Black colour: అయ్యప్ప దీక్షలో శుభం.. పెళ్లిలో అశుభం, నలుపు రంగు వెనుక ఉన్న అసలు కథేంటి ?

Black colour: హిందూ సంప్రదాయంలోనూ.. భారతీయ జీవనశైలిలోనూ ‘రంగుల’కు చాలా ప్రాముఖ్యత ఉంది. తెలుపు, పసుపు, కుంకుమ రంగులను శుభప్రదంగా భావిస్తే.. నలుపు రంగును మాత్రం చాలా సందర్భాల్లో అశుభంగా చూస్తుంటారు. పూజలు, పెళ్లిళ్లు, గృహప్రవేశం వంటి శుభకార్యాల్లో నలుపు రంగు దుస్తులు ధరించకూడదని పెద్దలు చెబుతుంటారు. అసలు నలుపు రంగును అశుభం అని ఎందుకు అంటారు? దీని వెనక ఉన్న కారణాల గురించి ఇప్పుడు తెలుసుకుందాం.

1. జ్యోతిష్య శాస్త్ర కారణాలు:
జ్యోతిష్య శాస్త్రం ప్రకారం, నలుపు రంగు శని దేవునికి సంకేతం. శని గ్రహం మందగమనానికి, కష్టాలకు, క్రమశిక్షణకు, శ్రమకు ప్రతీక. శుభకార్యాలు అంటే సంతోషం, ఉత్సాహం, కొత్త ప్రారంభానికి సంబంధించినవి. శని దేవుని ప్రభావం ఉంటే ఆ పనుల్లో ఆటంకాలు కలుగుతాయని లేదా నిదానంగా జరుగుతాయని భయపడి, శుభకార్యాల్లో నలుపును నివారిస్తారు.

2. శక్తిని గ్రహించే గుణం :
సైన్స్ ప్రకారం.. నలుపు రంగు తనపై పడిన అన్ని రంగులను, కాంతిని తనలో విలీనం చేసుకుంటుంది (పీల్చుకుంటుంది). ఆధ్యాత్మిక పరంగా చూస్తే, నలుపు రంగు సానుకూల, ప్రతికూల శక్తులను రెండింటినీ త్వరగా ఆకర్షిస్తుంది. శుభకార్యాల్లో అందరూ ఒకే చోట ఉంటారు. అక్కడ రకరకాల ఆలోచనలు కలిగిన వారు ఉంటారు. అలాంటి సమయంలో నలుపు రంగు దుస్తులు ధరిస్తే ఇతరుల ప్రతికూల శక్తులను లేదా దిష్టిని త్వరగా ఆకర్షిస్తుందని ఒక నమ్మకం.

3. శూన్యానికి, మరణానికి సంకేతం :
సాధారణంగా నలుపు రంగును చీకటికి, అజ్ఞానానికి, శూన్యానికి ప్రతీకగా భావిస్తారు. కాంతి లేని స్థితిని నలుపుగా చూస్తాం. ప్రపంచవ్యాప్తంగా చాలా సంస్కృతులలో మరణాన్ని లేదా సంతాపం వ్యక్తం చేయడానికి నలుపు రంగును ఉపయోగిస్తారు. అందుకే జీవితం మలుపు తిరిగే పెళ్లి వంటి వేడుకల్లో మరణానికి లేదా దుఃఖానికి సంకేతమైన నలుపును వాడటం సరికాదని భావిస్తారు.

4. దిష్టి తగలకుండా (దిష్టి చుక్క) :
నలుపు రంగు అశుభం అయితే మరి చిన్న పిల్లలకు నల్లటి దిష్టి చుక్క ఎందుకు పెడతారు ? అనే సందేహం రావచ్చు. ఇక్కడే నలుపు రంగులోని మరో కోణం కనిపిస్తుంది. నలుపు రంగు దృష్టిని తన వైపు తిప్పుకుంటుంది. ఎవరైనా ఒక వ్యక్తిని చూడగానే వారి దృష్టి మొదట ఆ నల్లటి చుక్కపై పడుతుంది. తద్వారా ఆ వ్యక్తిపై పడే చెడు చూపు ప్రభావం తగ్గుతుందని నమ్ముతారు. అంటే ఇది ‘రక్షణ’ కోసం వాడే రంగు, కానీ ‘వేడుక’ కోసం కాదు.

ఆధునిక మార్పులు
కాలక్రమేణా నలుపు రంగు పట్ల ఉన్న అభిప్రాయాలు మారుతున్నాయి. నేటి యువత ఫంక్షన్లలో ‘బ్లాక్ థీమ్’ పార్టీలు చేసుకోవడం చూస్తున్నాం. అలాగే, శాక్తేయ సంప్రదాయంలో కాళికా దేవిని నలుపు రంగులోనే ఆరాధిస్తారు. అయ్యప్ప స్వామి దీక్షలో నలుపు రంగు దుస్తులే ధరిస్తారు. ఇక్కడ నలుపు రంగు అహంకారాన్ని చంపుకోవడానికి, లౌకిక సుఖాలకు దూరంగా ఉండటానికి సంకేతంగా కనిపిస్తుంది.