కిచెన్‌లో వేడి నూనె చిమ్మి చేతులు కాలుతున్నాయా? ఈ సింపుల్ చిట్కాలతో సమస్యకు చెక్

భారతీయ వంటల్లో పోపు వేయడం చాలా ముఖ్యమైన భాగం. దీంతో వంటలో మంచి రుచి, సువాసన వస్తుంది. అయితే పోపు వేస్తున్న సమయంలో వేడి నూనె ఒక్కసారిగా చిమ్మడం చాలా సాధారణ సమస్య. దీనివల్ల చేతులు, ముఖంపై నూనె పడే ప్రమాదం ఉంటుంది. అలాగే గ్యాస్ స్టౌ, కిచెన్ కూడా నూనె మరకలతో మురికిగా మారుతుంది. కొన్ని చిన్న జాగ్రత్తలు తీసుకుంటే ఈ సమస్యను చాలా వరకు నివారించవచ్చు.

వేడి నూనె ఎందుకు చిమ్ముతుంది?

వేడి నూనెలో నీరు లేదా తేమ ఉన్న పదార్థాలు పడినప్పుడు అవి వెంటనే ఆవిరిగా మారుతాయి. ఈ ఆవిరి ఒత్తిడి వల్ల నూనె పైకి ఎగిరి చిమ్ముతుంది. తడి పాత్రలు, తడి గరిటెలు లేదా నీరు ఉన్న కూరగాయలు కూడా దీనికి కారణమవుతాయి. ముఖ్యంగా పచ్చిమిర్చి, కరివేపాకు, ఉల్లిపాయ, వెల్లుల్లిలో ఉండే తేమ వల్ల నూనె ఎక్కువగా చిమ్ముతుంది.

చిటికెడు ఉప్పుతో ప్రయోజనం

నూనె బాగా వేడయ్యాక అందులో చిటికెడు ఉప్పు వేయడం వల్ల నూనె చిమ్మడం కొంత వరకు తగ్గవచ్చు. ఉప్పు అదనపు తేమను తగ్గించడంలో సహాయపడుతుంది. అయితే ఎక్కువ ఉప్పు వేయకూడదు. అది వంట రుచిని మార్చే అవకాశం ఉంటుంది.

పాన్ లేదా పాత్ర పూర్తిగా పొడిగా ఉండాలి

వంట ప్రారంభించే ముందు కడాయిని పూర్తిగా తుడిచి పొడిగా చేసుకోవాలి. కడిగిన తర్వాత శుభ్రమైన గుడ్డతో తేమ లేకుండా తుడవాలి. తరువాత కొన్ని సెకన్లు ఖాళీ పాన్‌ను వేడి చేస్తే మిగిలిన తేమ కూడా తొలగిపోతుంది. ఇలా చేయడం వల్ల నూనె చిమ్మే అవకాశం తగ్గుతుంది.

తడి చెంచాలు ఉపయోగించకూడదు

వేడి నూనెలో ఎప్పుడూ తడి చెంచాలు లేదా గరిటెలు పెట్టకూడదు. కొన్ని నీటి చుక్కలు కూడా నూనెను బలంగా చిమ్మేలా చేస్తాయి. అందుకే వంటలో ఉపయోగించే అన్ని పరికరాలు డ్రైగా ఉండాలి.

పదార్థాలను ముందే తుడవండి

పచ్చిమిర్చి, కరివేపాకు, వెల్లుల్లి వంటి పదార్థాలను నూనెలో వేయడానికి ముందు వాటిని బాగా తుడిచి తేమ తొలగించాలి. ఇందుకోసం టిష్యూ పేపర్ ఉపయోగపడుతుంది. ఇలా చేస్తే ఆవిరి తక్కువగా ఏర్పడి నూనె ప్రశాంతంగా ఉంటుంది.

Also Read: మీ కుటుంబంలో అందరికీ షుగర్ ఉందా? మీ పిల్లలకు మధుమేహం రాకుండా ఈ జాగ్రత్తలు పాటించాలి

నూనె ఎక్కువగా వేడి చేయకండి

అవసరానికి మించి నూనెను వేడి చేస్తే చిమ్మే అవకాశం పెరుగుతుంది. పోపు వేయడానికి సరిపడా మాత్రమే నూనె వేడి చేయాలి. నూనె నుంచి పొగ వస్తే వెంటనే మంట తగ్గించాలి. ఇలా చేయడం వల్ల వంట రుచి కూడా మెరుగ్గా ఉంటుంది.

పోపు జాగ్రత్తగా వేయండి

పోపు వేస్తున్నప్పుడు కడాయికి కొద్దిగా దూరంగా నిలబడాలి. అన్ని పదార్థాలను ఒకేసారి వేయకుండా నెమ్మదిగా వేయాలి. అవసరమైతే మూతను అడ్డుగా పట్టుకుని నూనె చిమ్మకుండా జాగ్రత్త పడవచ్చు. ఈ చిన్న అలవాట్లు మీకు గాయాలు కాకుండా కాపాడుతాయి. అంతేకాకుండా వంటగదిని కూడా శుభ్రంగా ఉంచుతాయి.