కెనడాలో ప్రతి సంవత్సరం కనిపించే ఒక అరుదైన ప్రకృతి దృశ్యం ప్రపంచవ్యాప్తంగా ఆసక్తిని పెంచుతోంది. ఒకేసారి లక్షకు పైగా పాములు నేల లోపల నుంచి బయటకు వస్తాయి. ఈ ప్రదేశం పేరు Narcisse Snake Dens. ఇది మనిటోబా అనే రాష్ట్రంలో ఉంది. వసంతకాలం ప్రారంభమయ్యే సమయంలో ఈ ప్రాంతం పూర్తిగా పాములతో నిండిపోతుంది. నేల కదులుతున్నట్టుగా కనిపించే ఈ దృశ్యం చూసేందుకు ప్రతి సంవత్సరం వేలాది మంది పర్యాటకులు, ప్రకృతి ప్రేమికులు, ఫోటోగ్రాఫర్లు అక్కడికి చేరుకుంటారు. ఒకే చోట ఇంత పెద్ద సంఖ్యలో పాములు కనిపించడం ప్రపంచంలో చాలా అరుదు. అందుకే ఈ ప్రాంతం ప్రత్యేక గుర్తింపు పొందింది. ప్రకృతి వైవిధ్యాన్ని దగ్గరగా చూడాలనుకునే వారికి ఇది ఒక అద్భుత అనుభవంగా చెప్పుకోవచ్చు.
ఎక్కడ నుంచి వస్తాయి?
ఈ ప్రాంతంలో కనిపించే పాములు ప్రధానంగా రెడ్ సైడెడ్ గార్టర్ స్నేక్స్ అనే జాతికి చెందినవి. చలికాలంలో కెనడాలో ఉష్ణోగ్రతలు తీవ్రంగా పడిపోతాయి. మంచు కురుస్తుంది. అలాంటి సమయంలో ఈ పాములు భూమి లోపల ఉన్న లోతైన రాళ్ల గుహల్లోకి వెళ్లి అక్కడే గుంపులుగా ఉంటాయి. కొన్ని నెలల పాటు అవి బయటకు రావు. వాతావరణం వెచ్చగా మారడం ప్రారంభమైన వెంటనే, సాధారణంగా ఏప్రిల్ చివరి నుంచి మే మొదటి వారంలో, వేల సంఖ్యలో పాములు ఒకేసారి బయటకు వస్తాయి. ఈ సమయంలో జతకట్టే ప్రక్రియ జరుగుతుంది. మగ పాములు ఒక ఆడ పాము చుట్టూ గుంపులుగా చేరి తిరుగుతాయి. ఈ దృశ్యం ఎంతో ప్రత్యేకంగా కనిపిస్తుంది. కొద్ది రోజుల తరువాత ఈ పాములు సమీపంలోని అడవులు, చెరువులు, గడ్డి ప్రాంతాలకు వెళ్లిపోతాయి. శరదృతువు ప్రారంభంలో మళ్లీ చలి పెరిగినప్పుడు అవి తిరిగి అదే గుహలకు చేరుకుంటాయి. ఇలా ప్రతి సంవత్సరం జరుగుతూ ఉంటుంది.
అయితే ఒకప్పుడు ఈ పాములకు పెద్ద ప్రమాదం ఏర్పడింది. గుహల సమీపంలో ఉన్న రహదారి కారణంగా వలస వెళ్లే సమయంలో అనేక పాములు వాహనాల కింద పడి చనిపోయేవి. ప్రతి సంవత్సరం వేల సంఖ్యలో పాములు మరణించడంతో వాటి సంఖ్య తగ్గిపోతుందనే ఆందోళన వ్యక్తమైంది. దీనిని గుర్తించిన అధికారులు, ప్రకృతి సంరక్షణ సంస్థలు కలిసి చర్యలు చేపట్టాయి. రహదారి పక్కన ప్రత్యేక కంచెలు ఏర్పాటు చేశారు. పాములు సురక్షితంగా రహదారి దాటేందుకు భూగర్భ సొరంగాలు నిర్మించారు. డ్రైవర్లు వేగం తగ్గించాలని సూచించే బోర్డులు కూడా ఏర్పాటు చేశారు. ఈ చర్యల వల్ల పాముల మరణాలు గణనీయంగా తగ్గాయి. ఇప్పుడు పాముల సంఖ్య మళ్లీ పెరిగినట్లు నిపుణులు చెబుతున్నారు. ప్రస్తుతం పరిస్థితులపై ఆధారపడి దాదాపు 75 వేల నుంచి 1.5 లక్షల వరకు పాములు అక్కడ కనిపిస్తున్నాయని అంచనా.
పాములతో హాని ఉండదా?
ప్రస్తుతం ఈ ప్రాంతాన్ని పర్యాటకులకు అనుకూలంగా మార్చారు. పాములకు ఇబ్బంది కలగకుండా దూరం నుంచి చూడేలా మార్గాలు ఏర్పాటు చేశారు. వసంతకాలంలో కొన్ని వారాల పాటు పాముల కుప్పలు స్పష్టంగా కనిపిస్తుంది. ప్రకృతి గురించి తెలుసుకోవాలనుకునే విద్యార్థులు, పరిశోధకులు కూడా పెద్ద సంఖ్యలో అక్కడికి వెళ్తున్నారు. భయంకరంగా కనిపించినా, ఈ పాములు సాధారణంగా మనుషులకు హాని చేయవు అని నిపుణులు చెబుతున్నారు. ప్రకృతి ప్రపంచంలో ఎన్నో ఆశ్చర్యకరమైన ఘటనలు జరుగుతాయని, వాటిని కాపాడుకోవడం ఎంత ముఖ్యమో ఈ ప్రదేశం గుర్తు చేస్తోంది. వేలాది పాములు ఒకేసారి బయటకు రావడం కేవలం ఒక ప్రకృతి ఘటన మాత్రమే కాదు, జీవ వైవిధ్యాన్ని అర్థం చేసుకునే ఒక అరుదైన అవకాశం కూడా.
Share
Revanth Reddy: దిల్లీ వేదికగా తెలంగాణ హక్కుల పోరాటం.. కేంద్రంతో సీఎం రేవంత్ రెడ్డి కీలక చర్చలు
Overheating Laptop: హీటింగ్ సమస్యతో మీ ల్యాప్టాప్ స్లో అవుతోందా? ఈ సెట్టింగ్స్ ఓసారి మార్చి చూడండి!
