Actor Shiva Raj Kumar | ప్రముఖ కన్నడ నటుడు శివ రాజ్కుమార్ కు వచ్చే ఎన్నికల్లో లోక్‌సభ టికెట్ ఇస్తామని కర్ణాటక ఉపముఖ్యమంత్రి డీకే శివకుమార్ బహిరంగంగా ఆఫర్ చేశారు. కర్ణాటక అసెంబ్లీ ఎన్నికల్లో దక్కిన విజయంతో ఉత్సాహంగా ఉన్న కాంగ్రెస్ పార్టీ.. వచ్చే ఏడాది జరగబోయే లోక్‌సభ ఎన్నికల్లోనూ రాష్ట్రంలో అత్యధిక స్థానాలు గెలుచుకోవాలని వ్యూహాలు రచిస్తోంది.
కర్ణాటకలో అన్ని వర్గాల మద్దతు కూడగట్టుకునేందుకు ప్రయత్నాలు చేస్తోంది కాంగ్రెస్ పార్టీ. ఈ క్రమంలోనే తాజాగా కర్ణాటక ఉపముఖ్యమంత్రి డీకే శివకుమార్.. ప్రముఖ కన్నడ నటుడు శివ రాజ్కుమార్ కు పబ్లిక్‌గా ఓ ఆఫర్ చేశారు. వచ్చే లోక్‌సభ ఎన్నికల్లో పోటీ చేయాలని ఈ స్టార్‌ హీరోను కోరారు.
బెంగళూరులో ఆర్యా ఈడిగ సమావేశంలో శివ రాజ్కుమార్ కు డీకే శివకుమార్ ఎంపీ టికెట్ ఆఫర్ చేశారు. చాలా సినిమా షూటింగ్‌లు పూర్తిచేయాల్సి ఉందని శివ రాజ్ కుమార్ అనడంతో.. సినిమాలు ఎప్పుడు కావాలంటే అప్పుడు చేసుకోవచ్చన్నారు డీకే.
అయితే, తన భార్య గీతకు రాజకీయాలపై ఆసక్తి ఉందన్నారు నటుడు శివ రాజ్కుమార్. ఆమెకు టికెట్ ఇచ్చే అంశాన్ని పరిశీలించాలన్నారు. గీత ఇప్పటికే ప్రత్యక్ష రాజకీయాల్లో యాక్టివ్‌గా ఉన్నారు. 2014లో ఆమె మాజీ సీఎం యడియూరప్పపై జేడీఎస్‌ అభ్యర్థిగా పోటీ చేసి ఓడిపోయారు. ఈ ఏడాది జరిగిన కర్ణాటక అసెంబ్లీ ఎన్నికల ముందు గీత కాంగ్రెస్ పార్టీలో చేరారు. ఆమె సోదరుడు మధు బంగారప్ప తరఫున ప్రచారంలో పాల్గొన్నారు.