Jubilee Hills bypoll: జూబ్లీహిల్స్ బైపోల్.. సీఎం రేవంత్ రెడ్డి వ్యూహం.. బీఆర్ఎస్ గుండెల్లో గుబులు..!

అధికారంలోకి వ‌చ్చిన త‌రువాత కాంగ్రెస్ పార్టీ జూబ్లీహిల్స్‌లో చేపట్టిన అభివృద్ధి ప‌నుల గురించి జనాలు ఎక్కువగా మాట్లాడుకుంటున్నారు. పదేళ్లు పాలనలో ఉన్న బీఆర్ఎస్ తో పోలిస్తే రెండేళ్లు అధికారంలో ఉన్న కాంగ్రెస్ పార్టీనే అభివృద్ది వైపు దూసుకెళ్తుందనే టాక్ ఎక్కువగా వినిపిస్తోంది. ఈ క్రమంలో న‌వీన్ యాద‌వ్ అభ్య‌ర్థ‌త్వాన్ని కాంగ్రెస్ ప్ర‌క‌టించ‌గానే ప్ర‌జ‌ల ఆద‌ర‌ణ రెట్టింపు అయ్యింది. మరోవైపు, బీఆర్ఎస్ అభ్య‌ర్థి మాగంటి సునీత వ్య‌వ‌హార‌శైలి న‌చ్చ‌క నియోజ‌క‌వ‌ర్గ ప్ర‌జ‌ల నుంచే కాకుండా సొంత కుటుంబం నుంచి కూడా ఆమెకు మ‌ద్ద‌తు కరువైందన్న చ‌ర్చ కూడా బయట నడుస్తోంది.

⦿ లక్ష మందికి సంక్షేమ పథకాలు లబ్ది..

సీఎం రేవంత్ రెడ్డి అమ‌లు చేసిన వ్యూహాలను బీఆర్ఎస్ పసిగ‌ట్టేలోపే అవి చాప‌కింద నీరులా నియోజ‌క‌వ‌ర్గాన్ని చుట్టేస్తున్నాయి. స్థానికంగా ఈ వ్యూహాల గురించే ప్ర‌జ‌లు చ‌ర్చించుకొనే ప‌రిస్థితి ఎక్కువగా క‌నిపిస్తోంది. ఇక్క‌డి అన్ని డివిజ‌న్ల బాధ్య‌త‌ల‌ను సీనియ‌ర్ మంత్రుల‌కు అప్ప‌గించి చేపట్టిన అభివృద్ధి ప‌నులపై స్థానికులు హ‌ర్షం వ్య‌క్తం చేస్తున్నారు. అలాగే.. నియోజకవర్గంలో ఉన్న 3.98 ల‌క్ష‌ల ఓట‌ర్ల‌లో లక్ష మంది ప్ర‌భుత్వ సంక్షేమ ప‌థ‌కాల ద్వారా ల‌బ్ధిపొందడం కాంగ్రెస్‌కు బలమైన సానుకూలాంశంగా మారింది.

⦿ ఇది సీఎం రేవంత్ రాజకీయ చాణక్యత..

ఈ ఉపఎన్నిక‌లో ఎంఐఎం మ‌ద్ద‌తును కూడ‌గ‌ట్ట‌డం ద్వారా సీఎం రేవంత్ రెడ్డి త‌న రాజ‌కీయ చాణ‌క్య‌త‌ను ప్ర‌ద‌ర్శించారు. ఈ వ్యూహం నియోజ‌క‌వ‌ర్గంలోని బలమైన మైనారిటీలు గంప‌గుత్త‌గా కాంగ్రెస్ వైపు చూసేలా చేసింది. ఇది బీఆర్ఎస్‌కు పెద్ద షాక్ అనే చెప్పవచ్చు. అంతేకాకుండా, మైనారిటీల‌కు ప్రాతినిధ్యం ద‌క్క‌లేద‌న్న విమ‌ర్శ‌ల‌కు చెక్ పెడుతూ.. అజారుద్దీన్‌ను క్యాబినెట్‌లోకి తీసుకోవాల‌ని నిర్ణయించడం ద్వారా రేవంత్ రెడ్డి విప‌క్షాల నోళ్లు మూయించగలిగారు.

⦿ కమ్మ సామాజిక వర్గం ఎటువైపు..?

గ‌తంలో బీఆర్ఎస్ వైపు ఉన్న క‌మ్మ సామాజిక వ‌ర్గం కేటీఆర్‌పై ఉన్న అహంకార‌పూరిత వైఖ‌రి న‌చ్చ‌క బీఆర్ఎస్‌కు దూర‌మైంది. ఈ క్ర‌మంలో మంత్రి తుమ్మ‌ల నాగేశ్వరరావును రంగంలోకి దింపిన సీఎం రేవంత్ రెడ్డి, ఆ వ‌ర్గం కాంగ్రెస్‌కు మ‌ద్ద‌తు ప్ర‌క‌టించేలా చేయగలిగారు. నియోజ‌క‌వ‌ర్గంలో బల‌మైన యాద‌వ సామాజిక వ‌ర్గాన్ని ఏకపక్షంగా తమ వైపు తిప్పుకోవడానికి సీనియ‌ర్ల‌ను కాద‌ని న‌వీన్ యాద‌వ్‌కు టికెట్ కేటాయించారు. దీనితో పాటు ముదిరాజ్ పోరాట స‌మితి, బీసీ సంక్షేమ స‌మితి వంటి సంఘాలు కాంగ్రెస్‌కు మ‌ద్ద‌తు ప్ర‌క‌టించ‌డానికి మార్గం సుగమమైంది.

⦿ ప్ర‌చారానికి ముందే వ్యూహాల అమ‌లు..

జూబ్లీహిల్స్‌లో అత్య‌ధికంగా ఉండే సినీ కార్మికుల వేత‌నాల పెంపు విషయంలో సీఎం రేవంత్ రెడ్డిది కీల‌క పాత్ర. స‌మ్మెకు దిగిన కార్మిక సంఘాల‌తో సినిమాటోగ్ర‌ఫీ మంత్రి కోమ‌టిరెడ్డి వెంక‌ట్‌ రెడ్డి ద్వారా చ‌ర్చ‌లు జరిపించి.. వారి వేత‌నాల పెంపున‌కు చిత్ర‌ప‌రిశ్ర‌మ నిర్మాత‌లు అంగీక‌రించేలా చేశారు. దీనిపై హ‌ర్షం వ్య‌క్తం చేసిన సినీ కార్మిక సంఘాలు ఇటీవ‌ల సీఎంను స‌న్మానించడం రేవంత్ రెడ్డి రాజకీయ చతురతకు నిదర్శనం. విశ్లేషకుల అభిప్రాయం ప్రకారం.. రాజ‌కీయంగా, అభివృద్ధి ప‌రంగా, సామాజికంగా వ్యూహాత్మ‌కంగా పావులు క‌దిపిన సీఎం రేవంత్ రెడ్డి ఎన్నికల ప్రచారం ప్రారంభానికి ముందే కాంగ్రెస్ పార్టీని జూబ్లీహిల్స్‌లో తిరుగులేని శ‌క్తిగా నిలబెట్టగలిగారు.

ALSO READ: Jubilee Hills bypoll: ఇప్పుడు ఏడ చూసినా ఒక్కటే ముచ్చట.. జూబ్లీలో పాగా వేసేదెవరు..? నిజంగా జూబ్లీ కింగ్ ఎవరు?