Manda Krishna Madiga: హైదరాబాదు రెండో రాజధాని అయితే అక్కడే ధర్నా చేసే వాళ్ళము.. ఢిల్లీ పోలీసులపై మందకృష్ణ ఫైర్

“సీజేఐ దళితుడు కాబట్టే ఆయనపై దాడి చేశారు,” అని మందకృష్ణ ఆరోపించారు. ఈ దాడిని దళితుల ఆత్మగౌరవంపై, రాజ్యాంగంపై, న్యాయవ్యవస్థపై జరిగిన దాడిగా తాము భావిస్తున్నామని అన్నారు. శాంతియుతంగా, కేవలం మూడు గంటల పాటు సభ నిర్వహించుకుంటామని నవంబర్ 7వ తేదీనే పోలీసులకు లేఖ ఇచ్చినా అనుమతి నిరాకరించడం దారుణమన్నారు. సుప్రీంకోర్టు కేవలం అనుమతి లేకుండా ధర్నా చేయవద్దని మాత్రమే చెప్పిందని, తాము అనుమతి కోరినా ఇవ్వకపోవడం పౌర హక్కులను కాలరాయడమేనని, ఇది దళితుల స్వేచ్ఛను హరించడమేనని మండిపడ్డారు.

రేపటి ధర్నా కోసం ఇప్పటికే అన్ని జిల్లాల నుంచి దళిత సంఘాల కార్యకర్తలు ఢిల్లీకి బయల్దేరి మార్గమధ్యలో ఉన్నారని, ఇప్పుడు వారిని ఎలా వెనక్కి పంపాలని ఆయన ప్రశ్నించారు. ఢిల్లీలో బాంబు బ్లాస్టింగ్‌ల తర్వాత కూడా ధర్నాలకు అనుమతులు ఇచ్చారని గుర్తుచేశారు. “ఢిల్లీ వారు ధర్నా చేస్తే అనుమతి ఇస్తారు, కానీ హైదరాబాద్, ఇతర దక్షిణాది రాష్ట్రాల వారు ధర్నా చేస్తే అనుమతి ఇవ్వరా? ఉత్తరాదికి ఒక న్యాయం, దక్షిణాదికి ఒక న్యాయం ఉండొద్దు. అందుకే అంబేద్కర్ గారు హైదరాబాద్‌ను రెండో రాజధాని చేయాలని అన్నారు. అదే జరిగి ఉంటే మేం అక్కడే ధర్నా చేసేవాళ్లం” అని మందకృష్ణ వ్యాఖ్యానించారు.

Read Also: Chamala Kiran Kumar: కులాలు, మతాల మధ్య చిచ్చు పెట్టేలా బండి సంజ‌య్ మాట్లాడుతున్నారు: ఎంపీ చామ‌ల‌