Shivaprasad Missing: ‘నా భార్య నా ఇజ్జత్ తీస్తోంది.. నాకు ఈ బతుకు బతకాలని లేదు’ అంటూ ఓ యువకుడు కన్నీటిపర్యంతమవుతూ తల్లిదండ్రులకు సెల్ఫీ వీడియో పంపి అదృశ్యమైన ఘటన మహబూబ్నగర్ జిల్లాలో కలకలం రేపింది. బాలానగర్ మండలం మోతీఘనపూర్ గ్రామానికి చెందిన శివప్రసాద్ (23) తన భార్య పెడుతున్న నరకాన్ని తట్టుకోలేక ఈ తీవ్ర నిర్ణయం తీసుకున్నట్లు తెలుస్తోంది.
పెద్దల ముందు దోషిగా నిలబెడుతోందని ఆవేదన
తాను అదృశ్యమయ్యే ముందు శివప్రసాద్ రికార్డ్ చేసిన వీడియోలో తన ఆవేదనను వెళ్లగక్కాడు. తన భార్య తరచూ చిన్న విషయాలకే గొడవలు పెట్టుకుంటూ, బూతులు తిడుతూ, చేయి చేసుకుంటోందని వాపోయాడు. అంతేకాకుండా, గ్రామంలోని పెద్ద మనుషుల ముందు తనేదో పెద్ద తప్పు చేసినట్లు చిత్రీకరిస్తూ తన పరువు తీస్తోందని ఆవేదన వ్యక్తం చేశాడు. ‘చట్టాలు ఆడవారి వైపే ఉన్నాయన్న ధీమాతో నా జీవితంతో ఆడుకుంటోంది. కొడుతూ, కొరుకుతూ నన్ను పిచ్చివాడిని చేసి చనిపోమంటోంది’ అని శివప్రసాద్ ఆ వీడియోలో కన్నీరుమున్నీరయ్యాడు.
కొత్తూరు వద్ద స్కూటీ లభ్యం
‘నాకు ఇక బతకాలని లేదు, మీరైనా సంతోషంగా ఉండండి’ అంటూ తల్లిదండ్రులకు చివరి సందేశం పంపిన శివప్రసాద్.. తన స్కూటీపై హైదరాబాద్ వైపు వెళ్లాడు. కంగారుపడిన కుటుంబ సభ్యులు వెతకగా.. రంగారెడ్డి జిల్లా కొత్తూరు వద్ద అతని స్కూటీ నిలిపి ఉంచి కనిపించింది. దీంతో ఆందోళన చెందిన తల్లిదండ్రులు పోలీసులను ఆశ్రయించారు. వారి ఫిర్యాదు మేరకు కేసు నమోదు చేసుకున్న పోలీసులు, శివప్రసాద్ ఆచూకీ కోసం ముమ్మరంగా గాలిస్తున్నారు.
‘నా భార్య ఇజ్జత్ తీస్తుంది.. బతకాలని లేదు
తల్లిదండ్రులకు సెల్ఫీ వీడియో పంపి యువకుడి అదృశ్యం pic.twitter.com/LUrZApXgcj
— Donkana Vamsi (@DonkanaV0713) November 18, 2026
Also Read: ఎమ్మెల్సీ బల్మూరి వెంకట్ కారుకు ప్రమాదం.. తప్పిన ముప్పు