Digital Marketing Courses : డిజిటల్ కోర్సులు.. అవకాశాలెన్నో..!

Digital Marketing Courses : ఒకప్పుడు మార్కెటింగ్ జాబ్ అంటే టై కట్టుకుని టిప్‌టాప్‌గా తయారై సేల్స్ చేయాల్సిన పరిస్థితి. కానీ ఇప్పుటి స్మార్ట్ యుగంలో ఏ ఉద్యోగం చేసినా స్మార్ట్‌గానే చేస్తున్నారు.ముఖ్యంగా 5G వచ్చాక ప్రతి వ్యాపారం డిజిటల్‌ వైపు మొగ్గు చూపుతోంది. దీంతో డిజిటల్ మార్కెటింగ్ కోర్సులు నేర్చుకున్న యువత.. నేడు రూ.లక్షల్లో జీతాలు పొందుతున్నారు. మరి మీరూ అవుతారా డిజిటల్ మార్కెటింగ్ నిపుణులు?

గూగుల్‌లో ఉచిత కోర్సులు..
డిజిటల్ మార్కెటింగ్ నిపుణులు కావాలంటే.. సెర్చ్ ఇంజిన్ ఆప్టిమైజేషన్ (SEO), సోషల్ మీడియా, వెబ్‌సైట్ ట్రాఫిక్ విశ్లేషణ వంటి కోర్సులు నేర్చుకోవాలి. ఈ కోర్సులను గూగుల్ తన లెర్నింగ్ పోర్టల్‌లోని ఆన్‌లైన్ కోర్సుల్లో నమోదు చేసుకున్న వారు కోర్సు ట్యుటోరియల్స్, ఆన్‌లైన్ క్లాస్‌లకు ఉచితంగా యాక్సెస్ పొందవచ్చు. ఈ కోర్సులు చేయడానికి పట్టే గరిష్ఠ సమయం 1-40 గంటలే.

ఇంటర్ ఉంటే చాలు..
ఈ కోర్సులను పూర్తిగా నేర్చుకునేందుకు మూడేళ్ల యూజీ.. రెండేళ్ల పీజీ కోర్సులు కూడా ఉన్నాయి. యూజీ, పీజీ కోర్సులను IIM, అహ్మదాబాద్, బెంగళూరు, లక్నో, NIFT కోల్‌కతా, ISB హైదరాబాద్, AIMA న్యూఢిల్లీ వంటి సంస్థలు అందిస్తున్నాయి. ఈ డిజిటల్ మార్కెటింగ్ కోర్సులు చేసేందుకు కనీస అర్హత ఇంటర్ ఉంటే చాలు. ఇందులో 3-6 నెలల సర్టిఫికేట్ కోర్సులు కూడా అందుబాటులో ఉన్నాయి.