Karthika Masam 2025: కార్తీక మాసంలో.. తప్పకుండా పాటించాల్సిన నియమాలు ఇవే !

Karthika Masam 2025: సనాతన ధర్మంలో అత్యంత పవిత్రమైన మాసాలలో కార్తీక మాసం ఒకటి. శివుడు, విష్ణువులకు అత్యంత ప్రీతిపాత్రమైన ఈ మాసం 2025 సంవత్సరంలో అక్టోబర్ 8న ప్రారంభమై నవంబర్ 5 వరకు కొనసాగుతుంది. ఈ మాసంలో పాటించే నియమాలు అపారమైన పుణ్యఫలాన్ని, ఆరోగ్య ప్రయోజనాలను అందిస్తాయని ప్రతీతి. ఇంతకీ కార్తీక మాసంలో ఎలాంటి నియమాలు పాటించాలనే విషయాలను గురించిన పూర్తి నియమాలను ఇప్పుడు తెలుసుకుందాం.

కార్తీక మాసం.. నియమాలు:

1. పవిత్ర స్నానం (నదీ స్నానం):
కార్తీక మాసంలో పాటించాల్సిన ముఖ్య నియమాలలో మొదటిది నదీ స్నానం.

నియమం: సూర్యోదయానికి ముందే నదిలోగానీ, చెరువులోగానీ లేదా కనీసం ఇంట్లోని నదీ నీటిలోగానీ తలస్నానం చేయాలి. దీనినే ‘కార్తీక స్నానం’ అంటారు.

ప్రాముఖ్యత: ఈ స్నానం శారీరక, మానసిక శుద్ధిని ఇస్తుంది. నదీ స్నానం సాధ్యం కానివారు, స్నానం చేసే నీటిలో కొద్దిగా గంగాజలం లేదా తులసి దళాలను వేసుకోవచ్చు.

2. దీపారాధన:
కార్తీక మాసంలో దీపారాధనకు విశేష ప్రాధాన్యం ఉంది.

ఆచారం: ఉదయం, సాయంత్రం ఇంట్లో, దేవాలయంలో.. ప్రత్యేకించి తులసి కోట వద్ద, రావిచెట్టు కింద, నదీ తీరాన దీపాలు వెలిగించడం చాలా శుభప్రదం.

నియమం: సాయంత్రం వేళ ఆలయాల్లో లేదా తులసి కోట వద్ద ఆకాశ దీపం పెట్టడం (ఎత్తుగా దీపం పెట్టడం) చాలా శ్రేయస్కరం. దీపానికి ఆవు నెయ్యి లేదా నువ్వుల నూనె వాడాలి.

3. పూజలు, వ్రతాలు:
ఈ మాసంలో శివ కేశవులను పూజించడం అత్యంత పవిత్రమైనది.

శివారాధన: సోమవారాలు (కార్తీక సోమవారాలు) శివాలయాన్ని సందర్శించి, శివునికి రుద్రాభిషేకం, బిల్వ పత్రాలతో పూజ చేయడం ఉత్తమం. శివలింగానికి పాలతో అభిషేకం చేయడం విశేష ఫలాన్ని ఇస్తుంది.

విష్ణు ఆరాధన: పౌర్ణమి, ఏకాదశి వంటి రోజుల్లో విష్ణుమూర్తిని తులసి దళాలతో పూజించాలి. క్షీరాబ్ది ద్వాదశి (బృందావన ద్వాదశి) రోజున ఉసిరి కొమ్మ, తులసిని కలిపి పూజించడం ప్రధాన ఆచారం.

నియమం: కార్తీక పురాణం లేదా స్కంద పురాణంలోని కార్తీక మాస మహాత్మ్యాన్ని ప్రతిరోజూ పఠించడం లేదా వినడం తప్పనిసరి.

Also Read: కార్తీక మాసం, ఏ రోజు నుంచి ప్రారంభం ? పూర్తి వివరాలివిగో..

4. ఉపవాసం, ఆహార నియమాలు:
శారీరక, ఆధ్యాత్మిక నియంత్రణ కోసం ఉపవాసాలు పాటించడం ముఖ్యం.

నియమం: కనీసం సోమవారాలు, ఏకాదశి రోజుల్లో ఉపవాసం ఉండాలి. ఉపవాసం అంటే పగటిపూట నిరాహారంగా ఉండి, సాయంత్రం దీపారాధన అనంతరం ఉప్పు లేని సాత్విక ఆహారం (పాలు, పండ్లు) మాత్రమే తీసుకోవాలి.

వర్జ్యం: ఈ మాసంలో ఉసిరికాయ ప్ప వేరే ఏ కూరగాయలను, వంకాయ వంటి దుంపలను తినకూడదని కొందరు నియమం పాటిస్తారు. మాంసాహారం అస్సలు తినకూడదు.

5. దాన ధర్మాలు:
కార్తీక మాసంలో చేసే దానధర్మాలు అనేక రెట్లు పుణ్యాన్నిస్తాయి.

ఆచారం: పేదవారికి వస్త్రదానం, అన్నదానం చేయాలి. ముఖ్యంగా ఉసిరి కాయలు, దీపపు కుందులు, వత్తులు, నూనె లేదా నెయ్యి దానం చేయడం అత్యంత శ్రేయస్కరం.

ఈ నియమాలను పాటించడం ద్వారా.. భక్తులు ఇహపర సౌఖ్యాలను పొందుతారని, ఆరోగ్యం, ఐశ్వర్యం లభిస్తాయని హిందూ ధర్మం చెబుతోంది. వీలైనంత మేరకు భక్తి శ్రద్ధలతో ఈ నియమాలను పాటించి కార్తీక మాసం విశిష్టతను పొందవచ్చు.