Kim : ఉత్తర కొరియా అధ్యక్షుడు కిమ్ రూటే సెపరేటు. ప్రపంచమంతా బాణాసంచా వెలుగుల్లో కొత్త సంవత్సరాన్ని ఆహ్వానించింది. ఉత్తరకొరియా అధ్యక్షుడు కిమ్ జాంగ్ ఉన్ మాత్రం క్షిపణి ప్రయోగంతో నూతన సంవత్సరంలోకి అడుగుపెట్టారు. 2022లో రికార్డు స్థాయిలో ఆయుధ ప్రయోగ పరీక్షలు ఉత్తర కొరియా నిర్వహించింది. ఆదివారం కూడా తూర్పు జలాల్లోకి ఓ బాలిస్టిక్ క్షిపణిని ప్రయోగించింది. ఈ ఏడాది కూడా ఆయుధ పరీక్షలు భారీగానే చేస్తామని కిమ్ సంకేతాలిచ్చారు.
కొత్త రకం ఖండాంతర బాలిస్టిక్ క్షిపణిని తయారు చేయాలని అధికారులను కిమ్ ఆదేశించినట్లు ఆ దేశ అధికారిక మీడియా కేసీఎన్ఏ ప్రకటించింది. అలాగే తొలి మిలిటరీ ‘గూఢచార ఉపగ్రహాన్ని సైతం త్వరలో ప్రయోగించాలని యోచిస్తున్నట్లు కిమ్ తెలిపారు. శనివారం కూడా ఉత్తర కొరియా మూడు స్వల్ప శ్రేణి బాలిస్టిక్ మిస్సైళ్లను తూర్పు జలాల్లోకి ప్రయోగించింది. ఉత్తర ప్రాంతంపై అంతరిక్షం నుంచి నిఘా సామర్థ్యాలను పెంపొందించుకునేందుకు దక్షిణ కొరియా ఘన ఇంధన రాకెట్ను ప్రయోగించిన తర్వాత రోజే ఉత్తర కొరియా క్షిపణులను ప్రయోగించడం రెండుదేశాల మధ్య ఉద్రిక్తతలను పెంచింది.
కొత్త సంవత్సరం సందర్భంగా అధికార పార్టీ సమావేశంలో పాల్గొన్న కిమ్ అణ్వస్త్రాల తయారీని గణనీయంగా పెంచుతామని ప్రతిజ్ఞ చేశారు. మరింత శక్తిమంతమైన ఖండాంతర క్షిపణులను తయారు చేస్తామని ప్రకటించారు. అమెరికా సహా ఇతర ప్రత్యర్థి దేశాలను ఎదుర్కొనేందుకు సైనిక శక్తిని పటిష్ఠ చేస్తామన్నారు. దేశ సార్వభౌమత్వాన్ని, భద్రతను కాపాడేందుకు అన్ని చర్యలు తీసుకుంటామని స్పష్టం చేశారు. వ్యూహాత్మక అణ్వస్త్రాల తయారీ గణనీయంగా పెంచాల్సిన పరిస్థితులు సృష్టిస్తున్నారని పరోక్షంగా అమెరికా, దక్షిణ కొరియాలను కిమ్ విమర్శించారు.
ఉత్తర కొరియా తాజా క్షిపణి ప్రయోగాలను దక్షిణ కొరియా, అమెరికా ఇండో- పసిఫిక్ కమాండ్ తీవ్రంగా ఖండించాయి. ఉత్తర కొరియా కవ్వింపు చర్యలకు దిగుతోందని దక్షిణ కొరియా ‘జాయింట్ ఛీఫ్స్ ఆఫ్ స్టాఫ్’ అన్నారు. కొరియా ద్వీపకల్ప శాంతి భద్రతలకు ఇది విఘాతం కల్గించే చర్య అని అన్నారు. అమెరికాతో కలిసి ఉత్తర కొరియా చర్యలను ఎప్పటికప్పుడు పర్యవేక్షిస్తున్నామని స్పష్టం చేశారు. ఎలాంటి పరిస్థితులను ఎదుర్కోవడానికైనా సిద్ధంగా ఉన్నామని తెలిపారు. చట్టవిరుద్ధమైన ఆయుధ కార్యకలాపాల ద్వారా ఉత్తర కొరియా అస్థిర పరిస్థితులకు దారితీస్తోందని అమెరికా ఇండో-పసిఫిక్ కమాండ్ తెలిపింది. దక్షిణ కొరియా, జపాన్ను రక్షించేందుకు అమెరికా కట్టుబడి ఉందని స్పష్టం చేసింది.
Share
China : చైనాలో కరోనా విలయం.. రోజూ 9 వేల మంది మరణం..
Significance of Mukkoti Ekadashi : ముక్కోటి ఏకాదశుల ఉపవాస ఫలితం ఈ ఒక్కరోజే …
