Tollywood Re-Release Fever: సమ్మర్ లో సినిమా సందడి ఎలా ఉంటుందో స్పెషల్ గా చెప్పక్కర్లేదు.పోటాపోటీగా పెద్ద హీరోలంతా థియేటర్ ల దగ్గర బారులు తీరేవారు.కానీ కాలం మారింది.గత రెండేళ్లుగా సీజన్ కాస్తా చప్పగా సాగుతున్న పరిస్థితి.ఇదే క్రమంలో ఈ ఏడాది కూడా ఆ సందడి ఎక్కడా కనిపించలేదు. ఒకటి అరా చిత్రాలు మినహా బాక్సాఫీస్ వద్ద పెద్దగా మెరుపులేవీ లేకపోవడంతో సినీ ప్రియులకు ఈ సమ్మర్ కాస్త నిరాశనే మిగిల్చింది. ఈలోగానే స్కూళ్లు, కాలేజీలు కూడా మొదలవడంతో థియేటర్లలో రద్దీ మరింత తగ్గింది.
ఇక జూన్ చివరి వారానికి వచ్చేసరికి బాక్సాఫీస్ వద్ద ఒక విచిత్రమైన పరిస్థితి ఏర్పడింది. అవును..ఈ నెలాఖరున థియేటర్లలోకి రావడానికి ఒక్కటంటే ఒక్క కొత్త తెలుగు సినిమా కూడా సిద్ధంగా లేదు. ఇండస్ట్రీలో ఇలాంటి డ్రై సీజన్ రావడం నిజంగా రేర్ అనే చెప్పాలి. అయితే, కొత్త సినిమాలు లేవని డిసప్పాయింట్ అవుతున్న ఆడియన్స్ అలరించేందుకు టాలీవుడ్ ఇప్పుడు సరికొత్త వ్యూహంతో ముందుకు వచ్చింది. థియేటర్లలో మళ్లీ పాత ఇండస్ట్రీని షేక్ చేసిన బ్లాక్బస్టర్ చిత్రాలు సరికొత్త హంగులతో రీ-రిలీజ్ బాట పట్టాయి. ఒకప్పుడు కేవలం హీరోల పుట్టినరోజులకే పరిమితమైన ఈ రీ-రిలీజ్ ట్రెండ్, ఇప్పుడు థియేటర్ల మనుగడకు మరియు ఎగ్జిబిటర్ల రన్నింగ్ ఖర్చులకు ఒక నమ్మకమైన ఇన్ కమ్ సోర్స్ గా మారిపోయింది. నేటితరం యువత (Gen Z) తాము థియేటర్లలో మిస్ అయిన క్లాసిక్ సినిమాలను ఫ్రెండ్స్తో కలిసి పెద్ద స్క్రీన్పై ఎంజాయ్ చేయడానికి ఎగబడుతుండటంతో బాక్సాఫీస్ వద్ద సరికొత్త సందడి మొదలుకానుంది.
ఈ రీ-రిలీజ్ రేసులో అందరికంటే ముందుగా ప్రేక్షకుల ముందుకు వస్తోంది ఈ ఏడాది సంచలనం ‘హనుమాన్’. యంగ్ హీరో తేజ సజ్జా నటించిన ఈ విజువల్ వండర్, 2024 సంక్రాంతి కానుకగా విడుదలై ప్రపంచవ్యాప్తంగా ఎలాంటి రికార్డులు సృష్టించిందో అందరికీ తెలిసిందే. దర్శకుడు ప్రశాంత్ వర్మ క్రియేట్ చేసిన ఈ సినిమాటిక్ యూనివర్స్ ఇప్పుడు సరికొత్త అనుభూతిని పంచేందుకు త్రీడీ (3D) హంగులతో జూన్ 25న గ్రాండ్గా థియేటర్లలో ల్యాండ్ కాబోతోంది.
ఈ విజువల్ ట్రీట్ తర్వాత, సూపర్ స్టార్ మహేష్ బాబు కెరీర్లోనే వన్ ఆఫ్ ది బిగ్గెస్ట్ మైల్స్టోన్ మూవీగా నిలిచిన ‘ఒక్కడు’ మళ్లీ థియేటర్లను షేక్ చేయడానికి రెడీ అయింది. గుణశేఖర్ దర్శకత్వంలో MS రాజు నిర్మించిన ఈ కల్ట్ క్లాసిక్ జూన్ 26న రీ-రిలీజ్ కానుంది. మహేష్ బాబు స్టార్డమ్ను నెక్స్ట్ లెవెల్కు తీసుకెళ్లిన ఈ సినిమాను, ముఖ్యంగా ఆ ఐకానిక్ కొండారెడ్డి బురుజు సెంటర్ సీన్స్ను థియేటర్లలో చూడటానికి అభిమానులు ఎంతో ఆసక్తిగా థియేటర్లకు క్యూ కడుతున్నారు.
