FSSAI Rules: ఏదైనా సూపర్ మార్కెట్ లేదా డిమార్ట్కి వెళ్లినప్పుడు మనందరి కళ్లూ డ్రమ్ములు, పెద్ద బిన్స్లో ఉంచే విడి సరుకులపైనే పడుతుంటాయి. బియ్యం, రకరకాల పప్పులు, గోధుమలు, బెల్లం, శనగలు వంటి సరుకులు మన కంటికి నేరుగా కనిపిస్తాయి కాబట్టి, నాణ్యతను చూసి నచ్చినంత పరిమాణంలో కవర్లలో నింపుకుని తూకం వేయించుకుంటాం. అయితే, ప్యాక్ చేసిన నూనె డబ్బాలు లేదా బిస్కెట్ ప్యాకెట్లపై స్పష్టంగా కనిపించే ఎక్స్పైరీ డేట్, ఈ విడి సరుకులకు ఉంటుందో లేదోనని చాలామందికి సందేహం వస్తుంటుంది.
ఒకవేళ గడువు ముగిసిన స్టాక్ కొంటే ఇంట్లో వాళ్ల ఆరోగ్యం ఏమవుతుందనే భయం కూడా సహజమే. అయితే ఈ విడి సరుకులకు కూడా కచ్చితంగా వాడాల్సిన గడువు తేదీలు ఉంటాయి. ఆహార భద్రత విషయంలో చట్టాలు ఏం చెప్తున్నాయో, వినియోగదారులుగా మనం ఎలా జాగ్రత్తపడాలో ఈ కథనం ద్వారా వివరంగా తెలుసుకుందాం.
సూపర్ మార్కెట్లలో విడిగా అమ్మే ప్రతీ ఆహార పదార్థానికి కచ్చితంగా బెస్ట్ బిఫోర్ లేదా ఎక్స్పైరీ డేట్ ఉంటుంది. ప్యాక్ చేసిన వస్తువులకే కాకుండా.. విడిగా డ్రమ్ముల్లో పోసి అమ్మే ధాన్యాలకు కూడా గడువు తేదీ వర్తిస్తుంది. గడువు దాటిన ఏ సరుకునైనా కస్టమర్లకు అమ్మడం చట్టపరంగా నేరం. మనం డ్రమ్ములో చూసే ప్రతి సరుకు వెనుక ఒక నిర్దిష్టమైన ప్యాకింగ్ తేదీ, ఆ బ్యాచ్కి సంబంధించిన గడువు వివరాలు ఉంటాయి. కాకపోతే అవి ప్యాకెట్ల మాదిరిగా మనకు వెంటనే కంటపడకపోవచ్చు.
డ్రమ్ముల్లో ఉండే సరుకుల వివరాలు తెలుసుకోవడం చాలా సులభం. ప్రతీ బిన్ లేదా డ్రమ్ ముందు భాగంలో ఉన్న ప్రైస్ ట్యాగ్పై లేదా డ్రమ్ వెనుక అంటించిన స్టిక్కర్పై ఆ సరుకు బ్యాచ్ నంబర్, ప్యాక్ చేసిన తేదీ, వాడాల్సిన గడువు వివరాలు ఉంటాయి. ఒకవేళ బోర్డుపై ఆ సమాచారం స్పష్టంగా కనిపించకపోతే, అక్కడ పనిచేసే సిబ్బందిని అడిగితే వారు ఆ సరుకుకు సంబంధించిన బ్యాచ్ లేబుల్ చూపిస్తారు. మీరు సరుకును కవర్లో వేసి బరువు తూచినప్పుడు, కవర్పై అంటించే ప్రైస్ స్టిక్కర్పై కూడా ప్యాకింగ్ తేదీ, ఎప్పుడు సరుకు వాడాలో రాసి ఉంటుంది.
Also Read: ప్యాకేజ్డ్ ఫుడ్స్పై ఇక హెచ్చరిక లేబుల్స్.. కీలక ప్రతిపాదన చేసిన FSSAI!
