బీజేపీ పార్టీ నాయకులపై కాంగ్రెస్ సీనియర్ నేత, మాజీ ఎమ్మెల్యే జగ్గారెడ్డి తీవ్రంగా ఖండించారు. మంగళవారం గాంధీ భవన్లో ఏర్పాటు చేసిన విలేకరుల సమావేశంలో ఆయన మాట్లాడారు. బీజేపీ నేతలు చేస్తున్న ఆరోపణలకు ఎలాంటి విలువ లేదని కొట్టిపారేశారు. ప్రజల సమస్యల గురించి చర్చించడం మానేసి కేవలం రేవంత్ రెడ్డిని వ్యక్తిగతంగా లక్ష్యం చేసుకోవడం సరైన పద్ధతి కాదని ఆయన హితవు పలికారు. రేవంత్ రెడ్డి ప్రజా క్షేమం కోసం పని చేస్తున్నారని ఆయన పేర్కొన్నారు.
మంత్రి పొంగులేటి శ్రీనివాస్ రెడ్డిపై వస్తున్న ఆరోపణలపై కూడా జగ్గారెడ్డి స్పందించారు. మంత్రిపై చేస్తున్న విమర్శల్లో వాస్తవం లేదని అభిప్రాయపడ్డారు. ముఖ్యంగా సంగారెడ్డి ప్రాంతంలో పొంగులేటి శ్రీనివాస్ రెడ్డి ఎలాంటి భూ దందాలకు పాల్పడలేదని స్పష్టం చేశారు. ఆయన గురించిన పూర్తి సమాచారం తన దృష్టికి ఇంకా రాలేదని చెబుతూనే ప్రత్యర్థుల విమర్శలను తిప్పికొట్టారు. రాజకీయంగా ఎదుర్కోలేకనే ఇలాంటి అసత్య ప్రచారాలు చేస్తున్నారని మండిపడ్డారు.
గతంలో తనపై జరిగిన రాజకీయ వేధింపులను ఈ సందర్భంగా జగ్గారెడ్డి గుర్తు చేసుకున్నారు. 2014 తర్వాత తనను ఇబ్బంది పెట్టాలని అప్పటి ప్రభుత్వం తీవ్రంగా ప్రయత్నించిందని ఆరోపించారు. తాను ఎక్కడైనా చిన్న తప్పు చేసినా పట్టుకోవాలని చూశారని వివరించారు. ఎక్కడా ఎలాంటి అవకతవకలు దొరకకపోవడంతో అధికారులు నిరాశ చెందారని ఎద్దేవా చేశారు. కేసీఆర్ ఒత్తిడి వల్ల అధికారులు తనపై ఏదో ఒక చర్య తీసుకోవాలని భావించినా అది సాధ్యపడలేదని ధీమా వ్యక్తం చేశారు.
నియోజకవర్గాల పునర్విభజన (డీలిమిటేషన్) అంశంపై ముఖ్యమంత్రి రేవంత్ రెడ్డి గళమెత్తారని జగ్గారెడ్డి తెలిపారు. డీలిమిటేషన్ వల్ల దక్షిణాది రాష్ట్రాలకు జరిగే అన్యాయాన్ని రేవంత్ రెడ్డి సమర్థవంతంగా వివరించారని కొనియాడారు. ఈ విషయాన్ని జీర్ణించుకోలేకనే బీజేపీ నేతలు ముఖ్యమంత్రిని టార్గెట్ చేస్తున్నారని విశ్లేషించారు. రాజకీయ ప్రయోజనాల కోసం రాష్ట్ర ప్రయోజనాలను తాకట్టు పెట్టవద్దని సూచించారు. కాంగ్రెస్ ప్రభుత్వం ప్రజల పక్షాన నిలబడుతుందని స్పష్టం చేశారు.
Share
రష్మిక పెళ్లి మేకప్ కోసం అంత సమయం పట్టిందా.. ఆ విషయంలో కండిషన్లు పెట్టిన నటి!
లీటర్కు 45 కిమీ మైలేజీ.. ఆటో మోబైల్ ఇండస్ట్రీలో కొత్త కారు సంచలనం!
