Thailand Visa Update 2026: థాయ్ లాండ్ ప్రభుత్వం కొత్త వీసా నిబంధనలకు అందుబాటులోకి తీసుకొచ్చింది. భారతీయులకు ఇప్పటి వరకు అందుబాటులో ఉన్న 60 రోజుల వీసా ఫ్రీ ఎంట్రీ విధానాన్ని థాయ్ ప్రభుత్వం రద్దు చేసింది. ఇకపై భారతీయులు థాయ్ లాండ్ కు వెళ్లాలంటే వీసా ఆన్ అరైవల్ ద్వారా వెళ్లాల్సి ఉంటుంది. థాయ్ లాండ్ ప్రభుత్వం తీసుకున్న ఈ నిర్ణయం భారత పర్యాటకులపై తీవ్రంగా పడనుంది.
గతంలో థాయ్‌లాండ్ భారతదేశంతో పాటు 93 దేశాల పర్యాటకులకు 60 రోజుల వీసా రహిత ప్రవేశాన్ని ఇచ్చింది. 2024 జూలైలో ఈ సౌకర్యాన్ని మరింత విస్తరించింది. అదనంగా 30 రోజులు పొడిగించుకునే అవకాశాన్ని కూడా కల్పించింది. దీంతో భారతీయులు ఎక్కువ కాలం సెలవులు గడపడానికి థాయ్ లాండ్ ను ఎంచుకుంటున్నారు. అయితే, ఇప్పుడు ఆ విధానంలో కీలక మార్పలు చేసింది. మే 19న థాయ్ లాండ్ క్యాబినెట్ కొత్త వీసా విధానానికి ఆమోదం తెలిపింది. ఒక దేశం – ఒక వీసా సౌకర్యం అనే కొత్త విధానాన్ని అమల్లోకి తీసుకొచ్చింది. దీని ప్రకారం ప్రతి దేశానికి ఒకే వీసా కేటగిరీ మాత్రమే వర్తిస్తుంది. ఈ మార్పులు అధికారికంగా రాయల్ గెజెట్‌ లో ప్రచురించిన 15 రోజుల తర్వాత అమల్లోకి రానున్నాయి.
కొత్త నిబంధనల ప్రకారం 60 రోజుల వీసా ఫ్రీ విధానాన్ని పూర్తిగా రద్దు చేశారు. 30 రోజుల వీసా మినహాయింపు పొందే దేశాల సంఖ్యను కూడా తగ్గించారు. అలాగే వీసా ఆన్ అరైవల్ జాబితాను భారీగా కుదించారు. ప్రస్తుతం కేవలం నాలుగు దేశాలకు మాత్రమే ఈ సౌకర్యం ఉండనుంది. వాటిలో భారతదేశం కూడా ఒకటి.
దీంతో భారతీయులకు ఇకపై వీసా లేకుండా థాయ్‌లాండ్‌లోకి ప్రవేశించే అవకాశం ఉండదు. అక్కడి విమానాశ్రయాలు, ఇమ్మిగ్రేషన్ చెక్ పాయింట్ల దగ్గర వీసా ఆన్ అరైవల్ తీసుకోవాలి. ఈ విధానం కింద గరిష్టంగా 15 రోజుల పాటు మాత్రమే థాయ్ లాండ్‌లో ఉండేందుకు అనుమతి ఉంటుంది. సో, ఎక్కువ రోజులు సెలవులు ప్లాన్ చేసే వారికి ఇది కొంత ఇబ్బందిగా మారే అవకాశం ఉంది.
థాయ్ లాండ్ ప్రభుత్వం ఈ మార్పులకు భద్రతా కారణాలను చూపుతోంది. అక్రమ ఉపాధి, నకిలీ వ్యాపారాలు, అంతర్జాతీయ నేరాలు పెరుగుతున్నాయనే ఆందోళనల నేపథ్యంలో ఈ నిర్ణయం తీసుకున్నట్లు తెలిపింది. పర్యాటకుల సంఖ్య కంటే నిజమైన పర్యాటకులను ఆకర్షించడంపైనే ఇప్పుడు ఎక్కువ దృష్టి పెట్టినట్లు థాయ్ లాండ్ టూరిజం మంత్రి వెల్లడించారు. అయితే, ఇప్పటికే థాయ్ లాండ్ లో ఉన్నవారికి, కొత్త నిబంధనలు అమల్లోకి రాకముందే ప్రయాణం ప్లాన్ చేసుకున్నవారికి ఎలాంటి ఇబ్బంది ఉండదు. వారికి పాత నిబంధనల ప్రకారమే అనుమతి కొనసాగుతుంది. భారతీయ పర్యాటకులు ఇప్పుడు థాయ్ లాండ్ ట్రిప్ ప్లాన్ చేసుకునే ముందు తాజా వీసా నిబంధనలు తప్పనిసరిగా చెక్ చేసుకోవడం మంచిది.
Read Also: మండే ఎండలతో అల్లాడుతున్నారా? కూల్ గా అలా హిమాలయాలను చుట్టేసి రండి!
Share
పాన్ కార్డు నెంబర్లు.. చిత్ర విచిత్రంగా ఎందుకు ఉంటాయో తెలుసా? దీని వెనుక ఇంత కథ ఉందా?
అఖిల్ అక్కినేని ‘లెనిన్’ టీజర్ వచ్చేసింది.. ఈ సారి ‘లెనిన్’ అయినా కాపాడుతుందా అఖిల్‌ని!..
