హర్మూజ్ దిగ్బంధం జరిగితే పెట్రోల్ ధరలు ఊహకు అందవు.. ఇరాన్ ‘మాథ్స్’ హెచ్చరిక

Ghalibaf math equation Hormuz blockade: అగ్రరాజ్యం అమెరికా, ఇరాన్ మధ్య నెలకొన్న ఉద్రిక్తతలు ఇప్పుడు సరికొత్త మలుపు తిరిగాయి. ఇరాన్ రేవులకు వెళ్లే నౌకలపై అమెరికా సైన్యం నౌకాదళ దిగ్బంధాన్ని విధిస్తున్నట్లు ప్రకటించిన సంగ‌తి తెలిసిందే. ఈ నేపథ్యంలో, ఇరాన్ పార్లమెంట్ స్పీకర్ మొహమ్మద్ బాఘేర్ ఘాలిబాఫ్ అంతర్జాతీయ చమురు మార్కెట్లపై పడబోయే ప్రభావం గురించి ఒక వినూత్నమైన “గణిత హెచ్చరిక” జారీ చేశారు. ఎక్స్ (X) వేదికగా ఆయన షేర్ చేసిన f(f(O)) > f(O) అనే సమీకరణం ఇప్పుడు చర్చనీయాంశమైంది.

ఈ సమీకరణం ద్వారా హర్మూజ్ జలసంధి వద్ద సరఫరాలో స్వల్ప అంతరాయం కలిగినా, అది చమురు ధరలలో సాధారణ పెరుగుదల కాకుండా, ఒకదానితో ఒకటి ముడిపడి ఉన్న శృంఖల చర్యలావిపరీతమైన పెరుగుదలకు దారితీస్తుందని ఘాలిబాఫ్ హెచ్చరించారు. అంటే సరఫరాలో ఏర్పడే ఒక చిన్న లోపం, మార్కెట్లలో భయాందోళనలను కలిగించి ధరలను ఊహించని రీతిలో పెంచుతుందని దీని అర్థం. వైట్ హౌస్ సమీపంలోని పెట్రోల్ ధరల ఫోటోను షేర్ చేస్తూ, అమెరికన్లు త్వరలోనే ప్రస్తుత ధరలను చూసి పాత రోజులను తలచుకుంటూ బాధపడతారని ఆయన ఎద్దేవా చేశారు.

మ‌రోవైపు అమెరికా సెంట్రల్ కమాండ్ తన ఆదేశాలను సోమవారం సాయంత్రం నుండే అమలు చేయడం ప్రారంభించింది. అరేబియా గల్ఫ్, గల్ఫ్ ఆఫ్ ఒమన్ మీదుగా ఇరాన్ తీర ప్రాంతాలకు వెళ్లే నౌకలే లక్ష్యంగా ఈ దిగ్బంధం కొనసాగుతోంది. అయితే, ఇరానేతర ప్రాంతాలకు వెళ్లే వాణిజ్య నౌకలకు హర్మూజ్ జలసంధి గుండా వెళ్లే అనుమతి ఉంటుందని అమెరికా స్పష్టం చేసినప్పటికీ, యుద్ధ వాతావరణం కారణంగా వాణిజ్య నౌకలు అప్రమత్తంగా ఉండాలని సూచించింది. ఈ పరిణామాల నేపథ్యంలో అంతర్జాతీయ మార్కెట్‌లో వెస్ట్ టెక్సాస్ ఇంటర్మీడియట్ (WTI) క్రూడ్ ధర బ్యారెల్‌కు 104 డాలర్లు, బ్రెంట్ క్రూడ్ 102 డాలర్లు దాటడం ప్రపంచ ఆర్థిక వ్యవస్థలో కలవరం సృష్టిస్తోంది.

భారత్ పరిస్థితి ఏమిటి?హర్మూజ్ జలసంధి దిగ్బంధం జరిగితే అత్యంత తీవ్రంగా ప్రభావితమయ్యే దేశాల్లో భారత్ ఒకటి. మన దేశం తన చమురు అవసరాల కోసం గల్ఫ్ దేశాలపై అధికంగా ఆధారపడుతుంది. అయితే, అమెరికా తన దిగ్బంధంలో భాగంగా ఇరాన్ రేవులకు వెళ్లే లేదా అక్కడి నుండి వచ్చే నౌకలను మాత్రమే లక్ష్యంగా చేసుకుంటామని చెబుతోంది. కానీ యుద్ధ వాతావరణం నెలకొంటే, బీమా కంపెనీలు నౌకలకు ఇన్సూరెన్స్ రేట్లు పెంచడం వల్ల భారత్‌కు వచ్చే చమురు రవాణా ఖర్చు కూడా పెరుగుతుంది. ఇది దేశీయంగా పెట్రోల్, డీజిల్ ధరల పెరుగుదలకు దారితీసి ద్రవ్యోల్బణాన్ని పెంచుతుంది.

Enjoy the current pump figures. With the so-called 'blockade', Soon you'll be nostalgic for $4–$5 gas.

ΔO_BSOH>0 ⇒ f(f(O))>f(O) pic.twitter.com/rVxlC6vFWG

— محمدباقر قالیباف | MB Ghalibaf (@mb_ghalibaf) April 12, 2026