The Family Man 3 Review : ‘ది ఫ్యామిలీ మ్యాన్ సీజన్ 3’ రివ్యూ

The Family Man 3 Review : మనోజ్ తివారీ వెబ్ సిరీస్ “ఫ్యామిలీ మ్యాన్” మొదటి సీజన్ 2019లో ప్రీమియర్ అయ్యి, భారీ విజయాన్ని సాధించింది. సరిగ్గా రెండు సంవత్సరాల తరువాత, రాజ్ & డికె రెండవ సీజన్‌ను రిలీజ్ చేశారు. అది కూడా అదుర్స్ అనిపించుకుంది. అయితే మూడవ సీజన్‌ను తెరపైకి తీసుకురావడానికి నిర్మాతలకు చాలా సమయం పట్టింది. దాదాపు నాలుగు సంవత్సరాల తర్వాత, “ఫ్యామిలీ మ్యాన్ సీజన్‌ 3” ఓటీటీలోకి వచ్చేసింది. నవంబర్ 21 అంటే ఈరోజే అమెజాన్ ప్రైమ్ వీడియోలో ఈ సిరీస్ భారీ అంచనాలతో విడుదలైంది. మరి ఆ అంచనాలను అందుకుందా ? అనేది రివ్యూలో చూద్దాం.

కథ :

నాగాలాండ్‌లోని కోహిమాలో జరిగిన సాంస్కృతిక ఉత్సవంలో జరిగిన బాంబు పేలుడుతో కథ ప్రారంభమవుతుంది. తర్వాత ఈశాన్యంలోని ఆరు ప్రధాన నగరాల్లో బాంబు దాడులు జరిగి వందలాది మంది మరణిస్తారు. దీని పర్యవసానాలు ఢిల్లీకి చేరుకుంటాయి. ప్రధాన మంత్రి బసు (సీమా బిశ్వాస్) సహకార్ ప్రాజెక్ట్ ద్వారా ఈశాన్య ప్రాంతంలో శాంతి, అభివృద్ధిని తీసుకురావాలని కోరుకుంటారు.

మరోవైపు ఫ్యామిలీ మ్యాన్ కు వైఫ్ తో ప్రాబ్లమ్స్ విడాకుల వరకూ వెళ్తాయి. పిల్లలకు కూడా ఈ విషయం తెలుస్తుంది. ఈ క్రమంలోనే శ్రీకాంత్ ఈ మిషన్ మీద వెళ్లాల్సి వస్తుంది. ఈ మిషన్‌కు టాస్క్ ఫోర్స్ చీఫ్ కులకర్ణి (దలీప్ తహిల్) నాయకత్వం వహిస్తాడు. అతను తన అత్యంత విశ్వసనీయ, సమర్థుడైన ఏజెంట్ శ్రీకాంత్ తివారీ (మనోజ్ బాజ్‌పేయి)తో కలిసి నాగాలాండ్‌కు వస్తాడు.

తిరుగుబాటు గ్రూపులను ఏకం చేయడంలో సహాయపడిన స్థానిక నాయకుడు డేవిడ్ ఖుజోను కోహిమాలో కలుస్తారు. అయితే ఈ పర్యటనలో, స్థానిక మాదకద్రవ్యాల వ్యాపారి రుక్మా (జైదీప్ అహ్లవత్) కులకర్ణి, డేవిడ్ ఇద్దరినీ చంపుతాడు. తీవ్రంగా గాయపడినప్పటికీ, శ్రీకాంత్ దాడి నుండి బయటపడతాడు. కానీ కులకర్ణి చనిపోతాడు. లండన్‌కు చెందిన ఫిక్సర్ మీరా (నిమ్రత్ కౌర్) ఆదేశం మేరకు రుక్మ ఈ దాడిని నిర్వహిస్తుంది.

కొత్త TASC అధికారి యతీష్ చావ్లా (హర్మాన్ సింఘా) పారిపోయిన శ్రీకాంత్ ను వెతకడానికి బయలుదేరుతాడు. శ్రీకాంత్ తాను నిర్దోషిని అని ఎలా నిరూపించుకుంటాడు? రుక్మాను పట్టుకునే తన మిషన్‌లో అతను విజయం సాధిస్తాడా? ఈ క్రమంలోనే అతని ఫ్యామిలీకి ఎదురైన కష్టాలు ఏంటి? అనేది సిరీస్ కథ.

