ఒకే ఇంజిన్.. రెండు బైక్స్.. బుల్లెట్ 650 vs క్లాసిక్ 650 డిఫరెన్స్ ఇవే!

Bullet 650 vs Classic 650 Differences: రాయల్ ఎన్‌ ఫీల్డ్ ఇటీవల బుల్లెట్ 650ను భారత మార్కెట్లో విడుదల చేసింది. ఈ బైక్ తో 650సీసీ శ్రేణిని మరింత విస్తరించింది. అయితే, ఈ కొత్త బైక్‌ ను చూసిన చాలా మంది క్లాసిక్ 650తో పోల్చుతున్నారు. ఎందుకంటే రెండు మోటార్‌ సైకిళ్లలో ఒకే ఇంజిన్, ఒకే ఛాసిస్, చాలా మెకానికల్ భాగాలు ఉపయోగించారు. అయినప్పటికీ డిజైన్, రైడింగ్ ఎక్స్ పీరియెన్స్, స్టైలింగ్ పరంగా కొన్ని తేడాలు ఉన్నాయి. ఇంతకీ రెండింటిలో తేడాలు ఏంటనేవి పరిశీలించి చూద్దాం..

బుల్లెట్ 650 vs క్లాసిక్ 650 డిజైన్

బుల్లెట్ 650 పూర్తిగా ట్రెడిషనల్ బుల్లెట్ స్టైల్‌ లో ఉంటుంది. ఇందులో స్క్వయర్ ఆకారంలో ఉండే వెనుక ఫెండర్, ప్రత్యేక 3D ట్యాంక్ బ్యాడ్జ్‌ లు, సింగిల్ పీస్ సీటు ఉన్నాయి. పాత బుల్లెట్ మోడళ్లలో కనిపించే చేతితో గీసిన పిన్‌ స్ట్రైప్ డిజైన్లు కూడా ఇందులో కొనసాగించారు. మొత్తం మీద ఈ బైక్ క్లాసిక్ రాయల్ ఎన్‌ఫీల్డ్ అభిమానులను ఆకట్టుకునేలా రూపొందించబడింది. మరోవైపు క్లాసిక్ 650 కొంత ప్రీమియం లుక్‌ తో వస్తుంది. దీనిలో రౌండ్ గా ఉండే వెనుక మడ్‌ గార్డ్, ఎక్కువ క్రోమ్ ఫినిషింగ్, స్ప్లిట్ సీట్ సెటప్ ఉన్నాయి. రైడర్ సీటు, పిలియన్ సీటు వేర్వేరుగా ఉండటం వల్ల మరింత ఆధునిక రెట్రో మోటార్‌ సైకిల్‌ లా కనిపిస్తుంది.

బుల్లెట్ 650 vs క్లాసిక్ 650 రైడింగ్ పొజిషన్‌

రైడింగ్ పొజిషన్‌ లో కూడా కాస్త తేడా ఉంది. బుల్లెట్ 650లో కొంచెం ఎత్తుగా, వెడల్పుగా ఉండే హ్యాండిల్‌ బార్‌ ను అమర్చారు. దీంతో రైడర్ మరింత నిటారుగా కూర్చునే అవకాశం ఉంటుంది. లాంగ్ రైడ్స్‌ లో కూడా ఇది మంచి సౌకర్యాన్ని అందిస్తుంది. సింగిల్ పీస్ సీటు కూడా అదనపు కంఫర్ట్‌ ను అందిస్తుంది. క్లాసిక్ 650లో హ్యాండిల్‌ బార్ కొద్దిగా తక్కువ ఎత్తులో ఉంటుంది. దీంతో రైడింగ్ పొజిషన్ కొంచెం డిఫరెంట్ గా అనిపిస్తుంది. ప్రీమియం ఫీల్, రెట్రో స్టైల్‌ ను ఇష్టపడే వారికి మరింత ఆకర్షణీయంగా ఉంటుంది.

బుల్లెట్ 650 vs క్లాసిక్ 650 కలర్ ఆప్షన్స్

రంగుల ఎంపికల్లో కూడా ఈ రెండు బైక్‌ లు వేర్వేరు విధానాన్ని అనుసరిస్తాయి. బుల్లెట్ 650 కేవలం కానన్ బ్లాక్, బ్యాటిల్‌ షిప్ బ్లూ అనే రెండు రంగుల్లో మాత్రమే అందుబాటులో ఉంది. ఈ రెండు రంగుల్లోనూ గోల్డ్ పిన్‌ స్ట్రైప్‌ లు ఉండటం ప్రత్యేక ఆకర్షణను కలిగి ఉంటుంది. క్లాసిక్ 650 మాత్రం వల్లం రెడ్, బ్రంటింగ్‌ థోర్ప్ బ్లూ, టీల్, బ్లాక్ క్రోమ్ లాంటి పలు రంగులలో లభిస్తుంది. ముఖ్యంగా బ్లాక్ క్రోమ్ వేరియంట్ ప్రీమియం లుక్‌ ను కోరుకునే వారికి బాగా నచ్చే అవకాశం ఉంది.

బుల్లెట్ 650 vs క్లాసిక్ 650 ధర

బుల్లెట్ 650 ఒకే వేరియంట్‌లో రూ.3.65 లక్షల ఎక్స్ షోరూమ్ ధరకు లభిస్తోంది. క్లాసిక్ 650లోని కొన్ని వేరియంట్లు కూడా ఇదే ధర నుంచి ప్రారంభమవుతాయి. అయితే టాప్ వేరియంట్ ధర రూ.3.79 లక్షల వరకు ఉంటుంది. మెకానికల్‌గా చూస్తే రెండు బైక్‌లలోనూ 648సీసీ ఎయిర్/ఆయిల్ కూల్డ్ ప్యారలల్ ట్విన్ ఇంజిన్‌ ను ఉపయోగించారు. ఇది 47 bhp పవర్, 52.3 Nm టార్క్‌ ను ఉత్పత్తి చేస్తుంది. 6 స్పీడ్ గేర్‌బాక్స్, స్లిప్ అసిస్ట్ క్లచ్, సస్పెన్షన్, బ్రేకింగ్ సిస్టమ్‌ లు కూడా రెండింటిలో ఒకే విధంగా ఉన్నాయి. పనితీరు పరంగా బుల్లెట్ 650, క్లాసిక్ 650 మధ్య పెద్దగా తేడా లేదు. సంప్రదాయ బుల్లెట్ స్టైల్ నచ్చితే బుల్లెట్ 650 తీసుకోవచ్చు. మరింత ప్రీమియం లుక్, ఎక్కువ కలర్ ఆప్షన్లు కావాలంటే క్లాసిక్ 650ను తీసుకోవడం మంచిది.