జామకాయ దొంగలించిందన్న పాపానికి.. ఒక చిన్నారిని కట్టేసి హింసించిన దుర్మార్గుడు

Child Tied to Railing Video: హిమాచల్ ప్రదేశ్‌లోని ఊనా జిల్లాలో మానవత్వాన్ని మంటగలిపే అత్యంత దారుణమైన ఘటన వెలుగులోకి వచ్చింది. కేవలం తన చెట్టు నుంచి జామకాయలు కోసిందన్న కార‌ణంతో, ఒక వ్యక్తి చిన్నారిని మెట్ల రెయిలింగ్‌కు కట్టివేసి క్రూరంగా హింసించాడు. ఈ హృదయ విదారక ఘటనకు సంబంధించిన వీడియో సోషల్ మీడియాలో వైరల్ కావడంతో దేశవ్యాప్తంగా తీవ్ర ఆగ్రహావేశాలు వ్యక్తమవుతున్నాయి.

ఒక వలస కార్మిక కుటుంబానికి చెందిన 5-6 ఏళ్ల బాలికను, ఒక మాజీ సైనికుడు తన ఇంటి మెట్ల రెయిలింగ్‌కు తాళ్లతో బలంగా కట్టివేశాడు. ఆ చిన్నారి భయంతో వణుకుతూ, ఏడుస్తూ “నన్ను వదిలేయండి అంకుల్.. కాపాడండి.” అని వేడుకుంటున్నా ఆ వ్యక్తి కనికరించలేదు. వీడియో తీస్తున్న వారు ప్రశ్నించగా, తన చెట్టు జామకాయలు కోసిందని, అందుకే శిక్ష వేస్తున్నానని దురుసుగా సమాధానం ఇచ్చాడు. ఒక చిన్న తప్పుకు పసిపాపను అలా బంధించడం మానవత్వానికే మాయని మచ్చ అని నెటిజన్లు మండిపడుతున్నారు.

ఈ వీడియో క్లిప్ వైరల్ కావడంతో హిమాచల్ ప్రదేశ్ పోలీసులు.. స్థానిక యంత్రాంగం తక్షణమే స్పందించారు. నిందితుడిపై బాలల వేధింపుల నిరోధక చట్టం కింద ఎఫ్ఐఆర్ నమోదు చేశారు. ఒక చిన్నారిని నిర్బంధించి హింసించినందుకు గాను అతడిపై కఠిన చర్యలు తీసుకోవాలని స్థానిక అధికారులు ఆదేశించారు. బాధితురాలు వలస కుటుంబానికి చెందినది కావడంతో, వారికి అవసరమైన రక్షణ.. వైద్య సాయం అందించేలా చర్యలు చేపట్టారు.

మ‌రోవైపు ఈ ఘటనపై ప్రజా సంఘాలు.. స్వచ్ఛంద సంస్థలు తీవ్ర నిరసన వ్యక్తం చేస్తున్నాయి. సమాజంలో పిల్లల పట్ల ఇలాంటి క్రూరత్వం పెరగడం ఆందోళనకరమని, నిందితుడికి కఠిన శిక్ష పడేలా చూడాలని డిమాండ్ చేస్తున్నాయి.

కేవలం జామకాయ దొంగలించిందన్న పాపానికి.. ఒక చిన్నారిని కట్టేసి హింసించిన ఓ దుర్మార్గుడుpic.twitter.com/c6gL1I0JYU

— vijay (@VijayMarka88) April 6, 2026