Putta Report: డ్రగ్స్ కేసులో ట్విస్ట్.. టీడీపీ అధిష్టానానికి చేరిన పుట్టా నివేదిక.. అసలేం జరుగబోతుంది?

Putta Report: డ్రగ్స్ వివాదంలో చిక్కుకున్న టీడీపీ యువ నాయకుడు పుట్టా మహేశ్ యాదవ్ వ్యవహారం ప్రస్తుతం ఆంధ్రప్రదేశ్ రాజకీయాల్లో హాట్ టాపిక్‌గా మారింది. ఈ ఘటనకు సంబంధించి తాజాగా కీలక పరిణామాలు చోటుచేసుకున్నాయి.

పూర్తి వివరాల్లోకి వెళితే..
ఇటీవల వెలుగులోకి వచ్చిన డ్రగ్స్ ఉదంతంపై టీడీపీ యువనేత పుట్టా మహేశ్ యాదవ్ తన వివరణను పార్టీ అధిష్టానానికి సమర్పించారు. ఈ మేరకు ఒక సీల్డ్ కవర్‌లో రూపొందించిన నివేదికను టీడీపీ రాష్ట్ర అధ్యక్షుడు పల్లా శ్రీనివాస్ యాదవ్, ఐటీ శాఖ మంత్రి నారా లోకేశ్‌కు అందజేశారు. ఈ నివేదికలో సదరు వివాదానికి సంబంధించి తనకు ఎటువంటి సంబంధం లేదంటూ మహేశ్ యాదవ్ స్పష్టతనిచ్చినట్లు సమాచారం. పార్టీ ప్రతిష్ఠకు భంగం కలగకుండా ఉండేందుకే తాను ఇన్నాళ్లూ మౌనంగా ఉన్నానని ఆయన పేర్కొన్నారు.

ల్యాబ్ రిపోర్టులతో వివరణ
తాను ఎటువంటి మత్తు పదార్థాలను సేవించలేదని నిరూపించుకోవడానికి పుట్టా మహేశ్ యాదవ్ పలు ప్రైవేట్, ప్రభుత్వ ల్యాబ్‌లలో వైద్య పరీక్షలు చేయించుకున్నారు. ఆ పరీక్షలకు సంబంధించిన రిపోర్టులను కూడా ఆయన నివేదికకు జత చేశారు. తాను స్వచ్ఛందంగా ఈ పరీక్షలకు వెళ్లానని, అన్ని రిపోర్టుల్లోనూ నెగటివ్ అని వచ్చిందని ఆయన ధీమా వ్యక్తం చేస్తున్నారు. రాజకీయంగా తనను దెబ్బతీసేందుకు కొందరు ప్రయత్నిస్తున్నారని, అందుకే ఆధారాలతో సహా వివరణ ఇస్తున్నానని ఆయన పార్టీ పెద్దలకు వివరించారు.

రాంగ్ టైమ్‌లో రాంగ్ ప్లేస్..
ఈ వివాదంపై పుట్టా మహేశ్ యాదవ్ స్పందిస్తూ, తాను “రాంగ్ టైమ్‌లో రాంగ్ ప్లేస్”లో ఉండటం వల్లే ఈ అనవసర వివాదంలో ఇరుక్కోవాల్సి వచ్చిందని వాపోయారు. అక్కడ జరిగిన పరిణామాలతో తనకు ఎటువంటి ప్రత్యక్ష సంబంధం లేదని, కేవలం స్నేహితులు లేదా పరిచయస్తులు ఉన్న చోటికి వెళ్లడం వల్లే తన పేరు బయటకు వచ్చిందని ఆయన సమర్థించుకున్నారు. కావాలనే తన ప్రతిష్టను దిగజార్చేందుకు ఈ వ్యవహారాన్ని పెద్దది చేశారని ఆయన తన ఆవేదనను వ్యక్తం చేశారు.

అధిష్టానం ఆదేశాలే శిరోధార్యం
వివాదం మొదలైనప్పటి నుండి పార్టీ అగ్రనాయకత్వం సూచనల మేరకే తాను సంయమనం పాటిస్తున్నానని మహేశ్ యాదవ్ వెల్లడించారు. పార్టీ క్రమశిక్షణ గల కార్యకర్తగా, అధిష్టానం ఆదేశాల మేరకే మీడియా ముందుకు రాకుండా మౌనంగా ఉన్నానని, అయితే త్వరలోనే అన్ని వాస్తవాలు ప్రజల ముందుకు వస్తాయని ఆయన ధీమా వ్యక్తం చేశారు. పార్టీ ఇచ్చే ఏ విచారణకైనా తాను సిద్ధమని, తన నిజాయితీ త్వరలోనే నిరూపితమవుతుందని ఆయన పేర్కొన్నారు.

Also Read: ఏపీలో క్రెడిట్ చోరీ కంటిన్యూ .. మిట్టల్ స్టీల్ ప్లాంట్ మావల్లే- మాజీ మంత్రి అమర్నాథ్

పరిశీలనలో నివేదిక
ప్రస్తుతం పుట్టా మహేశ్ యాదవ్ ఇచ్చిన నివేదికను, ఆయన సమర్పించిన ల్యాబ్ రిపోర్టులను లోకేశ్, ఇతర ముఖ్య నేతలు పరిశీలిస్తున్నారు. ఒకవేళ ఆయన క్లీన్ చిట్ పొందితే, పార్టీ పరంగా ఆయనపై ఉన్న అనుమానాలు తొలగిపోయే అవకాశం ఉంది. రాష్ట్రవ్యాప్తంగా సంచలనం సృష్టించిన ఈ కేసులో నిజానిజాలు తేల్చేందుకు పార్టీ అంతర్గత విచారణను కూడా సీరియస్‌గా తీసుకుంది. అతి త్వరలోనే ఈ విషయంలో టీడీపీ అధికారికంగా ఒక ప్రకటన చేసే అవకాశం కనిపిస్తోంది.

డ్రగ్స్ వ్యవహారంలో టీడీపీ అధిష్టానానికి చేరిన పుట్టా నివేదిక

సీల్డ్ కవర్‌లో పుట్టా మహేశ్ యాదవ్ ఇచ్చిన వివరణను మంత్రి లోకేశ్‌కు అందజేసిన టీడీపీ రాష్ట్ర అధ్యక్షుడు పల్లా శ్రీనివాస్

వివిధ ల్యాబ్‌లలో చేయించుకున్న టెస్ట్ రిపోర్టులను పార్టీ అధిష్టానానికి సమర్పించిన పుట్టా

రాంగ్… pic.twitter.com/1gx0wqMJ1D

— BIG TV Breaking News (@bigtvtelugu) March 25, 2026