Renu Desai: రేణు దేశాయ్‌పై అసభ్యకర కామెంట్లు.. ఇద్దరిపై సైబర్ క్రైమ్ కేసు

Renu Desai: సోషల్ మీడియాలో సెలబ్రిటీలపై అసభ్యకర వ్యాఖ్యలు చేయడం, వ్యక్తిగతంగా దూషించడం ఇటీవల ఎక్కువగా జరుగుతోంది. ఈ నేపథ్యంలో సినీ నటి రేణు దేశాయ్ తనపై జరుగుతున్న వేధింపుల గురించి సైబరాబాద్ సైబర్ క్రైమ్ పోలీసులకు ఫిర్యాదు చేశారు. ఆమె ఫిర్యాదును పరిశీలించిన పోలీసులు వెంటనే చర్యలు.. ప్రారంభించి ఇద్దరు నిందితులను అరెస్ట్ చేశారు.

ఇద్దరిపై సైబర్ క్రైమ్ కేసు..!

గత కొంతకాలంగా సోషల్ మీడియాలో రేణు దేశాయ్‌పై కొన్ని అకౌంట్ల ద్వారా అసభ్యకర వ్యాఖ్యలు చేస్తున్నారని సమాచారం. ఈ కామెంట్లు ఆమెను తీవ్రంగా బాధపెట్టాయి. తప్పుడు ఆరోపణలు చేయడం, వ్యక్తిగతంగా దూషించడం వంటి చర్యలపై ఆమె తీవ్ర అభ్యంతరం వ్యక్తం చేశారు. దీంతో మొత్తం నాలుగు సోషల్ మీడియా అకౌంట్లపై ఆమె అధికారికంగా ఫిర్యాదు చేశారు.

ఈ ఫిర్యాదును సీరియస్‌గా తీసుకున్న సైబరాబాద్ సైబర్ క్రైమ్ పోలీసులు సాంకేతిక ఆధారాలతో దర్యాప్తు ప్రారంభించారు. డిజిటల్ ట్రాకింగ్ సహాయంతో ఆ అకౌంట్ల వెనుక ఉన్న వ్యక్తులను గుర్తించారు. ప్రస్తుతం ఇద్దరు నిందితులను అరెస్ట్ చేసి విచారణ కొనసాగిస్తున్నారు. ఇంకా మిగిలిన ఇద్దరిని పట్టుకునేందుకు పోలీసులు.. ప్రయత్నాలు వేగవంతం చేశారు.

ఈ ఘటనపై పోలీసులు కూడా కఠిన హెచ్చరికలు జారీ చేశారు. ఫేక్ అకౌంట్లు ఉపయోగించి ఎవరూ పట్టుకోలేరని భావించి అసభ్యకర వ్యాఖ్యలు చేసే వారిపై తప్పకుండా చర్యలు తీసుకుంటామని చెప్పారు. ఆధునిక సాంకేతిక పరిజ్ఞానంతో ఎక్కడ ఉన్నా నిందితులను గుర్తించగలమని.. అధికారులు తెలిపారు.

ఇటీవల మరో ఘటనలో నటి అనసూయపై సోషల్ మీడియాలో అసభ్యకర వ్యాఖ్యలు చేసిన వ్యక్తిని కూడా పోలీసులు అరెస్ట్ చేశారు. వరుసగా జరుగుతున్న ఈ చర్యలు సోషల్ మీడియాలో వేధింపులకు పాల్పడే వారిలో భయం కలిగిస్తున్నాయి.

సెలబ్రిటీలే కాకుండా సాధారణ మహిళలు కూడా సోషల్ మీడియాలో వేధింపులకు గురైతే వెంటనే పోలీసులను సంప్రదించాలని అధికారులు సూచించారు. ఫిర్యాదు అందిన వెంటనే బాధ్యులపై కఠిన చర్యలు తీసుకుంటామని సైబరాబాద్ సైబర్ క్రైమ్ పోలీసులు భరోసా ఇచ్చారు.

ALSO READ: Peddi Release Date: ఆ పాట వల్ల రామ్ చరణ్ పెద్ది సినిమాకు కష్టాలు..రిలీజ్ డేట్ మారుతుందా!