Harish Shankar: ఉస్తాద్ భగత్ సింగ్ తర్వాత హరీష్ శంకర్ ఫుల్ మాస్ ప్లాన్.. ఏకంగా నందమూరి హీరోతో..!

Harish Shankar: టాలీవుడ్‌లో ప్రస్తుతం ఒక ఆసక్తికరమైన వార్త హాట్ టాపిక్‌గా మారింది. దర్శకుడు హరీష్ శంకర్ తన తదుపరి సినిమా గురించి కీలక నిర్ణయం తీసుకున్నట్లు సమాచారం. ప్రస్తుతం ఆయన ఉస్తాద్ భగత్ సింగ్ సినిమాతో బిజీగా ఉన్న సంగతి తెలిసిందే. ఈ సినిమా వచ్చే నెలలో విడుదలకు సిద్ధమవుతోంది. పవన్ కళ్యాణ్ హీరోగా నటిస్తున్న ఈ చిత్రం మీద అభిమానుల్లో భారీ అంచనాలున్నాయి.

ఉస్తాద్ భగత్ సింగ్ విడుదల తర్వాత హరీష్ శంకర్ ఎవరితో సినిమా చేస్తారు అనే అంశంపై చాలాకాలంగా చర్చ జరుగుతోంది. తాజా సమాచారం ప్రకారం, ఆయన తదుపరి ప్రాజెక్ట్ ‘గాడ్ ఆఫ్ మాసెస్’గా పేరొందిన నందమూరి బాలకృష్ణతో ఉండబోతోందని టాక్. ఈ సినిమాను ప్రముఖ నిర్మాణ సంస్థ సితార ఎంటర్‌టైన్‌మెంట్స్ నిర్మించనుందని తెలుస్తోంది.

ముందుగా ఈ ప్రాజెక్ట్‌ను కేవీఎన్ ప్రొడక్షన్స్ బ్యానర్‌లో ప్లాన్ చేసినప్పటికీ, కొన్ని కారణాల వల్ల ఇప్పుడు సితార ఎంటర్‌టైన్‌మెంట్స్ చేతుల్లోకి వెళ్లిందని సమాచారం. నిర్మాణ పరంగా, కథ పరంగా ఈ సినిమాను మరింత బలంగా తీర్చిదిద్దాలని మేకర్స్ భావిస్తున్నారట. బాలకృష్ణకు తగ్గ పవర్‌ఫుల్ కథతో, హరీష్ శంకర్ మార్క్ మాస్ ఎలిమెంట్స్‌తో ఈ సినిమా ఉండబోతుందనే అంచనాలు ఉన్నాయి.

ఇక బాలకృష్ణ విషయానికి వస్తే, వయసుతో సంబంధం లేకుండా వరుస సినిమాలతో దూసుకెళ్తున్నారు. ఆయన ఎనర్జీ, డైలాగ్ డెలివరీ, అభిమానుల క్రేజ్ గురించి ప్రత్యేకంగా చెప్పాల్సిన పనిలేదు. ఇటీవల కొన్ని సినిమాలకు మిశ్రమ స్పందన వచ్చినా, తన లైనప్‌తో మళ్లీ బాక్సాఫీస్‌ను షేక్ చేయాలని బాలయ్య ప్లాన్ చేస్తున్నారని సినీ వర్గాలు అంటున్నాయి.

హరీష్ శంకర్ – బాలకృష్ణ కాంబినేషన్ అధికారికంగా ప్రకటిస్తే, అది టాలీవుడ్‌లో పెద్ద సంచలనంగా మారే అవకాశం ఉంది. ప్రస్తుతం స్క్రిప్ట్ పనులు ప్రాథమిక దశలో ఉన్నాయని, ఉస్తాద్ భగత్ సింగ్ రిలీజ్ తర్వాత పూర్తి ఫోకస్ ఈ ప్రాజెక్ట్‌పైనే ఉంటుందని సమాచారం.

ALSO READ: Actress Radhika: మేకప్ కోసమే 7గంటలు.. ఈ నటి డెడికేషన్ కు హ్యాట్సాఫ్ చెప్పాల్సిందే?