హైదరాబాద్‌లో స్టార్ హోటల్‌కి భారీ షాక్.. రూ. 20 లక్షల ఫైన్.. అసలేం జరిగిందంటే?

Hyderabad Hotels: తెలంగాణ హైకోర్టు ఇటీవల ఒక సంచలన తీర్పును వెలువరించింది. విద్యుత్ సర్‌చార్జి వివాదానికి సంబంధించి రెండు ప్రముఖ హోటల్ గ్రూపులు దాఖలు చేసిన రిట్ పిటిషన్లను కొట్టివేయడమే కాకుండా, న్యాయస్థానాన్ని తప్పుదోవ పట్టించేందుకు ప్రయత్నించినందుకు గాను భారీ జరిమానా విధించింది. నిజాలను దాచిపెట్టి, అపవిత్రమైన చేతులతో కోర్టును ఆశ్రయించారనే ఆగ్రహంతో, పిటిషన్లు దాఖలు చేసిన రెండు హోటల్స్ యాజమాన్యాలకు చెరో రూ. 10 లక్షల చొప్పున మొత్తం రూ.20 లక్షలు ఆదర్శప్రాయమైన పెనాల్టీ విధిస్తూ జస్టిస్ నాగేష్ భీమపాక నేతృత్వంలోని సింగిల్ బెంచ్ బుధవారం కీలక ఉత్తర్వులు జారీ చేసింది.

వివాదం ఏమిటి? హోటళ్ల వాదన ఏంటి?
హైదరాబాద్‌లోని ప్రముఖ బి. సుందర్ రావు హోటల్స్, అలాగే సుందర్ తాజ్ మహల్ హోటల్స్ ఈ న్యాయపోరాటానికి దిగాయి. తెలంగాణ రాష్ట్ర దక్షిణ విద్యుత్ పంపిణీ సంస్థ తమకు జారీ చేసిన క్రాస్-సబ్సిడీ సర్‌చార్జి డిమాండ్ నోటీసులను సవాలు చేస్తూ వీరు హైకోర్టును ఆశ్రయించారు. ఇందులో ఒక హోటల్ 2005-06 నుంచి 2014-15 కాలానికి గాను రూ. 27.5 లక్షల డిమాండ్‌ను, మరో హోటల్ ఏకంగా రూ. 77.7 లక్షల విద్యుత్ బకాయిల డిమాండ్‌ను వ్యతిరేకించాయి. విద్యుత్ చట్టం-1948 ప్రకారం గుర్తింపు పొందిన రైన్ కాల్సైనింగ్ అనే జనరేటర్ నుండి తాము నేరుగా విద్యుత్‌ను పొందుతున్నామని, కాబట్టి 2005 నాటి కేంద్ర నిబంధనల ప్రకారం తమకు సర్‌చార్జి నుంచి మినహాయింపు ఉందని హోటల్ నిర్వాహకులు వాదించారు.

TGSPDCL కౌంటర్
అయితే, హోటల్ నిర్వాహకుల వాదనలను టీజీఎస్‌పీడీసీఎల్ తరఫు స్టాండింగ్ కౌన్సిల్ ఎన్. శ్రీధర్ రెడ్డి తీవ్రంగా అభ్యంతర పెట్టారు. ఈ పిటిషన్లు చట్టబద్ధంగా విచారణకు అర్హమైనవి కాదంటూ కోర్టు దృష్టికి కొన్ని సంచలన విషయాలను తీసుకొచ్చారు. సదరు హోటళ్లు గతంలోనే ఇదే డిమాండ్ నోటీసులపై హైకోర్టును ఆశ్రయించాయని, అయితే ఆ తర్వాత ఎలాంటి ముందస్తు అనుమతి లేదా మళ్లీ పిటిషన్ వేసే స్వేచ్ఛ తీసుకోకుండానే ఆ కేసులను ఉపసంహరించుకున్నాయని నిరూపించారు. అంతటితో ఆగకుండా, తాము కట్టాల్సిన సర్‌చార్జి బకాయిలను వాయిదాల పద్ధతిలో చెల్లించేందుకు వీలు కల్పించాలని విద్యుత్ సంస్థను ఆశ్రయించిన విషయాన్ని కూడా పక్కా ఆధారాలతో కోర్టు ముందుంచారు.

నిజాలు దాచినందుకు కోర్టు ఆగ్రహం
రెండు వైపులా వాదనలు విన్న హైకోర్టు.. విద్యుత్ సంస్థ లేవనెత్తిన సాంకేతిక, నైతిక అభ్యంతరాలతో పూర్తిగా ఏకీభవించింది. ఒకసారి పిటిషన్ ఉపసంహరించుకున్నాక, మళ్లీ అదే అంశంపై కొత్తగా రిట్ పిటిషన్ దాఖలు చేయడం చట్టవిరుద్ధమని స్పష్టం చేసింది. అన్నింటికంటే ముఖ్యంగా, తాము బకాయిలు చెల్లించడానికి వాయిదాల సదుపాయం కోరిన విషయాన్ని, పాత కేసుల వివరాలను పిటిషనర్లు ఉద్దేశపూర్వకంగా కోర్టుకు చెప్పకుండా దాచిపెట్టారని న్యాయమూర్తి తీవ్రంగా పరిగణించారు. న్యాయస్థానానికి రావాలనుకునే వారు స్వచ్ఛమైన మనసుతో, నిజాయితీతో రావాలని, ఇలాంటి వాస్తవాల దాగివేత సహించరానిదని కోర్టు వ్యాఖ్యానించింది.

జరిమానా ఎక్కడికి వెళ్తుంది?
నిజాలను కప్పిపుచ్చి న్యాయవ్యవస్థ సమయాన్ని వృధా చేసినందుకు గాను పిటిషనర్లకు గట్టి గుణపాఠం చెబుతూ జడ్జిమెంట్ ఇచ్చింది. ఇరు హోటళ్లకు విధించిన రూ. 10 లక్షల చొప్పున మొత్తం రూ. 20 లక్షల జరిమానాను తెలంగాణ రాష్ట్ర న్యాయ సేవల అథారిటీకి చెల్లించాలని కోర్టు ఆదేశించింది. వ్యాపార సంస్థలు చట్టపరమైన వెసులుబాటును ఆసరాగా చేసుకుని విద్యుత్ సంస్థల రాబడికి గండికొట్టే ప్రయత్నం చేయడం, కోర్టులను తప్పుదోవ పట్టించడం వంటి చర్యలపై ఈ తీర్పు ఒక బలమైన హెచ్చరికగా నిలుస్తుందని న్యాయ నిపుణులు భావిస్తున్నారు.

Also Read: అల్జీరియాలో భారీ అగ్నిప్రమాదం.. 11 మంది అనాథలు సజీవదహనం, 19 మందికి తీవ్ర గాయాలు

Share

• 
• 
• 
• 
• 
•