్యలు చేపట్టకపోతే రైతాంగం కోలుకోవడం కష్టమని హెచ్చరించారు.

ALSO READ: CAG Report: తెలంగాణ ఖజానా మొత్తం ఖాళీ.. కాగ్ రిపోర్టులో విస్తుపోయే సంచలనాలు