భారత ఆహార భద్రత, ప్రమాణాల ప్రాధికార సంస్థ నిబంధనల ప్రకారం సూపర్ మార్కెట్లలో విడివిడిగా సరుకులను అమ్మడానికి స్పష్టమైన అనుమతి ఉంది. కాకపోతే.. వ్యాపారులు కస్టమర్లకు కనిపించేలా కొన్ని వివరాలను తప్పనిసరిగా ప్రదర్శించాలి. ఆహారం పేరు, ప్యాకింగ్ లేదా లాట్ నంబర్, అలాగే ఏ తేదీ లోపు ఆ సరుకును ఉపయోగించాలో తెలిపే వివరాలను డిస్ప్లే చేయడం నిర్బంధం. ఈ నిబంధనలు పాటించకుండా విడి సరుకులు అమ్మితే సదరు స్టోర్పై చట్టపరమైన చర్యలు తీసుకునే అవకాశం ఉంది.
డిమార్ట్ వంటి పెద్ద స్టోర్లలో రోజూ వేల సంఖ్యలో ప్రజలు సరుకులు కొంటుంటారు. ఇక్కడ వ్యాపారం వేగంగా జరగడం వల్ల పాత స్టాక్ ఎక్కువ రోజులు డ్రమ్ముల్లో ఉండిపోయే అవకాశం దాదాపు ఉండదు. కొత్తగా వచ్చిన స్టాక్ను మాత్రమే ఎప్పటికప్పుడు డ్రమ్ముల్లో వేస్తుంటారు. దీనివల్ల వినియోగదారులకు ఎప్పుడూ తాజా సరుకులే అందుతుంటాయి. అయినప్పటికీ, మనం కొనేటప్పుడు ఒకసారి క్షుణ్ణంగా తనిఖీ చేసుకోవడం మంచి పద్ధతి.
సూపర్ మార్కెట్లో విడి సరుకులు కొనేటప్పుడు కొన్ని జాగ్రత్తలు పాటిస్తే మంచిది. బరువు తూచిన తర్వాత కవర్పై అంటించే స్టిక్కర్పై ఉన్న ప్యాకింగ్ తేదీ, ఎక్స్పైరీ తేదీని ఒకసారి చెక్ చేసుకోవాలి. సరుకు రంగు మారినా, తేమ ఉన్నట్లు అనిపించినా లేదా చిన్న పురుగులు ఉన్నట్లు అనుమానం వచ్చినా వెంటనే సిబ్బంది దృష్టికి తీసుకెళ్లాలి. తూకం వేసే చోట ఉన్న స్టిక్కర్పై సమాచారం సరిగ్గా ముద్రించబడిందో లేదో చూసుకోవడం వల్ల మనకు నాణ్యమైన సరుకులు లభిస్తాయి.
ఆహార భద్రత విషయంలో వినియోగదారులకు పూర్తి హక్కులు ఉన్నాయి. ఒకవేళ ఎవరైనా గడువు ముగిసిన సరుకులను విక్రయిస్తున్నట్లు గమనిస్తే.. కస్టమర్లు నేరుగా స్టోర్ మేనేజర్కు ఫిర్యాదు చేయవచ్చు. అంతేకాకుండా FSSAI అధికారులకు లేదా వినియోగదారుల ఫోరమ్లో కూడా ఆన్లైన్ ద్వారా ఫిర్యాదు చేసే అవకాశం ఉంది. సరైన అవగాహనతో సరుకులు కొనుగోలు చేస్తే మన డబ్బుతో పాటు కుటుంబ ఆరోగ్యాన్ని కూడా కాపాడుకోవచ్చు.
Also Read: AIతో పెరుగుతున్న సైబర్ మోసాలు.. మీ డబ్బు, వ్యక్తిగత సమాచారాన్ని కాపాడుకోండిలా!
Share
బిగ్ టీవీ వరుస కథనాలు.. రంగంలోకి దిగిన అధికారులు, దుర్గంచెరువు పరిశీలన
గేమింగ్ పీక్స్ చూపిస్తాయ్.. రూ.1.5 లక్షలలోపు బెస్ట్ లాప్టాప్స్ ఇవే భయ్యా!
