Parakamani Theft Case: పరకామణి చోరీ కేసులో కీలక పరిణామం.. కొత్త ఎఫ్ఐఆర్ దిశగా సీఐడీ అడుగులు!

Parakamani Theft Case: తిరుమల శ్రీవారి ఆలయ పరకామణిలో గత ప్రభుత్వ హయాంలో చోటుచేసుకున్న విదేశీ కరెన్సీ అపహరణ ఉదంతం ప్రస్తుతం రాష్ట్రవ్యాప్తంగా పెను సంచలనం సృష్టిస్తోంది. ప్రధాన నిందితుడు రవికుమార్ లెక్కింపు సమయంలో సుమారు 900 డాలర్ల విదేశీ నగదును తస్కరించినట్లు అప్పట్లో గుర్తించి కేసు నమోదు చేశారు. అయితే, కేవలం ఆ ఒక్క సంఘటనే కాకుండా, నిందితుడు తన సర్వీసు కాలంలో అక్రమ మార్గాల్లో భారీగా ఆస్తులు కూడబెట్టారనే ఆరోపణలు రావడంతో ఈ వ్యవహారం తీవ్రరూపం దాల్చింది. ప్రస్తుతం అధికారంలో ఉన్న ప్రభుత్వం ఈ కేసుపై విజిలెన్స్ విచారణకు ఆదేశించడంతో అక్రమాల డొంక కదులుతోంది.

ఈ విచారణలో భాగంగా ఏసీబీ అధికారులు నిందితుడు రవికుమార్, అతని కుటుంబ సభ్యుల బ్యాంక్ లావాదేవీలపై క్షుణ్ణంగా దృష్టి సారించారు. నిందితులు తమ అక్రమ సంపాదనను ఇతరుల పేర్ల మీదకు మళ్లించారా లేదా అనే కోణంలో లోతైన దర్యాప్తు నిర్వహించి, ఏసీబీ డీజీ సిద్ధం చేసిన మధ్యంతర నివేదికను సీల్డ్ కవర్‌లో హైకోర్టుకు సమర్పించారు. ఆదాయానికి మించిన ఆస్తుల కోణంలో జరిగిన ఈ దర్యాప్తు వివరాలను ఏసీబీ తరపు న్యాయవాది శ్యాంసుందర్ రావు న్యాయస్థానానికి వివరించారు.

ఈ కేసులో అత్యంత వివాదాస్పదమైన అంశం ఏమిటంటే.. నిబంధనలకు విరుద్ధంగా జరిగిన లోక్ అదాలత్ రాజీ. 2023 సెప్టెంబర్ 9న టీటీడీ బోర్డు తీర్మానం గానీ, ఈఓ (Executive Officer) అనుమతి గానీ లేకుండానే అప్పటి ఏవీఎస్వో సతీశ్ కుమార్ నిందితుడితో రాజీ కుదుర్చుకోవడంపై తీవ్ర విమర్శలు వ్యక్తమవుతున్నాయి. నాటి అధికార పార్టీ నేతల ఒత్తిడితోనే ఈ కేసును నీరుగార్చే ప్రయత్నం జరిగిందనే ఆరోపణలు బలంగా వినిపిస్తున్నాయి. ఈ రాజీ వ్యవహారం వెనుక ఉన్న అసలు సూత్రధారులు ఎవరనే దానిపై ఇప్పుడు విచారణ కేంద్రీకృతమైంది.

ఏసీబీ నివేదికను పరిశీలించిన గౌరవ హైకోర్టు, ఈ కేసులో అనేక భిన్నమైన అంశాలు దాగి ఉన్నాయని అభిప్రాయపడింది. సుప్రీంకోర్టు గతంలో ఇచ్చిన తీర్పులను అనుసరించి, అవసరమైతే ఈ అక్రమాలపై కొత్తగా ఎఫ్ఐఆర్ (FIR) నమోదు చేయాలని సీఐడీకి కీలక సూచనలు చేసింది. ప్రధానంగా నిందితుడికి, అధికారులకు మధ్య జరిగిన రాజీ ప్రక్రియలో ఎటువంటి నిబంధనల ఉల్లంఘన జరిగిందో వెలికితీయాలని కోర్టు స్పష్టం చేసింది.

Also Read: అర్ధరాత్రి హైవేపై దువ్వాడ హల్‌చల్.. మాధురి ఆడియోతో వెలుగులోకి సంచలన నిజాలు!

ప్రస్తుతం ఈ కేసులో మెజారిటీ విచారణ పూర్తయిన నేపథ్యంలో, అన్ని నివేదికలను పరిశీలించి త్వరలోనే తగిన ఉత్తర్వులు జారీ చేస్తామని న్యాయస్థానం పేర్కొంది. తదుపరి విచారణను జనవరి 5వ తేదీకి వాయిదా వేయడంతో, ఆ రోజున కోర్టు ఇచ్చే తీర్పుపై సర్వత్రా ఉత్కంఠ నెలకొంది. శ్రీవారి సొమ్ము అపహరణకు గురైన ఈ కేసులో దోషులు ఎంతటి వారైనా వదిలిపెట్టకూడదని భక్తులు కోరుకుంటున్నారు.

Share

• 
• 
• 
• 
• 
•