Comedian Seshu Passed Away: కోలీవుడ్ ఇండస్ట్రీలో తీవ్ర విషాదం చోటుచేసుకుంది. ప్రముఖ హాస్య నటుడు శేషు మృతి చెందారు. ఆయన వయస్సు 60. కొన్నిరోజుల క్రితం ఆయనకు గుండెపోటు రావడంతో చెన్నై హాస్పిటల్ కు తరలించారు. అప్పటినుంచి చికిత్స తీసుకుంటున్న శేషు.. నేడు(మంగళవారం) మృతిచెందినట్లు వైద్యులు తెలిపారు. దీంతో కోలీవుడ్ లో విషాద ఛాయలు అలముకున్నాయి. శేషు పూర్తి పేరు లక్ష్మీ నారాయణన్ శేషు. లొల్లు సభ అనే కామెడీ షో ద్వారా గుర్తింపు తెచ్చుకోవడంతో ఆయనను లొల్లు సభ శేషు అని కూడా పిలుస్తారు.
ఇక ఈ షో తరువాత ధనుష్ నటించిన తుళ్లువదో ఇళమై చిత్రంతో సినిమాల్లోకి ఎంట్రీ ఇచ్చాడు. ఈ సినిమా మంచి విజయం అందుకోవడంతో ఆయనకు వరుస అవకాశాలు తలుపుతట్టాయి. తమిళ్ లో 30కి పైగా చిత్రాల్లో నటించాడు. ముఖ్యంగా నటుడు సంతానంతో గొప్ప స్నేహం ఉంది. అందుకే ఆయన నటించిన ప్రతి సినిమాలో శేషు ఉంటాడు. ఇక ఈ మధ్య సంతానం హీరోగా నటించిన వడక్కుపట్టి రామసామి లో కూడా శేషు నటించి మెప్పించాడు. అదే ఆయన చివరి చిత్రం. ఇక శేషు మరణ వార్త విన్న ప్రముఖులు ఆయనకు సంతాపం తెలుపుతున్నారు. ఇక ఆయనకు ముగ్గురు కొడుకులు. రేపు ఉదయం చెన్నెలో శేషు అంత్యక్రియలు జరగనున్నట్లు కుటుంబ సభ్యులు తెలిపారు.