Madanapalle: దారుణం.. మదనపల్లి జిల్లాలో ఆసుపత్రి నిర్లక్ష్యానికి నిరుపేద మహిళ బలి..

Madanapalle: మదనపల్లి జిల్లా ఆసుపత్రిలో వైద్యం కోసం వచ్చిన ఓ మహిళ ఆసుపత్రి ఆవరణలోనే ప్రాణాలు విడిచిన ఘటన స్థానికంగా కలకలం రేపుతోంది. తంబళ్లపల్లి మండలం బలకవారిపల్లికి చెందిన మల్లమ్మ అనే మహిళ అనారోగ్యంతో శుక్రవారం ఆసుపత్రికి వచ్చింది. ప్రాథమిక చికిత్స పొందిన ఆమెకు చేతికి క్యాన్ల వేసి ఉన్నప్పటికీ, ఆసుపత్రి లోపల తగిన వసతి లేదా అనుమతి లభించకపోవడంతో రాత్రంతా బయట స్లాబ్ కిందనే గడపాల్సి వచ్చింది. తీవ్రమైన చలిని తట్టుకోలేక ఆమె అక్కడికక్కడే కన్నుమూసింది.

ఈ ఘటనపై బాధితురాలి బంధువులు, స్థానికులు తీవ్ర ఆగ్రహం వ్యక్తం చేస్తున్నారు. ఆసుపత్రి సిబ్బంది నిర్లక్ష్యం వల్లే ఈ మరణం సంభవించిందని ఆరోపణలు వస్తున్నాయి. సాధారణంగా రోగులకు వార్డుల్లో చోటు కల్పించాల్సి ఉండగా, కొందరు సిబ్బంది తమ ఇష్టానుసారంగా వ్యవహరిస్తూ రోగులను బయటకు పంపిస్తున్నారనే విమర్శలు వెల్లువెత్తుతున్నాయి. చేతికి చికిత్స అందుతున్న ఆనవాళ్లు ఉన్నప్పటికీ, ఒక నిస్సహాయురాలిని చలిలో వదిలేయడం వెనుక అధికారుల పర్యవేక్షణ లోపం స్పష్టంగా కనిపిస్తోంది.

ఉదయం పూట మృతదేహాన్ని గుర్తించిన సిబ్బంది, హుటాహుటిన ఆమెను అత్యవసర విభాగానికి తరలించి కేవలం మృతి చెందినట్లు ధృవీకరించడంపై విమర్శలు వస్తున్నాయి. రాత్రంతా ఆమె పరిస్థితిని ఎవరూ గమనించకపోవడం ఆసుపత్రి భద్రతా సిబ్బంది, రాత్రి డ్యూటీలో ఉన్న వైద్యుల పనితీరుపై సందేహాలను రేకెత్తిస్తోంది. ప్రభుత్వ ఆసుపత్రులు పేదల కోసం పని చేయాల్సి ఉండగా, ఇలాంటి ఘటనలు సామాన్యులకు వైద్యంపై భయం కలిగించేలా ఉన్నాయని పలువురు ఆవేదన వ్యక్తం చేస్తున్నారు.

Also Read: గేమ్స్ మాయలో పడి నిండు ప్రాణం బలి.. నా చావుకు నేనే కారణం అంటూ సెల్ఫీ వీడియో రికార్డ్!

ఈ పాపం ఎవరిది అనే ప్రశ్న ఇప్పుడు అందరినీ వేధిస్తోంది. కేవలం ప్రకృతి వైపరీత్యం (చలి) అని సరిపెట్టుకోకుండా, బాధ్యులైన అధికారులపై కఠిన చర్యలు తీసుకోవాలని డిమాండ్లు వినిపిస్తున్నాయి. భవిష్యత్తులో ఇలాంటి హృదయ విదారక ఘటనలు పునరావృతం కాకుండా చూడాల్సిన బాధ్యత ప్రభుత్వంపై ఉంది. ఒక ప్రాణం గాలిలో కలిసిపోవడానికి కారణమైన వ్యవస్థీకృత నిర్లక్ష్యంపై లోతైన విచారణ జరిపి బాధితురాలి కుటుంబానికి న్యాయం చేయాలని కోరుతున్నారు.