Australia : యాషెస్ సిరీస్ తొలి టెస్టులో ఇంగ్లాండ్ కు ఆస్ట్రేలియా షాక్ ఇచ్చింది. ఉత్కంఠ భరితంగా సాగిన పోరులో 2 వికెట్ల తేడాతో ఆసీస్ విజయం సాధించింది. 281 పరుగుల టార్గెట్ ను ఛేదించింది. ఓవర్ నైట్ స్కోర్ 107 /3తో చివరి రోజు ఆస్ట్రేలియా రెండో ఇన్నింగ్స్ ను కొనసాగించింది. ఆసీస్ విజయానికి 174 పరుగులు కావాలి. ఇంగ్లాండ్ గెలవాలంటే 7 వికెట్లు తీయాలి. అయితే వర్షం వల్ల లంచ్ వరకు మ్యాచ్ ప్రారంభం కాలేదు. దీంతో మ్యాచ్ డ్రాగా ముగుస్తుందేమో అనిపించింది. అయితే మధ్యాహ్నం తర్వాత మ్యాచ్ ప్రారంభమైంది.
ఇంగ్లాండ్ బౌలర్లు కట్టుదిట్టంగా బౌలింగ్‌ చేయడంతో 143 పరుగులకే ఆసీస్ 5 వికెట్లు కోల్పోయింది. అయితే ఓపెనర్ ఉస్మాన్ ఖవాజా (65) ఒంటరి పోరాటం చేశాడు. కామెరూన్ గ్రీన్ (28) తో కలిసి జట్టు స్కోర్ ను పెంచాడు. ఈ ఇద్దరు అవుటైన తర్వాత మరోసారి ఆస్ట్రేలియా కష్టాల్లో పడింది. కాసేపటికే క్యారీ కూడా పెవిలియన్ చేరాడు. దీంతో ఆసీస్ 227 పరుగులకే 8 వికెట్లు కోల్పోయింది.
ఈ సమయంలో ఆసీస్ విజయం సాధించాలంటే ఇంకా 54 పరుగులు చేయాలి. కీలక బ్యాటర్లంతా పెవిలియన్ చేరారు. ఇక ఇంగ్లాండ్ విజయం లాంఛనమే అనిపించింది. అయితే కెప్టెన్ కమిన్స్ (44 నాటౌట్), నాథన్ లయన్ (16 నాటౌట్ ) అద్భుతంగా పోరాటం చేశారు. 9వ వికెట్ కు అజేయంగా 55 పరుగులు జోడించి ఆసీస్ కు విజయాన్ని అందించారు. తొలి ఇన్నింగ్స్ ను తొలిరోజు డిక్లేర్ చేయడం ఇంగ్లాండ్ కొంపముంచింది. తొలి ఇన్నింగ్స్ లో అద్భుతంగా ఆడి సెంచరీ (141 ) చేసిన ఉస్మాన్ ఖవాజాకు ప్లేయర్ ఆఫ్ ది మ్యాచ్ అవార్డు దక్కింది.
ఇంగ్లాండ్ తొలి ఇన్నింగ్స్‌లో 8 వికెట్ల నష్టానికి 393 పరుగులు చేసి డిక్లేర్ చేసింది. రెండో ఇన్నింగ్స్‌లో 273 పరుగులకు ఆలౌట్ అయ్యింది. ఆసీస్ ఫస్ట్ ఇన్నింగ్స్‌లో 386 పరుగులకు ఆలౌట్ అయింది. ఈ విజయంతో 5 టెస్టుల సిరీస్‌లో ఆస్ట్రేలియా 1-0 ఆధిక్యంలో కొనసాగుతోంది. ఇరు జట్ల మధ్య రెండో మ్యాచ్ ఈ నెల 28న మొదలవతుంది.
స్కోర్లు..
ఇంగ్లాండ్- 393/8d & 273
ఆస్ట్రేలియా- 386 & 282/8
Share
Revanth Reddy : పొంగులేటి, జూపల్లితో భేటీ కానున్న రేవంత్ .. కాంగ్రెస్ లో చేరికపై చర్చ..
Jagan : ఎన్నికలే టార్గెట్ .. ఆ కార్యక్రమాలపై జగన్ ఫోకస్..
