Eluru Viral News: శివుడికే ఆఫర్ ఇచ్చిన భక్తుడు.. హుండీలో వెలుగుచూసిన షాకింగ్ లెటర్.. చదివి అవాక్కైన అధికారులు

Eluru Viral News: సాధారణంగా భక్తులు దేవుడికి మొక్కులు చెల్లించుకోవడం, కోర్కెలు కోరడం పరిపాటి. అయితే ఏలూరు జిల్లా తాడువాయిలోని శివాలయంలో మాత్రం ఒక భక్తుడు నేరుగా దేవుడికే ఒక ‘బిజినెస్ ఆఫర్’ ఇచ్చి అందరినీ ఆశ్చర్యపరిచాడు. ఆలయ అధికారులు హుండీ లెక్కిస్తున్న సమయంలో బయటపడిన ఒక లేఖ ఇప్పుడు స్థానికంగా పెద్ద చర్చకు దారితీసింది. ఆ లేఖలోని సారాంశం చూసి అధికారులు సైతం అవాక్కయ్యారు.

రూ. 20 లక్షల ప్యాకేజీ డిమాండ్..
ఆ గుర్తుతెలియని భక్తుడు తన లేఖలో స్వామివారితో ఒక ఒప్పందం చేసుకున్నట్లు రాశారు. తనకు ఏడాదికి 20 లక్షల రూపాయల ప్యాకేజీ వచ్చేలా సాఫ్ట్‌వేర్ లేదా మరేదైనా మంచి ఉద్యోగం ప్రసాదించాలని కోరారు. ఒకవేళ ఆ స్థాయి ఉద్యోగం వస్తే, స్వామివారికి ఘనంగా అభిషేకం చేయించి, పట్టు వస్త్రాలు సమర్పిస్తానని తన మొక్కును లేఖ ద్వారా విన్నవించుకున్నారు. భక్తికి వ్యాపార ధోరణిని జోడించిన తీరు వింతగా అనిపించినా, నేటి యువత పడుతున్న ఉద్యోగ ఆవేదనకు ఇది అద్దం పడుతోంది.

పరీక్షల్లో మార్కులు.. ఇదే మొదటి కోరిక..
కేవలం ఉద్యోగమే కాకుండా, తాను రాసే పరీక్షల్లో కూడా మంచి మార్కులు వచ్చేలా దీవించాలని ఆ భక్తుడు కోరారు. “స్వామి.. నేటి వరకు నిన్ను ఏ కోరికా అడగలేదు, ఇదే నా మొదటి కోరిక” అని లేఖలో పేర్కొనడం విశేషం. తన మొదటి విన్నపాన్ని మన్నించి త్వరగా సెటిల్ అయ్యేలా చూడాలని అత్యంత వినయంగా, అదే సమయంలో డిమాండ్‌తో కూడిన విన్నపాన్ని ఆ లేఖలో పొందుపరిచారు.

సామాజిక మాధ్యమాల్లో వైరల్..
హుండీ లెక్కింపులో ఇలాంటి లేఖలు అప్పుడప్పుడు కనిపిస్తున్నప్పటికీ, ఇంత భారీ ప్యాకేజీని టార్గెట్‌గా పెట్టి దేవుడికి లేఖ రాయడం చర్చనీయాంశమైంది. ఆలయ సిబ్బంది ఈ లేఖను చదివి నవ్వుకున్నప్పటికీ, నిరుద్యోగ సమస్య ఎంత తీవ్రంగా ఉందో ఈ ఘటన నిరూపిస్తోందని పలువురు అభిప్రాయపడుతున్నారు. ప్రస్తుతం ఈ ‘ఉద్యోగ మొక్కు’ లేఖ సోషల్ మీడియాలో విపరీతంగా వైరల్ అవుతోంది.

నిష్కల్మషమైన భక్తా? అతి తెలివా?
ఈ ఘటనపై భక్తుల నుంచి భిన్నమైన స్పందనలు వస్తున్నాయి. కొందరు దీన్ని దేవుడిపై ఉన్న నమ్మకంతో చేసిన నిష్కల్మషమైన పనిగా భావిస్తుంటే, మరికొందరు మాత్రం దేవుడికే లంచం ఆశ చూపినట్లుగా ఉందని చమత్కరిస్తున్నారు. ఏది ఏమైనా, తాడువాయి శివాలయం హుండీలో దొరికిన ఈ లేఖ భక్తి మార్గంలో ఒక కొత్త ‘ట్రెండ్’ను చూపిస్తోంది.

శివాలయం హుండీ లెక్కింపులో విచిత్ర ఘటన

దేవుడికి ఆఫర్ ఇచ్చిన గుర్తు తెలియని వ్యక్తి

పరీక్షల్లో మంచి మార్కులు, ఏడాదికి రూ.20 లక్షల ప్యాకేజీ వచ్చే జాబ్ వస్తే శివుడికి అభిషేకం చేయించి వస్త్రాలు సమర్పిస్తానని లేఖ రాసి హుండీలో వేసిన వ్యక్తి

తన మొదటి కోరిక నెరవేర్చాలని వేడుకున్న… pic.twitter.com/DprQmb5vww

— BIG TV Breaking News (@bigtvtelugu) February 20, 2026

Share

• 
• 
• 
• 
• 
•