Shimla News: ఆస్పత్రికి వచ్చిన రోగిపై డాక్టర్ రప్పా రప్పా.. వీడియో వైరల్

Shimla News:  హిమాచల్ ప్రదేశ్ రాజధాని సిమ్లాలోని ఇందిరా గాంధీ మెడికల్ కాలేజీ (ఐజీఎంసీ)లో ఆదివారం డాక్టర్–పేషంట్ మధ్య ఘర్షణ చోటుచేసుకుంది. శిమ్లా జిల్లా కుప్వీ సబ్‌డివిజన్‌కు చెందిన ఓ పేషంట్ శ్వాస సమస్యతో చికిత్స కోసం ఐజీఎంసీకి వచ్చారని సమాచారం. చికిత్స సమయంలో డాక్టర్ తనను అవమానించేలా వ్యాఖ్యలు చేశారని పేషంట్ ఆరోపించారు. గౌరవంగా మాట్లాడాలని కోరిన అనంతరం డాక్టర్ తనపై దాడికి పాల్పడ్డారని ఆయన తెలిపారు.

ఈ ఘటనతో ఆసుపత్రిలో కొద్దిసేపు ఉద్రిక్తత నెలకొంది. పేషంట్‌కు స్వల్ప గాయాలయ్యాయని, వెంటనే అక్కడే ప్రాథమిక చికిత్స అందించినట్లు తెలుస్తోంది. ఘటనపై ఇతర రోగులు,  వారి సహాయకులు ఆందోళన వ్యక్తం చేశారు. ఆసుపత్రి వాతావరణంలో ఇలాంటి సంఘటనలు జరగడం దురదృష్టకరమని వారు అభిప్రాయపడ్డారు.

ఇక డాక్టర్ల సంఘం ఈ ఆరోపణలపై స్పందిస్తూ..  పూర్తి విషయాలు వెలుగులోకి రావాల్సి ఉందని పేర్కొంది. విధుల్లో ఉన్న వైద్యుల భద్రత కూడా కీలకమని, ఏకపక్ష నిర్ణయాలకు వెళ్లకూడదని సూచించింది. ఘటనపై ఆసుపత్రి యాజమాన్యం అంతర్గత విచారణకు ఆదేశించినట్లు సమాచారం. అవసరమైతే పోలీసులకు ఫిర్యాదు చేసే అవకాశముందని అధికారులు తెలిపారు.

ఈ సంఘటన ఆరోగ్యరంగంలో పేషంట్–డాక్టర్ మధ్య పరస్పర గౌరవం ఎంత ముఖ్యమో మరోసారి గుర్తుచేస్తోందని పలువురు అభిప్రాయపడుతున్నారు.

ALSO READ: Medchal Crime: అన్నంలో విషం పెట్టి చంపి.. భార్య డ్రామాలు