Dimple plasty: సొట్ట బుగ్గులకు సర్జరీ.. అమ్మాయిల్లో పెరుగుతున్న డింపుల్ క్రేజ్.. జస్ట్ రూ.60వేలకే..!

మారుతున్న కాలంతో పాటు అందంపై పెరిగిన అవగాహన, సోషల్ మీడియా ప్రభావం ఇప్పుడు వింత పోకడలకు దారితీస్తోంది. సిలికాన్ వ్యాలీగా పేరున్న బెంగళూరులో ప్రస్తుతం మహిళలు తమ ముఖ సౌందర్యాన్ని పెంచుకోవడానికి కృత్రిమ మార్గాలను ఎంచుకుంటున్నారు. ముఖ్యంగా నవ్వినప్పుడు బుగ్గన సొట్ట పడేలా చేసే డింపుల్ ప్లస్టీ (Dimple plasty) సర్జరీకి నగరంలో గిరాకీ విపరీతంగా పెరిగింది. ఇందుకోసం మహిళలు రూ. 45,000 నుంచి రూ. 60,000 వరకు ఖర్చు చేస్తున్నట్లు గణాంకాలు చెబుతున్నాయి.

సెలబ్రిటీలే స్ఫూర్తి.. 

ఒకప్పుడు ప్రీతి జింటా బుగ్గన సొట్టలకు ఫిదా అయిన యువత, ఇప్పుడు అలియా భట్, దీపికా పదుకొనే వంటి బాలీవుడ్ తారలతో పాటు కన్నడ నటి రచితా రామ్ అందాన్ని చూసి మురిసిపోతున్నారు. ప్లాస్టిక్ సర్జన్ల వద్దకు వెళ్తున్న మహిళలు తాము అభిమానించే సెలబ్రిటీల ఫోటోలను చూపిస్తూ.. తమకు కూడా అచ్చం అలాగే సొట్టలు కావాలని కోరుతున్నట్లు వైద్యులు వెల్లడించారు. 20 నుంచి 40 ఏళ్ల మధ్య వయస్సు గల మహిళలే ఎక్కువగా ఈ సొట్ట బుగ్గల కోసం ఆసక్తి చూపుతున్నారని వైద్యులు చెబుతున్నారు.

సర్జరీ ఎలా చేస్తారు?

డింపుల్ ప్లస్టీ అనేది లోకల్ అనస్థీషియా ద్వారా చేసే చాలా ఈజీగా ఉండే సర్జరీ. కేవలం ఒకటి నుంచి రెండు గంటల్లోనే ఈ ప్రక్రియ పూర్తవుతుంది. బుగ్గ లోపలి భాగం నుంచి చిన్న కోత పెట్టి కండరాలను కుట్టడం ద్వారా కృత్రిమంగా సొట్టలను సృష్టిస్తారు. ప్రైవేట్ ఆసుపత్రులు, కాస్మెటిక్ క్లినిక్‌లకు నెలకు సుమారు మూడు నుంచి నాలుగు వరకు ఇలాంటి కేసులు వస్తున్నట్లు వైద్యులు చెబుతున్నారు. పదేళ్ల క్రితం ఉన్న ఈ ట్రెండ్ ఇప్పుడు మళ్ళీ జోరందుకుంది.

ముప్పు తప్పదా?

అయితే, అందం కోసం చేసే ఈ సర్జరీల్లో కొన్ని రిస్క్‌లు కూడా ఉన్నాయని వైద్య నిపుణులు హెచ్చరిస్తున్నారు. నోటి లోపలి భాగం నుంచి సర్జరీ చేయడం వల్ల ఇన్ఫెక్షన్లు వచ్చే అవకాశం ఎక్కువగా ఉంటుంది. సర్జరీ తర్వాత నోటి పరిశుభ్రత (Oral Hygiene) పాటించకపోతే సమస్యలు తలెత్తుతాయి. వాపు, నొప్పి, తాత్కాలికంగా మొద్దుబారడం వంటివి సహజమే అయినా, కొన్ని సందర్భాల్లో నవ్వకపోయినా ఆ సొట్టలు ముఖంపై శాశ్వతంగా ఉండిపోయే ప్రమాదం కూడా ఉంది.

చివరిగా.. ప్రతి ఒక్కరి ముఖ సౌష్టవం వేరుగా ఉంటుందని, ఒకరిలా మరొకరు మారడం సాధ్యం కాదని వైద్యులు స్పష్టం చేస్తున్నారు. సెలబ్రిటీల ఫోటోలు తెచ్చి అలాగే మార్చమని అడిగే వారు వాస్తవ పరిస్థితులను అర్థం చేసుకోవాలని సూచిస్తున్నారు.

ALSO READ: Ritual Fire Ceremony: ఆయురారోగ్య ఐశ్వర్యాల కోసం ఏ హోమం చేయాలో తెలుసా..?