Sri Ram Navami: శ్రీ రామనవమి రోజున ఏం చేయాలి?

Sri Ram Navami: రా..మ.. అంటే కేవలం రెండు అక్షరాలు కాదు.. అదో మహాశక్తి మంత్రం. శ్రీ మహా విష్ణువు త్రేతాయుగంలో ధర్మస్థాపన కోసం శ్రీరాముడిగా అవతరించిన దినమే చైత్ర శుక్లపక్ష నవమి శ్రీరామ నవమి.

శ్రీరామ నవమి రోజున ప్రతిఒక్కరూ సూర్యోదయానికి ముందే నిద్ర లేచి తలస్నానం ఆచరించాలి . ఇంటిని మామిడి తోరణాలతో అలంకరించాలి. నూతన వస్త్రాలు ధరించాలి. ఇంట్లో, కుదరనిపక్షంలో దేవాలయాల్లో శ్రీరాముడు, సీతాదేవి,హనుమంతుడు, లక్ష్మణుడి విగ్రహాలను ప్రతిష్టచేయాలి. ధ్యాన ఆవాహనాధి షోడశోపచారాలతో శ్రీరామచంద్రుడిని పూజించాలి.

ఈ పూజలో శ్రీ సీతారాముడిని అష్టోత్తర శతనామావళితో అర్చించాలి. ఇలా పూజించి రామచంద్రమూర్తికి ఇష్టమైన వడపప్పు, పానకాన్ని నైవేద్యంగా పెట్టి పూజ అనంతరం దాన్ని భక్తి శ్రద్ధలతో స్వీకరించాలి. ఈ రోజు ఉపవాసం, జాగరణ చేయడం వల్ల విష్ణులోక ప్రాప్తి కలుగుతుంది. శ్రీరామనవమి రోజున రామనామస్మరణం చేయడం, రామకోటి వంటివి రాయడంవల్ల అత్యంత పుణ్యఫలం కలుగుతుందని పురాణాలు తెలుపుతున్నాయి.

శ్రీరామనవమి రోజు ఏ వ్రతం చేసినా ఫలించదని, కేవలం శ్రీరామవ్రతం మాత్రమే ఫలిస్తుందని, ఈ వ్రతానికి మించినది లేదని పెద్దల మాట. ఈరోజు రామనామస్మరణ చేయడం, రామనామ ధ్యానం చేయడం వల్ల పాపాలు తొలగి, జయాలు సిద్ధిస్తాయి.

Share

• 
• 
• 
• 
• 
•