Municipal Elections 2026: తెలంగాణలో మున్సిపల్ పోరుకు సర్వం సిద్ధం.. రేపే 123 పట్టణ సంస్థలకు పోలింగ్

Municipal Elections 2026: తెలంగాణలో మున్సిపల్ ఎన్నికల నగారా మోగింది. పట్టణ స్థానిక సంస్థల ప్రతినిధులను ఎన్నుకునేందుకు రాష్ట్రం సిద్ధమైంది. రాష్ట్ర వ్యాప్తంగా మొత్తం 123 పట్టణ స్థానిక సంస్థలకు రేపు పోలింగ్ నిర్వహించనున్నారు. ఇందులో 7 మున్సిపల్ కార్పొరేషన్లు, 116 మున్సిపాలిటీలు ఉన్నాయి. మొత్తం 2,996 వార్డుల్లో తమ ప్రతినిధులను ఎన్నుకునేందుకు ఓటర్లు సిద్ధమవుతున్నారు. పట్టణ ప్రాంతాల్లో ప్రజాస్వామ్య పండుగను విజయవంతం చేసేందుకు రాష్ట్ర ఎన్నికల సంఘం పకడ్బందీ చర్యలు చేపట్టింది.

ఈ ఎన్నికల బరిలో మొత్తం 12,930 మంది అభ్యర్థులు తమ అదృష్టాన్ని పరీక్షించుకుంటున్నారు. ప్రధాన రాజకీయ పార్టీలైన కాంగ్రెస్, బీఆర్ఎస్, బీజేపీతో పాటు పలు స్వతంత్ర అభ్యర్థులు కూడా గెలుపే లక్ష్యంగా ప్రచారాన్ని హోరెత్తించారు. సుమారు 52.43 లక్షల మంది ఓటర్లు తమ ఓటు హక్కును వినియోగించుకోనున్నారు. విశేషమేమిటంటే, ఈసారి పురుషుల కంటే మహిళా ఓటర్లే అధికంగా ఉండటం గమనార్హం.

ఎన్నికల ప్రక్రియను ప్రశాంతంగా నిర్వహించేందుకు పోలీస్ యంత్రాంగం భారీ భద్రతను ఏర్పాటు చేసింది. సుమారు 11,000 కెమెరాలతో నిరంతర నిఘా ఉంచడంతో పాటు, సమస్యాత్మక ప్రాంతాల్లో అదనపు బలగాలను మోహరించారు. పోలింగ్ కేంద్రాల వద్ద ఓటర్లకు ఎలాంటి ఇబ్బందులు కలగకుండా మౌలిక సదుపాయాలు కల్పించారు. ఇప్పటికే ఎన్నికల సామాగ్రిని ఆయా కేంద్రాలకు తరలించారు.

రాష్ట్ర ఎన్నికల సంఘం ప్రకటించిన షెడ్యూల్ ప్రకారం, రేపు పోలింగ్ ముగిసిన అనంతరం ఫిబ్రవరి 13న ఓట్ల లెక్కింపు చేపడతారు. అదే రోజు ఫలితాలను కూడా వెల్లడిస్తారు. ఈ ఫలితాల ఆధారంగా ఏ పార్టీ పట్టణ స్థానిక సంస్థలపై పట్టు సాధిస్తుందో స్పష్టం కానుంది. గెలిచిన వార్డు సభ్యులు, కార్పొరేటర్లతో ఫిబ్రవరి 16న ప్రమాణ స్వీకారం చేయిస్తారు.

వార్డు సభ్యుల ప్రమాణ స్వీకారం ముగిసిన వెంటనే, అదే రోజు (ఫిబ్రవరి 16న) మధ్యాహ్నం 12:30 గంటలకు ప్రత్యేక సమావేశం నిర్వహిస్తారు. ఈ సమావేశంలో మున్సిపల్ ఛైర్మన్లు, వైస్ ఛైర్మన్లు, అలాగే కార్పొరేషన్ల మేయర్లు, డిప్యూటీ మేయర్లను ఎన్నుకుంటారు. ఈ ఎన్నికలను ‘చేతులెత్తే పద్ధతి’ (Show of hands) ద్వారా నిర్వహించాలని ఎస్ఈసీ స్పష్టమైన ఆదేశాలు జారీ చేసింది.

Also Read: కమలంలో కల్లోలం.. బీజేపీ మున్సిపల్ రెబల్స్ పై సస్పెన్షన్ వేటు..!

ఈ ఎన్నికలు తెలంగాణ రాజకీయాల్లో అత్యంత కీలకంగా మారాయి. పట్టణ ఓటర్ల మొగ్గు ఎటువైపు ఉందో తెలియజేయడానికి ఈ ఫలితాలు ఒక కొలమానంగా నిలవనున్నాయి. ఎన్నికల కోడ్ అమలులో ఉన్నందున మద్యం దుకాణాలు మూసివేయడంతో పాటు, పోలింగ్ కేంద్రాల వద్ద 144 సెక్షన్ విధిస్తున్నట్లు అధికారులు ప్రకటించారు.

రేపే తెలంగాణలో మున్సిపల్ ఎన్నికలు

ఎన్నికలకు సంబంధించి అన్ని ఏర్పాట్లు పూర్తి

మొత్తం 123 పట్టణ స్థానిక సంస్థలకు పోలింగ్

2996 వార్డుల్లో పోటీ పడనున్న 12,930 మంది అభ్యర్థులు

ఫిబ్రవరి 13న వెల్లడి కానున్న ఫలితాలు

Municipal elections in Telangana tomorrow.. Polling for a total… pic.twitter.com/ICGxOn9CBX

— BIG TV Breaking News (@bigtvtelugu) February 10, 2026