టైటిల్ మాత్రమే ‘ఎపిక్’.. సెకండ్ హాఫ్ అంతా ‘ట్రాఫిక్’!

సినిమా: ఎపిక్ – ఫస్ట్ సెమిస్టర్

టైటిల్: టైటిల్ మాత్రమే ‘ఎపిక్’.. సెకండ్ హాఫ్ అంతా ‘ట్రాఫిక్’!

నటీనటులు: ఆనంద్ దేవరకొండ, వైష్ణవి చైతన్య, కళ్యాణ్ శంకర్, శివాజీ తదితరులు

దర్శకత్వం: ఆదిత్య హాసన్

సినిమా కథ :-

అప్పులు చేసి మరీ కొడుకు ఆదిత్య (ఆనంద్ దేవరకొండ)ని చదువుకోమని లండన్ పంపిస్తే.. వాడు అక్కడ చదువు పక్కన పెట్టి కడలి (వైష్ణవి చైతన్య) అనే అమ్మాయితో రూమ్ షేర్ చేసుకుంటాడు. ఎందుకంటే లండన్‌లో రెంట్స్ ఎక్కువ కదా, పాపం మన మిడిల్ క్లాస్ కుర్రాడు అడ్జస్ట్ అయిపోయాడు! ‘ఎలాగో ఒకే రూమ్‌లో ఉంటున్నాం కదా, రొమాన్స్ కూడా చేసుకుందాం.. కానీ ఎమోషన్స్, పెళ్లి లాంటి సెంటిమెంట్స్ వద్దు’ అని ఒక వింత అగ్రిమెంట్ రాసుకుంటారు. అంతా హ్యాపీగా సాగిపోతుంది అనుకునే టైమ్‌కి.. డైరెక్టర్ గారికి సడన్‌గా క్లాస్ తీసుకోవాలనిపించి కథను ఐసీయూలో పడేసి సీరియస్ చేస్తాడు.

ఎవరు ఎలా చేశారంటే..?

ఆనంద్ దేవరకొండ: ఫస్ట్ హాఫ్‌లో అమ్మాయిలంటే భయపడే అమాయక చక్రవర్తిలా కనిపిస్తాడు. కానీ రూమ్‌లోకి వెళ్లాక సడన్‌గా లండన్ ప్లేబాయ్ ఎలా అయ్యాడో ఆయనకే తెలియాలి. అయినా డైరెక్టర్ చెబితే చేశాడు పాపం, తన యాక్టింగ్ వరకు వంక పెట్టలేం.

వైష్ణవి చైతన్య: తెరపై చాలా క్యూట్‌గా ఉంది. మొదట్లో ఏకంగా ‘నో పెళ్లి’ అని కండిషన్స్ పెట్టిన ఈ మోడరన్ మహాలక్ష్మి, క్లైమాక్స్ వచ్చేసరికి మామూలు కన్నీళ్ల హీరోయిన్ అయిపోయి డైరెక్టర్ మార్క్ కన్ఫ్యూజన్‌ను మనకు పాస్ చేసింది.

కళ్యాణ్ శంకర్: ఈ సినిమాలో ఆడియన్స్‌కి దొరికిన ఏకైక ఆక్సిజన్ సిలిండర్ ఇతనే. మన ఫీలింగ్స్ అన్నీ స్క్రీన్ మీద పంచ్‌ల రూపంలో పేల్చి భలే రిలీఫ్ ఇచ్చాడు.

ప్లస్ పాయింట్స్..

లండన్ ఎలా ఉంటుందో ఫ్రీగా చూసి ఎంజాయ్ చేసేలా ఉన్న ఫస్ట్ హాఫ్.

సితార వాళ్లు నిర్మాణంలో ఎక్కడా రాజీ పడలేదు కాబట్టి లండన్ వ్యూస్ చాలా రిచ్ గా ఉన్నాయి.

వినడానికి భలేగా ఉన్న పాటలు.

థియేటర్‌లో బోర్ కొట్టకుండా ఆదుకున్న కళ్యాణ్ శంకర్ కామెడీ.

మైనస్ పాయింట్స్..

బయాలజీ క్లాసులు: ’90s’ సిరీస్‌తో భలే నవ్వించాడు కదా అని థియేటర్‌కి వెళ్తే.. సెకండ్ హాఫ్‌లో మన సహనానికి గట్టి పరీక్షే పెట్టాడు. హీరోయిన్ పీరియడ్స్, PCOD ప్రాబ్లమ్స్ గురించి పెట్టిన ఎమోషనల్ సీన్స్ చూస్తుంటే.. మనం సినిమా హాల్‌లో ఉన్నామా లేక గైనకాలజీ క్లాస్‌లో ఉన్నామా అనే డౌట్ రాక మానదు.

లాజిక్ లండన్ ఫ్లైట్ ఎక్కేసింది: క్లైమాక్స్‌లో పెళ్లి పీటల దాకా వెళ్లిన జంట సడన్‌గా ఎందుకు ఆగిపోయిందో లాజిక్ వెతకకండి. మొదటి నుంచి ‘బోల్డ్’ అని బిల్డప్ ఇచ్చిన హీరోయిన్‌ని చివర్లో డల్ చేసి, ‘ఎపిక్ – ఫైనల్ సెమిస్టర్’ అని పార్ట్ 2 కి ముడి పెట్టడానికి తీసుకున్న బలవంతపు మలుపు.

పేరెంట్స్ బీపీ పెంచే సిలబస్: విదేశాల్లో మనవాళ్లు ఎంత ‘స్వేచ్ఛ’గా బతుకుతున్నారో చూపించాలనే తాపత్రయం బాగానే ఉంది కానీ, ఈ డోస్ చూస్తే రేప్పొద్దున పేరెంట్స్ తమ పిల్లల్ని ఊరు కూడా దాటించరేమో!

సెకండ్ హాఫ్ విపరీతమైన సాగదీత వల్ల రిచ్ విజువల్స్, పాటలు అన్నీ గాల్లో కలిసిపోయాయి.

చివరి ఆఖరి మాటగా :-

లండన్ ఎలా ఉంటుందో ఫ్రీగా చూడాలనుకునేవాళ్లు ఫస్ట్ హాఫ్ చూసి ఎంజాయ్ చేయొచ్చు. సెకండ్ హాఫ్ చూస్తే మాత్రం విదేశీ విద్యపై విరక్తి రావడం గ్యారెంటీ. ఒక మోస్తరు అంచనాలతో వెళ్తే ఈ ‘ఫస్ట్ సెమిస్టర్’ ఎలాగోలా గట్టెక్కేయొచ్చు కానీ, ఓటీటీలోకి వచ్చేదాకా ఆగి ఫార్వర్డ్ చేసుకుంటూ చూస్తే మీ టైమ్, మనీ రెండు సేవ్ అవుతాయి!