H1b Visas: H–1B వీసాలపై టెక్సాస్ గవర్నర్ గ్రెగ్ అబాట్ కీలక నిర్ణయం

H1b Visas: టెక్సాస్ గవర్నర్ గ్రెగ్ అబాట్ తన రాష్ట్రంలోని అన్ని ప్రభుత్వ సంస్థలు, పబ్లిక్ యూనివర్సిటీలకు కీలక ఆదేశాలు జారీ చేశారు. దీని ప్రకారం, కొత్తగా H-1B వీసాల కోసం దరఖాస్తులు (Petitions) సమర్పించడాన్ని తక్షణమే నిలిపివేయాలి. ఈ నిషేధం 2027, మే 31వ తేదీ వరకు అంటే టెక్సాస్ తదుపరి శాసనసభ సమావేశాలు ముగిసే వరకు అమల్లో ఉంటుంది. పన్ను చెల్లింపుదారుల సొమ్ముతో నడిచే ప్రభుత్వ సంస్థల్లో విదేశీయుల కంటే స్థానిక అమెరికన్లకే ప్రాధాన్యత ఇవ్వాలనేది ఆయన ప్రధాన ఉద్దేశ్యం.

ఎవరిపై ఈ ప్రభావం ఉంటుంది?
ఈ నిర్ణయం ప్రధానంగా టెక్సాస్ రాష్ట్ర ప్రభుత్వ విభాగాలకు, పబ్లిక్ యూనివర్సిటీలకు మాత్రమే వర్తిస్తుంది. అంటే టెక్సాస్ ఏ అండ్ ఎం (Texas A&M), యూనివర్సిటీ ఆఫ్ టెక్సాస్ (UT) వంటి పెద్ద విద్యా సంస్థల్లో ఇకపై కొత్తగా H-1B వీసాలపై ప్రొఫెసర్లు లేదా పరిశోధకులను నియమించుకోవడం కష్టమవుతుంది. అయితే, ఈ ఆదేశాలు ప్రైవేట్ కంపెనీలకు వర్తించవు. గూగుల్, మెటా లేదా కాగ్నిజెంట్ వంటి ప్రైవేట్ సంస్థలు యధావిధిగా H-1B నిపుణులను నియమించుకోవచ్చు.

గవర్నర్ కేవలం నిషేధమే కాకుండా, ప్రస్తుతం పని చేస్తున్న వారి వివరాలపై కూడా నివేదిక కోరారు. మార్చి 27, 2026 లోపు అన్ని ప్రభుత్వ సంస్థలు తమ దగ్గర ఎంతమంది H-1B ఉద్యోగులు ఉన్నారు, వారి దేశం ఏమిటి, వారి జీతాలు ఎంత అనే వివరాలను టెక్సాస్ వర్క్‌ఫోర్స్ కమిషన్ (TWC) కి సమర్పించాలి. విదేశీయులను నియమించుకోవడానికి ముందు స్థానిక అమెరికన్లను తీసుకోవడానికి ఎలాంటి ప్రయత్నాలు చేశారో కూడా సాక్ష్యాలతో సహా నిరూపించాల్సి ఉంటుంది.

ఫెడరల్ నిబంధనలతో అనుసంధానం
డొనాల్డ్ ట్రంప్ నాయకత్వంలోని ఫెడరల్ ప్రభుత్వం కూడా H-1B నిబంధనలను కఠినతరం చేస్తోంది. ఇటీవల కొత్త H-1B దరఖాస్తులపై $100,000 ఫీజు విధించడం, లాటరీ విధానం కాకుండా అత్యధిక వేతనం ఉన్నవారికే వీసాలు ఇచ్చేలా మార్పులు చేయడం వంటి నిర్ణయాలు తీసుకున్నారు. అబాట్ నిర్ణయం కూడా ఈ ఫెడరల్ విధానాలకు అనుగుణంగానే ఉందని విశ్లేషకులు భావిస్తున్నారు. విదేశీయులు తక్కువ వేతనాలకే పని చేస్తూ స్థానికుల అవకాశాలను దెబ్బతీస్తున్నారని గవర్నర్ ఆరోపిస్తున్నారు.

Also Read: కనిపెంచినందుకు కానుక ఇదేనా..? ఒకేసారి పోలీస్ స్టేషన్ మెట్లెక్కిన 35 మంది వృద్ధులు!

నిపుణుల ఆందోళన.., భవిష్యత్తు..
ఈ నిర్ణయం వల్ల టెక్సాస్‌లోని పరిశోధన రంగం, విద్యావ్యవస్థపై ప్రభావం పడవచ్చని నిపుణులు ఆందోళన వ్యక్తం చేస్తున్నారు. ముఖ్యంగా STEM (సైన్స్, టెక్నాలజీ, ఇంజనీరింగ్, మ్యాథ్స్) రంగాల్లో ప్రతిభావంతులైన విదేశీ నిపుణులు రాకపోతే రాష్ట్ర ఆర్థిక వ్యవస్థ దెబ్బతినే అవకాశం ఉందని వారు హెచ్చరిస్తున్నారు. ఏదేమైనా, ఒకవేళ ఏదైనా అత్యవసర పరిస్థితుల్లో విదేశీ నిపుణుడు కచ్చితంగా కావాలనుకుంటే, టెక్సాస్ వర్క్‌ఫోర్స్ కమిషన్ నుండి లిఖితపూర్వక అనుమతి తీసుకుంటేనే మినహాయింపు లభిస్తుంది.

H–1B వీసాలపై టెక్సాస్ గవర్నర్ గ్రెగ్ అబాట్ కీలక నిర్ణయం

టెక్సాస్ రాష్ట్రవ్యాప్తంగా ప్రభుత్వ సంస్థలు, విశ్వవిద్యాలయాల H-1B వీసాలు తక్షణమే నిలిపివేయాలని ఆదేశాలు

2027, మే 31వ తేదీ వరకు ఈ నిబంధనలు అమల్లో ఉంటాయని వెల్లడి

అమెరికన్ ఉద్యోగాలు అమెరికా కార్మికులకే చెందాలనే ఉద్దేశంతో ఈ… pic.twitter.com/XzVDpef05V

— BIG TV Breaking News (@bigtvtelugu) January 28, 2026

Share

• 
• 
• 
• 
• 
•