Union Budget 2026: ఆరెంజ్ ఎకానమీకి బడ్జెట్ ఊతం.. 2030 నాటికి 20 లక్షల ఉద్యోగాలే లక్ష్యంగా కేంద్రం అడుగులు

భారత ఆర్థిక వ్యవస్థలో సరికొత్త జవజీవాలు నింపేందుకు కేంద్ర ఆర్థిక మంత్రి నిర్మలా సీతారామన్ 2026-27 బడ్జెట్‌లో కీలక ప్రకటనలు చేశారు. తన తొమ్మిదో వరుస బడ్జెట్‌ను ప్రవేశపెట్టిన ఆమె, ఈసారి ఆరెంజ్ ఎకానమీ (సృజనాత్మక ఆర్థిక వ్యవస్థ) పై ప్రత్యేక దృష్టి సారించారు. ముఖ్యంగా యానిమేషన్, విజువల్ ఎఫెక్ట్స్, గేమింగ్, కామిక్స్ (AVGC) రంగాన్ని ప్రోత్సహించడం ద్వారా యువతకు ఉపాధి కల్పించడమే లక్ష్యంగా ప్రభుత్వం కొత్త పథకాలను ప్రకటించింది.

కంటెంట్ క్రియేషన్ హబ్‌గా భారత్

ముంబైలోని ఇండియన్ ఇన్‌స్టిట్యూట్ ఆఫ్ క్రియేటివ్ టెక్నాలజీస్ (IICT) సహకారంతో దేశవ్యాప్తంగా 15,000 సెకండరీ పాఠశాలలు, 500 కళాశాలల్లో ప్రత్యేకమైన AVGC, కంటెంట్ క్రియేటర్ ల్యాబ్‌లను ఏర్పాటు చేయనున్నట్లు మంత్రి తెలిపారు. ఈ రంగం 2030 నాటికి సుమారు 20 లక్షల మంది నిపుణులను కోరుకుంటుందని, ఆ అవసరాలను తీర్చేందుకు విద్యార్థి దశ నుంచే శిక్షణ ఇవ్వడం అత్యవసరమని ఆమె పేర్కొన్నారు. ఇది కేవలం సాంకేతిక విజ్ఞానాన్ని అందించడమే కాకుండా, భారతీయ కళలు, సంస్కృతిని డిజిటల్ మాధ్యమాల ద్వారా ప్రపంచానికి పరిచయం చేసే అవకాశం కల్పిస్తుంది.

ఆరెంజ్ ఎకానమీ అంటే ఏమిటి?

సాధారణంగా వస్తువుల ఉత్పత్తి కాకుండా.. ఆలోచనలు, కళాత్మక వ్యక్తీకరణలు, సాంస్కృతిక వారసత్వం, మేధో సంపత్తి ఆధారంగా విలువను సృష్టించే రంగాలను ఆరెంజ్ ఎకానమీగా పిలుస్తారు. ఎకనామిక్ సర్వే 2025-26 సూచించినట్లుగా.. మీడియా, ఎంటర్టైన్మెంట్, కల్చర్, టూరిజం రంగాలు దేశ అభివృద్ధిలో కీలక పాత్ర పోషించనున్నాయి. భౌతిక వస్తువుల కంటే సృజనాత్మకతకు ప్రాధాన్యత ఇచ్చే ఈ రంగం పట్టణ సేవల మెరుగుదలకు, ఉపాధి కల్పనకు ప్రధాన చోదక శక్తిగా మారుతుందని ప్రభుత్వం విశ్వసిస్తోంది.

మూడు కర్తవ్యాలు.. ఆరు రంగాలు

బడ్జెట్ 2026లో భాగంగా నిర్మలా సీతారామన్ వృద్ధి, సమగ్రతను సాధించడానికి మూడు కర్తవ్యాలను (విధులను) వివరించారు. ఆర్థిక వృద్ధిని వేగవంతం చేయడం, పౌరులను సాధికారత వైపు నడిపించడం మరియు వనరుల సమాన పంపిణీని నిర్ధారించడం. వీటితో పాటు వ్యూహాత్మక తయారీ రంగాన్ని బలోపేతం చేయడం, లెగసీ పరిశ్రమల పునరుజ్జీవనం, MSMEల బలోపేతం, మౌలిక సదుపాయాల విస్తరణ, ఆర్థిక స్థిరత్వం, నగర ఆర్థిక ప్రాంతాల అభివృద్ధి వంటి ఆరు రంగాలపై ప్రత్యేక దృష్టి సారించారు.

వికసిత్ భారత్ దిశగా..

నవ సాంకేతికతలు మరియు సమర్థవంతమైన వనరుల నిర్వహణ ద్వారా భారత్‌ను వికసిత్ భారత్ (అభివృద్ధి చెందిన దేశం) గా మార్చడమే తమ లక్ష్యమని సీతారామన్ స్పష్టం చేశారు. ఐటీ రంగానికి తోడుగా ఈ క్రియేటివ్ టెక్నాలజీ రంగం చేరడం వల్ల భారత్ ప్రపంచ సాఫ్ట్‌వేర్, కంటెంట్ మార్కెట్లో అగ్రగామిగా నిలుస్తుందని విశ్లేషకులు భావిస్తున్నారు. ఈ నిర్ణయం పాఠశాల స్థాయి నుంచే విద్యార్థుల్లో సరికొత్త ఆలోచనలకు బీజం వేయడంతో పాటు, గ్రామీణ యువతకు కూడా అంతర్జాతీయ స్థాయి అవకాశాలను చేరువ చేస్తుంది.

ALSO READ: Union Budget 2026: గ్రీన్ ఎనర్జీకి బడ్జెట్ బూస్ట్.. 4000 ఈ-బస్సులు, పర్యాటకానికి పెద్దపీట!