కేంద్ర మాజీ మంత్రి మోహ్‌సినా కిద్వాయ్‌‌ కన్నుమూత

Mohsina Kidwai Passes Away: భారత రాజకీయాల్లో విశేష ముద్ర వేసిన సీనియర్ కాంగ్రెస్ నాయకురాలు, కేంద్ర మాజీ మంత్రి మొహ్సినా కిద్వాయ్ (94) కన్నుమూశారు. 1932 జనవరి 1న ఉత్తరప్రదేశ్‌లో జన్మించిన ఆమె, తన సుదీర్ఘ రాజకీయ ప్రస్థానంలో అటు రాష్ట్ర స్థాయిలో, ఇటు జాతీయ స్థాయిలో కీలక బాధ్యతలు నిర్వహించారు. ఆమె మృతిని కుటుంబ సభ్యులు అధికారికంగా ధృవీకరించారు.

మొహ్సినా కిద్వాయ్ తన రాజకీయ జీవితం మొత్తాన్ని భారత జాతీయ కాంగ్రెస్‌లోనే కొనసాగించారు. ఆమె 1960లో ఉత్తర ప్రదేశ్ శాసన మండలి సభ్యురాలిగా తన ప్రస్థానాన్ని ప్రారంభించారు. ఆమె ఉత్తర ప్రదేశ్ ప్రదేశ్ కాంగ్రెస్ కమిటీ (UPPCC) అధ్యక్షురాలిగా కూడా సేవలు అందించారు.

కేంద్ర మంత్రిగా మొహ్సినా కిద్వాయ్ పలు కీలక శాఖలను నిర్వహించారు. మాజీ ప్రధానులు ఇందిరా గాంధీ.. రాజీవ్ గాంధీ మంత్రివర్గాలలో ఆమె సభ్యురాలిగా ఉన్నారు. ఉత్తర ప్రదేశ్ ప్రభుత్వంలో ఆహార, పౌర సరఫరాల శాఖ (1973-74) మంత్రిగా, సాంఘిక సంక్షేమం.. చిన్న తరహా పరిశ్రమల శాఖలు (1974-77) మంత్రిగా బాధ్య‌త‌లు నిర్వహించారు. కేంద్రంలో భారత కార్మిక శాఖ (1982), ఆరోగ్య శాఖ (1983) మంత్రిగా ప‌నిచేశారు. గ్రామీణాభివృద్ధి, రవాణా, పట్టణాభివృద్ధి, పర్యాటక శాఖలకు మంత్రిగా వివిధ కాలాల్లో బాధ్యతలు చేపట్టారు.

ఆమె పార్లమెంటరీ ప్రస్థానం అత్యంత సుదీర్ఘమైనది. ఆరవ, ఏడవ, ఎనిమిదవ లోక్‌సభలకు ఆమె ఎన్నికయ్యారు. ముఖ్యంగా అజంగఢ్ మరియు మీరట్ నియోజకవర్గాల నుండి ఆమె ప్రాతినిధ్యం వహించారు. ఆ తర్వాత 2004లో రాజ్యసభకు ఎన్నికై, వివిధ పార్లమెంటరీ కమిటీలలో సభ్యురాలిగా చురుకైన పాత్ర పోషించారు. ముస్లిం మహిళల హక్కుల కోసం, వారి రాజకీయ భాగస్వామ్యం కోసం ఆమె నిరంతరం కృషి చేశారు.

వ్యక్తిగత జీవితానికి సంబంధించి, ఆమె 1953 డిసెంబరు 17న ఖలీల్ ఆర్. కిద్వాయ్‌ను వివాహం చేసుకున్నారు. ఆమెకు ముగ్గురు కుమార్తెలు ఉన్నారు. బారాబంకీ పార్లమెంట్ స్థానం నుండి కూడా ఆమె విజయకేతనం ఎగురవేశారు. అధికారిక లాంఛనాలతో ఆమె అంత్యక్రియలు నిర్వహించేందుకు ఏర్పాట్లు జరుగుతున్నాయి.

మాజీ కేంద్ర మంత్రి, మాజీ ఎంపీ మొహ్సినా కిద్వాయ్ మరణ వార్త తీవ్ర విచారాన్ని కలిగిస్తోందని కాంగ్రెస్ అగ్ర‌నేత రాహుల్ గాంధీ తెలిపారు. ఆమె కాంగ్రెస్ పార్టీకి చెందిన అత్యంత సీనియర్, విశ్వసనీయ నాయకురాలని కొనియాడారు. ఆమె జీవితమంతా ప్రజాసేవకు ఒక ఆదర్శంగా నిలిచార‌ని, తన నిరాడంబరత, సౌమ్యత, గౌరవప్రదమైన రాజకీయ విజయంతో ఆమె దేశవ్యాప్తంగా ఎన్నో తరాల మహిళలకు స్ఫూర్తినిచ్చారని అన్నారు. ఈ విషాద సమయంలో ఆమె కుటుంబ సభ్యులకు, మద్దతుదారులకు ప్రగాఢ సానుభూతిని తెలియజేశారు.

Read Also: హోర్ముజ్ పగ్గాలు.. అణు హక్కులు.. ఇరాన్ 10-సూత్రాల ప్లాన్‌కు ట్రంప్ గ్రీన్ సిగ్నల్!

Join WhatsApp Channel

Share

• 
• 
• 
• 
• 
•