NASA Coffee Cup: ఈ రోజుల్లో కాఫీకి ఉన్న క్రేజ్ అంతా ఇంతా కాదు. ముఖ్యంగా కాఫీ లవర్స్ దానిని పానియంలా కాకుండా ఓ ఏమోషన్ లా చూస్తుంటారు. రోజులో కనీసం 2-3 సార్లైనా కాఫీ చుక్క తగలాల్సిందే అన్నట్లుగా కొందరు వ్యవహరిస్తుంటారు. అలాంటి వారు అంతరిక్షంలోకి వెళ్తే పరిస్థితి ఏంటన్న ప్రశ్న సహజంగానే ఉత్పన్నమవుతుంది. అంతరిక్షంలో గురుత్వాకర్షణ శక్తి ఉండదు కాబట్టి అక్కడ కాఫీ తాగడం ఎంతో కష్టం. ఒకవేళ ప్రయత్నించినా.. కాఫీ చుక్కలు గాల్లో తేలిపోతుంటాయి. కాబట్టి ఈ సమస్యకు చెక్ పెడుతూ నాసా ఒక వినూత్నమైన కాఫీ కప్పును తయారు చేసింది. దీని వెనుక ఉన్న ఆసక్తికర విశేషాలేంటో ఇప్పుడు చూద్దాం.
సాధారణంగా భూమిపై ఉండే గురుత్వాకర్షణ శక్తి వల్ల ద్రవ పదార్థాలు.. గ్లాసు లేదా కప్పు అడుగు భాగంలో స్థిరంగా ఉంటాయి. కానీ అంతరిక్షంలోని మైక్రోగ్రావిటీ వాతావరణంలో పరిస్థితులు ఇందుకు పూర్తి భిన్నంగా ఉంటాయి. అక్కడ ద్రవాలు ఒకచోట స్థిరంగా ఉండవు. కప్పులో పోస్తే అవి ఉపరితలాలకు అంటుకుపోవడం, గాల్లో చిన్న చిన్న బుడగల్లా తేలిపోవడం జరుగుతుంది. అందుకే దశాబ్దాలుగా వ్యోమగాములు కాఫీ లేదా ఇతర పానీయాలను సీల్ చేసిన ప్లాస్టిక్ పౌచ్లు, స్ట్రాల సహాయంతో తాగాల్సి వచ్చేది.
కాఫీ సమస్యకు ముగింపు పలకాలని 2000వ సంవత్సరం ప్రారంభంలో నాసా శాస్త్రవేత్త మార్క్ వీస్లోగెల్ నేతృత్వంలోని బృందం ఒక సరికొత్త ప్రయోగానికి శ్రీకారం చుట్టింది. స్ట్రాలు, పంపులు ఏవీ లేకుండా సాధారణ కప్పులాగే తెరిచి ఉంచి తాగేలా ఒక కప్పును డిజైన్ చేయాలనుకుంది. గురుత్వాకర్షణ శక్తి లేకపోయినా, ద్రవాలకున్న ‘ఉపరితల తన్యత’ (Surface Tension), ‘కేశనాళికీయత’ (Capillary Action) అనే సహజ గుణాలను వాడుకుని సరికొత్త డిజైన్ను రూపొందించారు. దీనికి ‘క్యాపిలరీ బెవరేజ్ కప్’ (Capillary Beverage Cup) అని పేరు సైతం పెట్టారు.
నాసా కనుగొన్న ఈ కప్పు సాధారణ కప్పుల్లా గుండ్రంగా ఉండదు. దీనిని ఒక ప్రత్యేకమైన ‘కన్నీటి చుక్క’ (Teardrop) ఆకారంలో.. ఒకవైపు చాలా ఇరుకైన మలుపు ఉండేలా డిజైన్ చేశారు. ఈ ఇరుకైన భాగం ద్రవాన్ని కింది నుంచి పైకి.. అంటే వ్యోమగామి తాగే కప్పు అంచు వైపునకు సహజంగానే నెడుతుంది. దీనివల్ల స్ట్రాలు లేకపోయినా అంతరిక్షంలో కాఫీని సాధారణ కప్పుతో తాగిన అనుభూతి కలుగుతుంది. ఈ వినూత్న కప్పును 2015లో అంతర్జాతీయ అంతరిక్ష కేంద్రం (ISS)లో విజయవంతంగా పరీక్షించారు.
Also Read: రూ.16,350 కోట్ల పెట్టుబడి.. రెండేళ్లలో ఉత్పత్తి.. స్టీల్ ప్లాంట్పై చంద్రబాబు గ్యారంటీ!
ఈ కప్పు అంతరిక్షంలో వ్యోమగాములకు కాఫీ రుచిని ఆస్వాదించడానికి మాత్రమే పరిమితం కాదని నాసా పరిశోధకలు చెబుతున్నారు. దీని వెనుక ఉన్న ‘క్యాపిలరీ ఫ్లో’ (ద్రవాల ప్రవాహ) సాంకేతికత అంతరిక్ష పరిశోధనల్లో చాలా కీలకం కానుందని పేర్కొంటున్నారు. భవిష్యత్తులో చంద్రుడు, అంగారకుడి (Mars) పైకి చేపట్టబోయే మానవ సహిత యాత్రల్లో ఇది ఎంతో కీలకంగా మారుతుందని భావిస్తున్నారు. అలాగే స్పేస్క్రాఫ్ట్ ఇంధన నిల్వ వ్యవస్థలను మెరుగుపరచడానికి, నీటి పునరుత్పత్తి సాంకేతికతకు, వ్యోమగాముల ప్రాణరక్షణ వ్యవస్థల డిజైనింగ్కు ఈ పరిశోధన దోహదం చేస్తుందని అంచనా వేస్తున్నారు.
Also Read: టీవీ, ఏసీలపై ఆఫర్ల వర్షం.. 40% డిస్కౌంట్, రూ.10 వేల క్యాష్ బ్యాక్.. సామాన్యులకు పండగే!
Share
Kissik Talks: టీవీ ఇండస్ట్రీ నన్ను వెలేసింది.. షాకింగ్ నిజాలు బయటపెట్టిన సోనియా!
ఇలాంటి గాడ్జెట్స్ కోసమే కదా టెక్ ప్రియులు ఎదురుచూసేది.. ఫీచర్లు చూస్తే వెంటనే కొనాలనిపిస్తుంది!
