Telangana Weather : కమ్ముకున్న మేఘాలు.. హైదరాబాద్ లో వర్షం.. మరో రెండురోజులు ?

Telangana Weather : హైదరాబాద్ లోని పలు ప్రాంతాల్లో గురువారం ఉదయం వర్షం కురిసింది. కర్మన్ ఘాట్, చంపాపేట్, సంతోష్ నగర్, ఉప్పల్, తార్నాక, మలక్ పేట, అబ్దుల్లాపూర్ మెట్, పెద్ద అంబర్ పేట్, దిల్ సుఖ్ నగర్, మాసబ్ ట్యాంక్, మీర్ పేట, బాలాపూర్, జూబ్లీహిల్స్, మాదాపూర్, దుర్గంచెరువు, హైటెక్ సిటీ, మైత్రీవనం, సనత్ నగర్, ప్రగతినగర్, పంజాగుట్ట, తిరుమలగిరి, అల్వాల్ తదితర ప్రాంతాల్లో మోస్తరు వర్షం కురిసింది. స్కూళ్లు, కాలేజీలు, ఆఫీసులకు వెళ్లే సమయంలో వర్షం కురవడంతో.. విద్యార్థులు, వాహనదారులు తీవ్ర ఇబ్బందులు ఎదుర్కొన్నారు. వర్షం కారణంగా.. మెట్రో ట్రైన్లలో రోజూకంటే రద్దీ మరింత పెరిగింది. కాగా.. గురువారం సాయంత్రంలోగా మరికొన్ని ప్రాంతాల్లో భారీ వర్షం కురవవచ్చని వాతావరణశాఖ తెలిపింది.

బంగాళాఖాతంలో ఏర్పడిన ఉపరితల ఆవర్తనాల కారణంగా మరో రెండురోజులపాటు రాష్ట్రంలోని పలు ప్రాంతాల్లో ఉరుములతో కూడిన జల్లులు కురిసే అవకాశం ఉందని వాతావరణశాఖ వెల్లడించింది. తెలంగాణతో పాటు ఏపీలోనూ తేలికపాటి నుంచి మోస్తరు వర్షాలు కురుస్తాయని పేర్కొంది. ముఖ్యంగా ఉత్తర కోస్తా, యానాంలలో వర్షాలు కురుస్తాయని వాతావరణ కేంద్రం అధికారులు వెల్లడించారు. ఈశాన్య దిశ నుంచి తెలంగాణవైపుకు వీస్తున్న కిందిస్థాయి గాలుల ప్రభావంతో గ్రేటర్ హైదరాబాద్ లో ఉష్ణోగ్రతలు స్వల్పంగా తగ్గాయి.