పొద్దుతిరుగుడు పువ్వు నిజంగానే సూర్యుడి వైపు తిరుగుతుందా? అసలు నిజం తెలిస్తే ఆశ్చర్యపోవడం పక్కా!

Sunflower Facts: పొద్దుతిరుగుడు పువ్వు గురించి పెద్దగా పరిచయం అవసరం లేదు. అంతేకాదు, సూర్యుడి వైపు తిరిగే దాని ప్రత్యేకత గురించి కూడా చాలా మందికి తెలుసు. చిన్నప్పటి నుంచి ఈ పువ్వు సూర్యుడు ఎటు ఉంటే అటువైపే తిరిగి చూస్తుందని పెద్దలు చెప్తుంటారు. అయితే, నిజంగానే పొద్దుతిరుగుడు పువ్వు రోజంతా సూర్యుడి వైపు తిరుగుతుందా? పొద్దు ఎటువైపు వెళ్తే అది కూడా అటువైపే చూస్తుందా? లేదంటే ఇది కేవలం అపోహేనా? ఈ ప్రశ్నకు శాస్త్రవేత్తలు ఆసక్తికరమైన సమాధానం చెబుతున్నారు. అదేంటో ఇప్పుడు తెలుసుకునే ప్రయత్నం చేద్దాం..

సూర్యరశ్మికి అనుగుణంగా కదలడం!

పొద్దుతిరుగుడు మొక్క నుంచి లభించే గింజలతో తయారయ్యే సన్‌ ఫ్లవర్ ఆయిల్ ప్రపంచ వ్యాప్తంగా విస్తృతంగా ఉపయోగిస్తారు. ఉభయ తెలుగు రాష్ట్రాల్లోనూ ఈ పంట బాగానే సాగవుతుంది. అయితే, ఈ మొక్కకు ఉన్న మరో ప్రత్యేకత సూర్యరశ్మికి అనుగుణంగా కదలడం. సైన్స్ పరిభాషలో దీనిని ఫోటోట్రోపిజం అంటారు. అంటే, కాంతికి అనుగుణంగా మొక్క తన దిశను మార్చుకోవడం.

నిజానికి మొక్కలు ఆరోగ్యంగా పెరగడానికి సూర్యరశ్మి అనేది అత్యంత కీలకం. అందుకే ఎక్కువ వెలుతురు అందేలా పొద్దుతిరుగుడు మొక్క తన కాండాన్ని క్రమంగా వంచుకుంటుంది. ఈ ప్రక్రియలో ఆక్సిన్ అనే గ్రోథింగ్ హార్మోన్ కీలక పాత్ర పోషిస్తుంది. సూర్యరశ్మి తక్కువగా పడే భాగంలో ఈ హార్మోన్ ఎక్కువగా చేరి, ఆ వైపు కణాలు వేగంగా పెరిగేలా చేస్తుంది. దీంతో పువ్వు సూర్యుడి వైపు తిరుగుతున్నట్లు కనిపిస్తుంది.

అయితే, ఈ లక్షణం మొక్కకు జీవితాంతం ఉండదు. చిన్న వయసులో ఉన్న పొద్దుతిరుగుడు మొక్కలు మాత్రమే ఉదయం నుంచి సాయంత్రం వరకు సూర్యుడి వైపు తిరుగుతూ ఉంటాయి. పువ్వు పూర్తిగా వికసించి పరిపక్వ దశకు చేరుకున్న తర్వాత ఎక్కువగా తూర్పు దిశలోనే స్థిరంగా ఉంటుంది. ఉదయాన్నే వచ్చే సూర్యరశ్మిని త్వరగా పొందడం, తేనెటీగలు లాంటి పరాగసంపర్క కీటకాలను ఆకర్షించడం ఇందుకు ప్రధాన కారణాలని పరిశోధనలు చెబుతున్నాయి.

పురాణాల్లో ఆసక్తికర ప్రేమ కథ!

పొద్దుతిరుగుడు పువ్వు గురించి గ్రీకు పురాణాల్లో కూడా ఓ ఇంట్రెస్టింగ్ స్టోరీ ఉంది. ఆ కథ ప్రకారం క్లైటీ అనే యువతి సూర్యదేవుడైన హీలియోస్‌ ను ఇష్టపడుతుంది. ఎంతగానో ప్రేమిస్తుంది. ఆమె ప్రేమ ఫలించకపోవడంతో జీవితాంతం సూర్యుడినే చూస్తూ ఉండేదని, చివరకు పొద్దుతిరుగుడు పువ్వుగా మారిపోయిందని చెబుతారు. అందుకే, ఈ పువ్వు ఎప్పుడూ సూర్యుడి వైపే చూస్తుందని ఆ కథ ప్రచారంలో ఉంది.

సో, పొద్దుతిరుగుడు పువ్వు సూర్యుడి వైపు తిరగడం వెనుక ఎలాంటి మాయ, మర్మం లేదు. ఫోటోట్రోపిజం, ఆక్సిన్ హార్మోన్ ప్రభావం, సూర్యరశ్మిని ఎక్కువగా పొందాలనే సహజ ప్రక్రియ కలిసి ఈ లక్షణాన్ని అందించాయి. అందుకే ప్రకృతిలో అత్యంత ఆసక్తికరమైన మొక్కల్లో పొద్దుతిరుగుడు పువ్వు ఒకటిగా గుర్తింపు తెచ్చుకుంది.