ఇదే ఊపులో జూన్ 27న మరికొన్ని ఆసక్తికరమైన చిత్రాలు సందడి చేయబోతున్నాయి. మంచు విష్ణు అత్యంత ప్రతిష్టాత్మకంగా, భారీ బడ్జెట్తో రూపొందిస్తున్న భక్తిరస చిత్రం ‘కన్నప్ప’కు సంబంధించిన ఒక ప్రత్యేక వెర్షన్ లేదా గ్లింప్స్ తరహా ప్రదర్శనను ఎంపిక చేసిన థియేటర్లలో అదే రోజున ప్రదర్శించనున్నారు. దీంతో పాటు అప్పట్లో యూత్ అండ్ ఫ్యామిలీ ఎంటర్టైనర్గా సూపర్ హిట్ టాక్ తెచ్చుకున్న ‘సినిమా చూపిస్త మావ’ చిత్రం కూడా జూన్ 27న మళ్లీ థియేటర్లలోకి వస్తోంది.
రాజ్ తరుణ్, అవికాగోర్ జంటగా త్రినాథరావు నక్కిన దర్శకత్వంలో వచ్చిన ఈ చిత్రం థియేటర్లలో మళ్లీ నవ్వుల పూలు పూయించడానికి సిద్ధమైంది. నిజానికి పవర్ స్టార్ పవన్ కళ్యాణ్ బ్లాక్ బస్టర్ హిట్ ‘గబ్బర్ సింగ్’ను కూడా నిర్మాత బండ్ల గణేష్ ఈ వారంలోనే రీ-రిలీజ్ చేయాలని ప్లాన్ చేశారు. కానీ, ప్రస్తుతం థియేటర్లలో ఉన్న మెగాస్టార్ చిరంజీవి ‘పెద్ది’ సినిమా రన్కు ఇబ్బంది కలగకూడదనే ఉద్దేశంతో ఆ నిర్ణయాన్ని ప్రస్తుతానికి వాయిదా వేసుకున్నారు.
తెలుగులో కొత్త సినిమాలు లేకపోయినప్పటికీ, బాలీవుడ్ నుంచి ఒక భారీ మల్టీస్టారర్ చిత్రం తెలుగు ప్రేక్షకులను పలకరించేందుకు వస్తోంది. అక్షయ్ కుమార్, దిశా పటానీ జంటగా నటించిన క్రేజీ కామెడీ ఎంటర్టైనర్ ‘వెల్కమ్ టు ది జంగిల్’ జూన్ 26న విడుదల కానుంది. బాలీవుడ్ సూపర్ హిట్ ఫ్రాంచైజీ ‘వెల్కమ్’ సిరీస్లో వస్తున్న ఈ చిత్రానికి అహ్మద్ ఖాన్ దర్శకత్వం వహించారు. ఈ సినిమాలో జాక్వెలిన్ ఫెర్నాండెజ్, సునీల్ శెట్టి, అర్షద్ వార్సి, జాకీ ష్రాఫ్, రవీనా టాండన్ లాంటి భారీ తారాగణం నటించడంతో సినిమాపై ట్రేడ్లో మంచి అంచనాలు ఉన్నాయి. కొత్త సినిమాల కొరత ఉన్న తరుణంలో, అటు బాలీవుడ్ భారీ చిత్రం మరియు ఇటు టాలీవుడ్ కల్ట్ క్లాసిక్ రీ-రిలీజ్ సినిమాలు థియేటర్ల వద్ద ఏ రేంజ్లో హంగామా సృష్టిస్తాయో చూడాలి.
Share
ఫోన్లో ‘True 5G’ సిగ్నల్ ఉన్నా.. ఇంటర్నెట్ రావడం లేదా? అసలు కారణాలు ఇవే!
సంతోష్రావు కొత్త రూపం! ఫామ్హౌజ్ వీడి.. అడివి బాట పట్టి! వైల్డ్ లైఫ్ ఫోటోగ్రాఫర్గా అవతారం..
