అంతరిక్ష చరిత్రలో అరుదైన ఘట్టం.. చంద్రుడికి అత్యంత చేరువగా వ్యోమనౌక

అంతరిక్ష పరిశోధన రంగంలో అమెరికా అంతరిక్ష సంస్థ నాసా సరికొత్త చరిత్ర సృష్టించింది. దాదాపు ఐదు దశాబ్దాల సుదీర్ఘ విరామం తర్వాత మానవుడిని మళ్లీ చంద్రుడి వద్దకు పంపే లక్ష్యంతో చేపట్టిన ఆర్టెమిస్‌-2 ప్రయోగం అద్భుత విజయాలను నమోదు చేస్తోందని చెప్పవచ్చు. ఈ యాత్రలో భాగంగా నలుగురు వ్యోమగాములు ప్రయాణిస్తున్న ఒరాయన్‌ వ్యోమనౌక భూమికి అత్యంత సుదూర ప్రాంతానికి చేరుకుంది. మొత్తం 4,06,773 కిలోమీటర్ల దూరం ప్రయాణించడం ద్వారా అంతరిక్ష చరిత్రలో ఇదే అతిపెద్ద రికార్డుగా నిలిచింది.

ఈ ప్రయోగం ముఖ్య ఉద్దేశమిదే..

ఈ ప్రయోగం ముఖ్య ఉద్దేశం.. చంద్రుడి ఉపరితలంపై మానవుడు శాశ్వత నివాసం ఏర్పరచుకునేందుకు కావాల్సిన పునాదులు వేయడమే. ఇందులో భాగంగానే నలుగురు వ్యోమగాములు చంద్రుడికి అత్యంత సమీపంలోకి వెళ్లారు. సాధారణంగా చంద్రుడి ముందు భాగం మాత్రమే మనకు కనిపిస్తుంది. ఈ ప్రయోగం ద్వారా వ్యోమగాములు చంద్రుడి అవతల వైపు ఉన్న చీకటి ప్రాంతాన్ని కూడా సందర్శించనున్నారు. ఒరాయన్‌ వ్యోమనౌక చంద్రుడి కక్ష్యను దాటుకుని వెనుక భాగానికి వెళ్లడం ద్వారా శాస్త్రవేత్తలకు సరికొత్త సమాచారం తెలియనుంది.

ఆర్టెమిస్ -2 సరికొత్త రికార్డ్

అంతరిక్ష యాత్రల చరిత్రలో ఇప్పటివరకు అపోలో మిషన్లు నెలకొల్పిన రికార్డులను ఆర్టెమిస్‌-2 అధిగమించింది. భూమి నుంచి ఇంత సుదూర ప్రాంతానికి చేరుకోవడం మానవ మేధస్సుకు ఒక నిదర్శనంగా నిలుస్తోందని చెప్పవచ్చు. వ్యోమగాములు అక్కడ ఉండే రేడియేషన్ ప్రభావాలను తట్టుకుంటూ సురక్షితంగా ప్రయాణించడం విశేషం.

ఈ 10 భూమికి తిరిగిరానున్న వ్యోమగాములు

ప్రస్తుతం చంద్రుడి చుట్టూ తన లక్ష్యాన్ని విజయవంతంగా పూర్తి చేసుకుంటున్న ఒరాయన్‌ వ్యోమనౌక తిరుగు ప్రయాణానికి సిద్ధమవుతోంది. ప్రణాళిక ప్రకారం ఈ నెల 10వ తేదీన వ్యోమగాములు తిరిగి భూమికి చేరుకోనున్నారు. పసిఫిక్ మహాసముద్రంలో వ్యోమనౌకను సురక్షితంగా దించేందుకు నాసా బృందాలు అన్ని ఏర్పాట్లు పూర్తి చేశాయి. ఈ యాత్ర విజయవంతమైతే తదుపరి ప్రయోగం ఆర్టెమిస్‌-3 ద్వారా చంద్రుడి ఉపరితలంపై వ్యోమగాములు కాలు మోపుతారు. ప్రపంచవ్యాప్తంగా ఉన్న ఖగోళ శాస్త్రవేత్తలు, సామాన్యులు ఈ చారిత్రక ఘట్టం కోసం ఎంతో ఆసక్తిగా ఎదురుచూస్తున్నారు.

ALSO READ: Artemis 2 Mission: చూసేందుకు కాదు.. పాగా వేసేందుకు.. ‘ఆర్టెమిస్ 2’ ప్లాన్ ఇదే!