Emergency Chocolate Cake Recipe: మనలో చాలామందికి అర్ధరాత్రి పూట లేదా అనుకోకుండా ఏదైనా తీపి తినాలనిపిస్తుంటుంది. ఇంట్లో పిల్లలు అడిగినప్పుడో, లేదా సడెన్గా ఇంటికి చుట్టాలు వచ్చినప్పుడో బయట నుంచి కేక్ ఆర్డర్ చేయాలంటే సమయం పడుతుంది. అలాంటప్పుడు ఇంట్లో ఉండే సాధారణ వస్తువులతోనే కేవలం పది నిమిషాల్లో అదిరిపోయే చాక్లెట్ కేక్ తయారు చేసుకోవచ్చు. దీనికి ఓవెన్, బీటర్ లేదా గుడ్లు కూడా అవసరం లేదు. కప్పు కొలతలతో ఎంతో సులభంగా, మెత్తగా, నోట్లో వేసుకోగానే కరిగిపోయే ఈ ఎమర్జెన్సీ చాక్లెట్ కేక్ ఎలా చేయాలో ఇప్పుడు వివరంగా తెలుసుకుందాం.
మైదా పిండి – ఒక కప్పు
చక్కెర పొడి – అర కప్పు
కోకో పౌడర్ – పావు కప్పు
బేకింగ్ పౌడర్ – ఒక టీస్పూన్
బేకింగ్ సోడా – పావు టీస్పూన్
వంట నూనె లేదా కరిగించిన వెన్న – పావు కప్పు
పాలు – ముప్పావు కప్పు
వెనిలా ఎసెన్స్ – అర టీస్పూన్
నిమ్మరసం లేదా వెనిగర్ – ఒక టీస్పూన్
ఉప్పు – చిటికెడు
Also Read: ఓవెన్ అక్కర్లేదు.. బెల్లం, రాగి పిండి ఉంటే చాలు.. కడాయిలోనే టేస్టీ బిస్కెట్లు రెడీ!
ఒక వెడల్పాటి గిన్నె తీసుకుని అందులో జల్లెడ పెట్టి మైదా పిండి, చక్కెర పొడి, కోకో పౌడర్, బేకింగ్ పౌడర్, బేకింగ్ సోడా, చిటికెడు ఉప్పు వేసి ఉండలు లేకుండా బాగా జల్లించుకోవాలి. ఇలా జల్లించడం వల్ల కేక్ చాలా మృదువుగా వస్తుంది. ఇప్పుడు ఈ పొడి మిశ్రమంలో వంట నూనె, వెనిలా ఎసెన్స్ మరియు కాచి చల్లార్చిన పాలను కొద్దికొద్దిగా పోస్తూ ఒకే డైరెక్షన్లో కలపాలి. పిండి మరీ గట్టిగా కాకుండా, అలాగని మరీ పలుచగా కాకుండా రిబ్బన్ కన్సిస్టెన్సీ వచ్చేలా కలుపుకోవాలి. చివరగా ఇందులో నిమ్మరసం వేసి మరోసారి నెమ్మదిగా కలపాలి.
ఇప్పుడు కేక్ బేక్ చేయడానికి ఒక మందపాటి కడాయి లేదా కుక్కర్ తీసుకుని అడుగున ఉప్పు లేదా స్టాండ్ పెట్టి మూత పెట్టి ఐదు నిమిషాల పాటు మీడియం మంటపై వేడి చేసుకోవాలి. ఈలోపు ఒక స్టీల్ లేదా అల్యూమినియం గిన్నెకు లోపల నూనె రాసి కొద్దిగా మైదా పిండి చల్లుకోవాలి. తయారు చేసుకున్న కేక్ మిశ్రమాన్ని ఆ గిన్నెలోకి పోసి రెండు సార్లు నెమ్మదిగా నేలపై తట్టాలి, దీనివల్ల లోపల గాలి బుడగలు ఉంటే పోతాయి.
వేడెక్కిన కడాయిలో ఈ కేక్ గిన్నెను జాగ్రత్తగా పెట్టి మూత పెట్టాలి. మంటను పూర్తిగా తగ్గించి సుమారు 20 – 25 నిమిషాల పాటు ఉడికించాలి. మధ్యలో ఒకసారి టూత్పిక్ లేదా చాకుతో కేక్ మధ్యలో గుచ్చి చూడాలి. పిండి అంటుకోకుండా శుభ్రంగా బయటకు వస్తే కేక్ పూర్తిగా ఉడికినట్లే. ఒకవేళ పిండి అంటుకుంటే మరో ఐదు నిమిషాలు ఉంచాలి. స్టవ్ ఆఫ్ చేసి కేక్ పూర్తిగా చల్లారిన తర్వాత అంచులను చాకుతో విడిపించి ప్లేట్లోకి తీసుకుంటే ఎంతో రుచికరమైన ఎమర్జెన్సీ చాక్లెట్ కేక్ సిద్ధం. దీనిపైన కొద్దిగా కరిగించిన చాక్లెట్ సిరప్ వేసుకుని తింటే రుచి అద్భుతంగా ఉంటుంది.
Also Read: బయట దొరికే పాస్తా కంటే 10 రెట్లు రుచిగా.. ఇంట్లోనే క్రీమీ చీజీ చికెన్ పాస్తా తయారీ విధానం!