విశ్లేషణ :

“ది ఫ్యామిలీ మ్యాన్” వెబ్ సిరీస్ రెండవ సీజన్ ఎండింగ్ నుంచి మూడవ సీజన్ స్టార్ట్ అవుతుంది. ఈసారి ఈశాన్యంతో పాటు, కథ లండన్, ఇస్లామాబాద్, మయన్మార్, ఢిల్లీ, ముంబైలకు కూడా ప్రయాణిస్తుంది. దర్శకద్వయం రాజ్ & డికె ఈసారి ఈశాన్య సమస్యలతో పాటు, వారు విదేశీ శక్తుల నుండి వచ్చే ముప్పుల సమస్యను ప్రస్తావించారు. వాటిలో చైనీస్ యాప్‌లపై నిషేధం కూడా ఉంది. ఈ సిరీస్‌ లో ఎక్కువ భాగం ఈశాన్య ప్రాంతంలో చిత్రీకరించారు. అయితే అక్కడి స్థానిక కళాకారులు, స్థానిక సంగీతాన్ని కూడా సిరీస్ లో అద్భుతంగా మిక్స్ చేశారు. సీజన్ 3లోని ప్రతి ఎపిసోడ్ దాదాపు 55 నిమిషాల నిడివి ఉంటుంది. మొదటి కొన్ని ఎపిసోడ్‌లు ఇంట్రెస్టింగ్ గా ఉంటాయి. కానీ మధ్యలో వేగం తగ్గి ప్రేక్షకుల సహనానికి పరీక్ష పెడుతుంది. చివరి ఎపిసోడ్‌లు చాలా వేగంగా కదులుతాయి. క్లైమాక్స్ నిరాశపరుస్తుంది.

PM బసు పాత్ర బలహీనంగా అనిపిస్తుంది. అతని నిర్ణయాలు అహంకారం లేదా ఇతరుల సలహా ద్వారా ఎక్కువగా ప్రభావితమవుతాయి. ఇది చికాకు కలిగిస్తుంది. అదేవిధంగా శ్రీకాంత్ ఇంటెలిజెన్స్‌లో ఉన్నాడని తెలుసుకున్నప్పుడు సుచి ఆశ్చర్యపోలేదు. రుక్మా ప్రేమకథ కూడా అసంపూర్ణంగా అనిపిస్తుంది. సిరీస్ గురించి చాలా ప్రశ్నలకు సమాధానం లేదు. నాల్గవ సీజన్‌లో వాటికి సమాధానం దొరికే ఛాన్స్ ఉంటుంది. ఒక్క మాటలో చెప్పాలంటే కొన్ని చిన్న లోపాలు ఉన్నప్పటికీ సీజన్ 3లో రాజ్ – డికె డిటెక్టివ్ డ్రామాపై తమ పట్టును నిలుపుకున్నారు. స్పై థ్రిల్ అండ్ ఫ్యామిలీ డ్రామాను బాగా బ్యాలెన్స్ చేశారు. కానీ కొన్ని పదాలు ప్రేక్షకులలో ఒక వర్గానికి అభ్యంతరకరంగా ఉండవచ్చు.

‘ది ఫ్యామిలీ మ్యాన్’ ప్రజాదరణకు ముఖ్య కారణం శ్రీకాంత్ నిర్లక్ష్య హాస్యం, యాక్షన్, భావోద్వేగాలు. ఇది సీజన్ 3 లో కూడా కొనసాగుతుంది. ఎప్పటిలాగే తన పాత్రలో మనోజ్ బాజ్ పేయి అద్భుతంగా నటించారు. మనోజ్ ఈ షోకి ప్రాణం అనడంలో ఎటువంటి సందేహం లేదు. విలన్ గా జైదీప్ అహ్లవత్ మరో అద్భుతం. సుచిత్రగ ప్రియమణి, నిమ్రత్ కౌర్, మిగతా నటీనటులు తమ పాత్రల పరిధిమేరకు బాగా నటించారు.