Sabarimala Special Trains 2026-27: శబరిమల అయ్యప్ప స్వామి దర్శనం కోసం వెళ్లే భక్తులకు రైల్వే సూపర్ న్యూస్ చెప్పింది. మండల-మకరవిళక్కు సీజన్లో తెలుగు రాష్ట్రాల నుంచి కేరళకు వెళ్లే ప్రయాణికుల రద్దీని దృష్టిలో ఉంచుకుని ప్రత్యేక రైళ్లను ఏర్పాటు చేసింది. తెలంగాణ, ఆంధ్రప్రదేశ్లోని వివిధ ప్రాంతాల నుంచి కేరళలోని కొల్లం వరకు మొత్తం 96 ప్రత్యేక రైలు సర్వీసులను నడపాలని నిర్ణయించింది. నవంబర్ 2026 నుంచి జనవరి 2027 వరకు ఈ రైళ్లు అందుబాటులో ఉండనున్నాయి.
ప్రతి ఏడాది మండల-మకరవిళక్కు సీజన్లో శబరిమలకు లక్షలాది మంది అయ్యప్ప భక్తులు వెళ్తుంటారు. ఈ సమయంలో సాధారణ రైళ్లలో టికెట్లు దొరకడం కష్టంగా మారుతుంది. కొన్ని రైళ్లలో నెలల ముందుగానే వెయిటింగ్ లిస్ట్ భారీగా పెరుగుతోంది. ఈ సమస్యను తగ్గించేందుకు దక్షిణ మధ్య రైల్వే (SCR), దక్షిణ తీర రైల్వే (SCoR) ప్రత్యేక రైళ్లను ప్రకటించాయి. శబరిమల ఆలయం నవంబర్ 16న తెరుచుకోగా, డిసెంబర్ 27 వరకు మండల పూజలు జరగనున్నాయి. అనంతరం డిసెంబర్ 30 నుంచి జనవరి 20, 2027 వరకు మకరవిళక్కు ఉత్సవాల కోసం ఆలయాన్ని తెరవనున్నారు.
తెలంగాణ ప్రాంతం నుంచి దక్షిణ మధ్య రైల్వే ఐదు జతల రైళ్ల ద్వారా మొత్తం 52 సర్వీసులను నడపనుంది. హైదరాబాద్, చర్లపల్లి లాంటి స్టేషన్ల నుంచి కొల్లంకు ప్రత్యేక రైళ్లు అందుబాటులో ఉంటాయి. హైదరాబాద్ దక్కన్ నుంచి కొల్లంకు వెళ్లే ప్రత్యేక రైలు (07193/07194) డిసెంబర్ 5 నుంచి 26 వరకు శనివారాల్లో నడుస్తుంది. చర్లపల్లి నుంచి కొల్లంకు మరో ప్రత్యేక రైలు (07180/07181) నవంబర్ 20 నుంచి డిసెంబర్ 25 వరకు శుక్రవారాల్లో ప్రయాణిస్తుంది.
అటు 07195/07196 రైలు నవంబర్ 22 నుంచి జనవరి 17 వరకు ఆదివారాల్లో, 07197/07198 రైలు డిసెంబర్ 2 నుంచి 23 వరకు బుధవారాల్లో నడుస్తాయి. మరో ప్రత్యేక సర్వీస్ డిసెంబర్ 30 నుంచి జనవరి 13 వరకు అందుబాటులో ఉంటుంది. ఈ రైళ్లు నల్లగొండ, మిర్యాలగూడ, గుంటూరు, తెనాలి, ఒంగోలు, నెల్లూరు, కాజీపేట, వరంగల్, ఖమ్మం మీదుగా ప్రయాణిస్తాయి.
ఆంధ్రప్రదేశ్ నుంచి మూడు జతల రైళ్ల ద్వారా 44 ప్రత్యేక సర్వీసులను నడపనున్నారు. శ్రీకాకుళం రోడ్ నుంచి కొల్లంకు వెళ్లే రైలు (08539/08540) నవంబర్ 22 నుంచి జనవరి 24 వరకు ఆదివారాల్లో నడుస్తుంది. విజయనగరం, విశాఖపట్నం, రాజమండ్రి, విజయవాడ, రేణిగుంట మీదుగా ప్రయాణిస్తుంది.
కాకినాడ టౌన్ నుంచి కొల్లంకు వెళ్లే రైలు (07233/07234) నవంబర్ 19 నుంచి జనవరి 21 వరకు గురువారాల్లో అందుబాటులో ఉంటుంది. రాజమండ్రి, విజయవాడ, గుంటూరు, నంద్యాల, ధర్మవరం, చిత్తూరు మీదుగా ఈ రైలు నడుస్తుంది.
ప్రత్యేక రైళ్లలో ఫస్ట్ ఏసీ, సెకండ్ ఏసీ, థర్డ్ ఏసీ, స్లీపర్, జనరల్ కోచ్లు ఉంటాయి. కొట్టాయం, తిరువల్ల, చెంగన్నూర్, కొల్లం వంటి స్టేషన్లలో రైళ్లు ఆగుతాయి. అక్కడి నుంచి పంబకు చేరుకునేందుకు కేరళ ఆర్టీసీ బస్సులు అందుబాటులో ఉంటాయి.
Read Also: సంక్రాంతికి సొంతూళ్లకు వెళ్లేవారికి షాక్.. అప్పుడే నిండిపోయిన రైళ్లు!