Electrolyte Imbalance: వేసవి కాలం వచ్చిందంటే చాలు, అందరూ చెప్పే మాట “ఎక్కువ నీళ్లు తాగండి” అని. కానీ.. ఈ సలహా సగం మాత్రమే నిజం. ఎందుకంటే ఇటీవల ఢిల్లీలో జరిగిన ఒక ఘటన మనల్ని ఉలిక్కిపడేలా చేసింది. ఒక మార్కెటింగ్ ఎగ్జిక్యూటివ్ రోజంతా ఎండలో తిరుగుతూ 5 లీటర్ల నీరు తాగాడు. కానీ ఆహారం తీసుకోలేదు. ఫలితంగా సాయంత్రానికి స్పృహ కోల్పోయి ఐసీయూలో చేరాడు. అతనికి వచ్చిన సమస్య హైపోనాట్రేమియా .
నీరు మాత్రమే తాగితే ఏం జరుగుతుంది?
మనం ఎండలో ఉన్నప్పుడు చెమట రూపంలో కేవలం నీరు మాత్రమే కాదు, సోడియం, పొటాషియం, క్లోరైడ్ వంటి ముఖ్య లవణాలు కూడా బయటకు వెళ్లిపోతాయి. ఇవి మన కండరాలు, నరాలు , గుండె సరిగ్గా పనిచేయడానికి అవసరం. ఆ సమయంలో మనం కేవలం ‘ప్లెయిన్ వాటర్’ మాత్రమే అతిగా తాగితే.. రక్తంలో ఉన్న కొద్దిపాటి సోడియం కూడా పలచబడిపోతుంది. దీని వల్ల మెదడు కణాలలో వాపు వచ్చి ప్రాణాలకే ప్రమాదం ఏర్పడుతుంది.
ప్రధాన సమస్యలు:
హైపోనాట్రేమియా (సోడియం తగ్గడం): నీరు ఎక్కువై సోడియం తగ్గినప్పుడు తల తిరగడం, వికారం, మాట తడబడటం, ఫిట్స్ వంటివి రావచ్చు.
హైపర్ నాట్రేమియా (నీరు తగ్గడం): అసలు నీరు తాగకపోవడం వల్ల సోడియం గాఢత పెరిగి కణాలు కుచించుకుపోతాయి. ఇది కూడా ప్రమాదకరమే.
పొటాషియం లోపం: చెమట ద్వారా పొటాషియం పోతే కండరాల నొప్పులు, నీరసం , గుండె లయ తప్పడం వంటివి జరుగుతాయి.
తీసుకోవాల్సిన జాగ్రత్తలు:
కేవలం నీరు మాత్రమే వద్దు: ఎండలో తిరిగేటప్పుడు నీటితో పాటు ORS (ఓరల్ రీహైడ్రేషన్ సాల్ట్స్), మజ్జిగ, కొబ్బరి నీళ్లు లేదా నిమ్మరసం తీసుకోవాలి.
ఆహారం : ఖాళీ కడుపుతో ఎండలో తిరగడం అత్యంత ప్రమాదకరం. పండ్లు, ఉప్పు ఉన్న ఆహారం తీసుకోవడం వల్ల శరీరానికి లవణాలు అందుతాయి.
లక్షణాలు గమనించండి: తలనొప్పి, నీరసం, అయోమయం వంటి లక్షణాలు కనిపిస్తే వెంటనే.. డాక్టరును సంప్రదించాలి.
గుర్తుంచుకోండి.. వేసవిలో ప్రాణం కాపాడేది కేవలం నీరు మాత్రమే కాదు, నీటితో పాటు లవణాలు కూడా!
Share
మన్యం జిల్లాలో ఘోర రోడ్డు ప్రమాదం.. ఆర్టీసీ బస్సును ఢీకొట్టిన ట్యాంకర్, కారు
పామర్రు సభలో సీఎం చంద్రబాబు కీలక ప్రకటన.. ఇవాళ్టి నుంచి ప్రారంభం, నేతల్లో కొత్త టెన్షన్
