న‌టించ‌డం రాదంటాడు. ఉన్న‌దున్న‌ట్టు మాట్లాడుడే తెలుసంటాడు. దీన్నే జనం త‌ప్పుగా అర్ధం చేసుకుని త‌న‌కు అహంకారాన్ని ఆపాదించార‌ని తెగ బాధ‌ప‌డ‌తాడు. కానీ ఆయ‌న సంద‌ర్బాన్ని బట్టి, వేదిక‌ను బట్టి నాలుక మ‌డ‌తెడ‌తా ఉంటాడు. ఏ ఎండ‌కు ఆ గొడుగ‌న్న‌మాట. సినీ న‌టులు ఆయా పాత్ర‌ల్లో ప‌ర‌కాయ ప్ర‌వేశం చేసిన‌ట్టు.. కేటీఆర్ కూడా స‌మ‌యానుకూలంగా, అక్క‌డి ప‌రిస్థితుల‌ను దృష్టిలో పెట్టుకుని అభిప్రాయాలు మారుస్తా ఉంటాడు. కేటీఆర్ మాటంటే.. ఆ పార్టీ మాట‌న్న‌ట్టే. ఆయ‌న వ‌ర్కింగ్ ప్రెసిడెంట్ అయినా.. స్టీరింగ్ మొత్తం ఆయ‌న చేతిలోనే ఉంది.
బాల్క సుమ‌న్‌పై కేసు పెట్టి జైలుకు పంపిన ఉదంతంలో.. రెండు రోజుల వ్య‌వ‌ధిలోనే రెండు ర‌కాల అభిప్రాయాలు వ్య‌క్తం చేశాడు కేటీఆర్. మీట్ ది ప్రెస్..లో విలేక‌రులు అడిగిన ప్ర‌శ్న‌కు ఒక‌లా.. మరుసటి రోజే.. సుమన్ ములాఖ‌త్ తరువాత.. అక్క‌డ ఏర్పాటు చేసిన ప్రెస్‌మీట్‌లో ఇంకో రకంగా ఆయ‌న మాట్లాడిన తీరు ఇప్పుడు చ‌ర్చ‌కు వచ్చింది. అమాయ‌కంగా త‌న నిజాయితీ పట్ల త‌నే స‌ర్టిఫికెట్ ఇచ్చుకున్న మరుసటి రోజే.. మాట మార్చ‌డంపై విమ‌ర్శ‌లు వ్య‌క్త‌మ‌వుతున్నాయి. బాల్క సుమన్ .. ప్ర‌భుత్వ ఆస్తుల‌ను ధ్వంసం చేయాల‌నే క‌రెక్టు వ్యాఖ్య‌లు క‌రెక్టు కాదు..దీన్ని అంతా ఖండించాల్సిందే.. తాను ఏకీభ‌విస్తున్న‌ట్టుగా చెప్పాడు. క‌చ్చితంగా ఇది త‌ప్పుబ‌ట్టాల్సిన విష‌య‌మే అన్నాడు.
బాల్క సుమన్ మాట‌ల వేడిని కొంచెం త‌గ్గించేందుకు.. గ‌తంలో కూడా కాంగ్రెస్ నాయ‌కులు, పీసీసీ చీఫ్ హోదాలో రేవంత్‌రెడ్డి కూడా రెచ్చ‌గొట్టే మాట‌లు మాట్లాడార‌ని గుర్తు చేశాడు. అంద‌రికీ ఒకేలా చ‌ట్టం వ‌ర్తించాల‌ని అన్నాడు. కానీ మరుసటి రోజే. .దీనికి మ‌రింత మ‌సాల ద‌ట్టించాడు. అస‌లు బాల్క సుమన్ మాట్లాడింది త‌ప్పే కాద‌న్నాడు.. అత‌ను అక్క‌డి కార్మికుల క్షేమం కోసం ఉద్య‌మం ఎలా చేయాలో చెప్పేందుకు వాడిన ప‌దాల‌నే.. చిలువ‌లు ప‌లువ‌లు చేసి దాన్ని సైడ్ ట్రాక్ ప‌ట్టించి.. అస‌లు విష‌యం ప‌ట్టించుకోకుండా కేసులు పెట్టి జైలు పాలు చేశార‌న్నారు.
అస‌లు బాల్క సుమన్ పై మీకెందుకు ఇంత క‌క్ష? అని కూడా ప్ర‌భుత్వాన్ని నిల‌దీశాడు రామ‌న్న. అంద‌రూ అన్నారు.. మేమూ అన్నాం.. త‌ప్పేం లేద‌న్న‌ట్టా..? మేమొక్క‌ర‌మే ఇలాంటి మాట‌లు మాట్లాడుతున్నామా? అని స‌ర్ది చెప్పుకునే ప్ర‌య‌త్న‌మా? అస‌లు ఇలాంటి మాట‌లు కామ‌న్ కదా..? దీనికే ఇంత రాద్దాంత‌మా? అని లైట్ తీసుకోమంటున్నాడా? ఏమీ అర్థంకాక అక్క‌డున్న మీడియా బుర్రగోక్కున్న‌ది. తెలంగాణ ఉద్య‌మ స‌మ‌యంలో మ‌స్తు కేసులు భ‌రించిండు సుమన్.. ఇవీ ఓ లెక్క‌నా ? అన్నాడు.
అంటే సర్కార్ క‌చ్చితంగా త‌ప్పుడు కేసులు పెట్టే లోప‌ల వేసింద‌ని ఆరోపిస్తున్నాడా? మేమింతే మార‌మంటే మారం.. మా విధాన‌మే ఇంత..! ఇట్ల‌నే ఉంట‌మ‌ని.. స‌మన్ చేసిన వ్యాఖ్య‌ల‌ను కేటీఆర్ స‌మ‌ర్థిస్తున్నాడా? ఇంకా అర్థం కాక మళ్లీ బుర్ర గోక్కుందామ‌నుకునేలోపు.. కేటీఆర్ అక్క‌డ్నుంచి వెళ్లిపోయాడు. కొంప‌దీసి ఎవ‌రైనా మళ్లీ ప్ర‌శ్న‌లు వేస్తే.. దీన్ని ఇంకెన్ని మ‌లుపులు తిప్పి.. ఎన్ని వంక‌ర‌లుగా మార్చి మాట్లాడాలో అని భ‌య‌ప‌డి ఉంటాడు కేటీఆర్…అనుకుని స‌ర్దిచెప్పుకున్నారు అక్క‌డి విలేక‌రుల బృందం. మళ్లీ దొర‌క‌క‌పోతాడా? అడ‌గ‌క‌పోతామా ? అని కూడా అనుకున్నారు.
Share
ఆమిర్ ఖాన్ కెరీర్ బెస్ట్ క్లాసిక్ ‘లగాన్’.. 25 ఏళ్ల వేడుకగా థియేటర్లలోకి రీ రిలీజ్!
సరికొత్త లుమియో టీవీ.. డాల్బీ అట్మోస్, 4K డిస్‌ప్లే.. ఇక ఇంట్లోనే థియేటర్!
