TRAI : ట్రాయ్ కొత్త రూల్స్.. ఇకపై 90 రోజులు రీఛార్జ్ చేయకపోయినా నో ప్రాబ్లమ్

TRAI : టెలికాం అండ్ రెగ్యులేటరీ అథారిటీ ఆఫ్ ఇండియా (TRAI) కొత్త నిబంధనలను ప్రవేశపెట్టింది. దీని ప్రకారం టెల్కోలు 90 రోజుల చెల్లుబాటును అందించాలి.

ఎప్పటికప్పుడు సిమ్ కార్డ్ యూజర్స్ కోసం బెస్ట్ రూల్స్ ను తీసుకువస్తున్న టెలికాం రెగ్యులేటరీ అథారిటీ తాజాగా మరో కొత్త రూల్ ను తీసుకువచ్చింది. వినియోగదారులు అందరికీ ఎక్కువగా ఇబ్బంది పెట్టే సమస్య రీఛార్జ్ లేకపోతే సిమ్ డీ యాక్టివేట్ కావటం. నిజానికి రెండు సిమ్ కార్డ్స్ ఉపయోగించే వారికి ఈ సమస్య మరింత ఎక్కువగా ఉంటుంది. కొన్ని రోజులపాటు రీఛార్జ్ చేయకపోతే సిమ్ ను టెలికాం సంస్థలు వేరే వాళ్లకు విక్రయించే అవకాశం సైతం ఉంది. తాజాగా ఈ రూల్స్ ను సడలిస్తూ ట్రాయ్ కొత్త నిబంధనలు తీసుకొచ్చింది.

టెలికాం రెగ్యులేటరీ అథారిటీ ఆఫ్ ఇండియా (TRAI) వినియోగదారులకు మరింత ప్రయోజనకరంగా ఉండేలా SIM చెల్లుబాటు కోసం కొత్త నిబంధనలను ప్రవేశపెట్టింది. కొత్త నిబంధనల ప్రకారం, వినియోగదారులు ఉపయోగించని సిమ్ కార్డులు ఎక్కువ కాలం అందుబాటులో ఉంటాయి. రెండు సిమ్ కార్డ్‌లను కలిగి ఉన్న వినియోగదారులకు ఖర్చులు తగ్గించడంపై దృష్టి పెట్టింది.

వొడాఫోన్ ఐడియాతో ప్రారంభించి టెలికాం కంపెనీ రీఛార్జ్‌పై ఖర్చు చేయకుండా 90 రోజుల గ్రేస్ పీరియడ్‌ను ప్రవేశపెట్టింది. ఈ వ్యవధి తర్వాత నంబర్‌ను యాక్టివేట్‌గా ఉంచడానికి వినియోగదారులు కనీస రూ.49 ప్లాన్‌తో వారి నంబర్‌ను రీఛార్జ్ చేసుకోవాలి.

అదే విధంగా ఎయిర్‌టెల్ వినియోగదారులందరికీ ఎటువంటి రీఛార్జ్ లేకుండా 90 రోజుల చెల్లుబాటు ఉంటుంది. వినియోగదారులు తమ నంబర్‌ను మళ్లీ యాక్టివేట్ చేయడానికి 15 రోజుల గ్రేస్ పీరియడ్‌ను పొందొచ్చు. ఈ వ్యవధి తర్వాత రీఛార్జ్ చేయకపోతే నంబర్ డీయాక్టివేట్ అవుతుంది. ఆపై సిమ్ ను వేరే వారికి ఇచ్చే ఛాన్స్ ఉంటుంది.

జియో సిమ్ వినియోగదారులు తమ సిమ్ కార్డ్‌ని 90 రోజుల పాటు ఎటువంటి రీఛార్జ్ లేకుండా యాక్టివ్‌గా ఉంచుకునే సదుపాయాన్ని కల్పిస్తుంది. ఈ వ్యవధి తర్వాత వినియోగదారులు రీయాక్టివేషన్ ప్లాన్‌ను కలిగి ఉండాలి. 90 రోజుల వ్యవధిలో ఇన్‌కమింగ్ కాల్స్, చివరి రీఛార్జ్ ఆధారంగా ఒక నెల వరకు మారే అవకాశం ఉంటుంది. వినియోగదారులు 90 రోజుల తర్వాత నంబర్‌ను రీఛార్జ్ చేయకపోతే కొత్త వినియోగదారులకు విక్రయించడానికి ఆ నంబర్ మార్కెట్‌లో ఉండే ఛాన్స్ ఉంటుంది.

BSNLకు స్పెషల్ ఆఫర్ –

ఇక ఎప్పటికప్పుడు తన కస్టమర్స్ కోసం లేటెస్ట్ రీఛార్జ్ ప్లాన్స్ ను అందుబాటులోకి తీసుకువచ్చేస్తూ అతి తక్కువ ధరలకే ప్రైవేట్ టెలికాం సంస్థలకు షాక్ ఇస్తున్న బిఎస్ఎన్ఎల్.. మరోసారి తన యూజర్స్ కోసం స్పెషల్ ఆఫర్ ను ప్రకటించింది. ఈ ఆఫర్ ప్రకారం బిఎస్ఎన్ఎల్ వినియోగదారుడు ట్రాయ్ తీసుకువచ్చిన కొత్త నిబంధనలో మరింత మెరుగైన ప్రయోజనాలను పొందే అవకాశం ఉంటుంది.

BSNL వినియోగదారుడు వారి నంబర్‌పై కనీసం రూ.20 రూపాయల ప్రీపెయిడ్ బ్యాలెన్స్ ఉంటే బ్రాండ్ 90 రోజుల చెల్లుబాటును అందిస్తోంది. కాబట్టి, ఇతర బ్రాండ్‌లతో పోలిస్తే చెల్లుబాటును అందించే విషయంలో BSNL మళ్లీ అగ్రస్థానంలో ఉంది. 90 రోజుల తర్వాత, సిమ్ యాక్టివేషన్‌లను అదనంగా 30 రోజుల పాటు పొడిగించడానికి ఈ ప్లాన్ పనిచేస్తుంది. దానికి సంబంధించిన బ్యాలెన్స్ సరిపోకపోతే, సిమ్ డియాక్టివేట్ చేయబడుతుంది.